దీపావళి కానుకగా 'గని'.. రజినీ ని మెగా ప్రిన్స్ ఢీ కొడతాడా..?

'ఎఫ్ 2' 'గడ్డలకొండ గణేష్' వంటి రెండు వరుస హిట్స్ తర్వాత మెగా ప్రిన్స్‌ వరుణ్‌ తేజ్‌ హీరోగా నటిస్తున్న తాజా చిత్రం ''గని''. బాక్సింగ్ నేపథ్యంలో తెరకెక్కుతున్న ఈ స్పోర్ట్స్ డ్రామాకి కిరణ్‌ కొర్రపాటి దర్శకత్వం వహిస్తున్నారు. ఇటీవలే ఫైనల్ షెడ్యూల్ షూటింగ్ ను మొదలు పెట్టిన చిత్ర బృందం.. క్లైమాక్స్ బాక్సింగ్ ఎపిసోడ్ షూట్ చేశారు. చిత్రీకరణ చివరి దశకు చేరడంతో రేపు గురువారం సాయంత్రం ఎగ్జైటింగ్ అప్డేట్ తో రాబోతున్నట్లు మేకర్స్ ప్రకటించారు.

అయితే చెప్పిన అప్డేట్ ''గని'' రిలీజ్ డేట్ కు సంబంధించినదని తెలుస్తోంది. నిజానికి వరుణ్ తేజ్ కెరీర్ లో వస్తున్న ఈ 10వ చిత్రాన్ని జులై 30న ప్రేక్షకుల ముందుకు తీసుకురావాలని ప్లాన్ చేసుకున్నారు. కరోనా సెకండ్ వేవ్ నేపథ్యంలో వాయిదా పడింది. ఇప్పుడు పరిస్థితులు చక్కబడటంతో దీపావళి కానుకగా విడుదల చేయడానికి మేకర్స్ సన్నాహాలు చేస్తున్నట్లు సమాచారం. రేపు సాయంత్రం ఈ విషయాన్ని అధికారికంగా ప్రకటించనున్నారు.

దీపావళి పండుగ సందర్భంగా నవంబర్ 4న సూపర్ స్టార్ రజినీకాంత్ నటిస్తున్న 'అన్నాత్తే' చిత్రాన్ని విడుదల చేస్తున్నారు. తెలుగులో కూడా రిలీజ్ అయ్యే సినిమా 'గని' చిత్రానికి పోటీగా మారే అవకాశం ఉంది. రాబోయే రోజుల్లో ఏమి జరుగుతుందో చూడాలి. అల్లు అరవింద్‌ సమర్పిస్తున్న ఈ చిత్రాన్ని రినైసెన్స్ పిక్చర్స్ - అల్లు బాబీ కంపెనీ పతాకాలపై ఈ సినిమా రూపొందుతోంది. అల్లు బాబీ - సిద్ధు ముద్ద సంయుక్తంగా ఈ చిత్రాన్ని నిర్మిస్తున్నారు.

ఇప్పటికే విడుదలైన 'గని' ఫస్ట్‌ లుక్‌ పోస్టర్‌ విశేషంగా ఆకట్టుకుంది. ఇందులో వరుణ్ తేజ్ సరసన బాలీవుడ్ బ్యూటీ సైఈ మంజ్రేకర్ హీరోయిన్ గా నటిస్తోంది. కన్నడ స్టార్ ఉపేంద్ర - బాలీవుడ్ స్టార్ సునీల్ శెట్టి - జగపతిబాబు - నవీన్ చంద్ర కీలక పాత్రలు పోషిస్తున్నారు. థమన్ ఈ చిత్రానికి సంగీతం సమకూరుస్తున్నారు. జార్జ్ సి విలియమ్స్ సినిమాటోగ్రఫీ అందిస్తున్నారు.