ఇకనైనా మేఘ ఆకాశ్ దశ తిరిగేనా?

చూస్తుంటే మేఘ ఆకాశ్ దరిదాపుల్లోనే అదృష్టం తిరుగుతున్నట్టుగా కనిపిస్తోంది. ఇంతకాలంగా ఆమె వెదుకుతున్న అదృష్టం, ఇప్పుడు ఆమెను వెతుకుతూ వస్తున్నట్టుగా అనిపిస్తోంది. లేకపోతే ఆమె చేసిన రెండు సినిమాలకు ఇంతలా ఎందుకు బజ్ పెరుగుతుంది? చాలా తక్కువ గ్యాపులోనే అవి విడుదల తేదీలను ఎలా ఫిక్స్ చేసుకుంటాయి? ఇదంతా చూస్తుంటే దశ తిరిగే ముందు సూచనలు ఇలాగే ఉంటాయేమోనని కూడా అనిపించడం సహజం. అందానికీ .. అభినయానికి ఏదో ఒక రోజు గుర్తింపు లభించకుండా ఉంటాయా మరి.

టాలీవుడ్ కి మేఘ ఆకాశ్ 'లై' సినిమా ద్వారా పరిచయమైంది. ఆ సినిమా విడుదల కాకముందే నితిన్ తో 'ఛల్ మోహన రంగ' సినిమా కూడా ఒప్పేసుకుని చేసేసింది. అయితే ఆ సినిమాలు అంతగా ఆడలేదు. అయితే లుక్ పరంగా ఈ బ్యూటీకి మంచి మార్కులే పడిపోయాయి. ఇలాంటి అమ్మాయి తమ కాలనీలో ఉంటే ఎంత బాగుండునని కొంతమంది కుర్రాళ్లు అనుకుంటే, తమని థియేటర్లలో నుంచి బయటికి పంపించకుండా ఈ అమ్మాయి సినిమానే ఏకధాటిగా ఓ ఏడాది పాటు ఆడించేస్తే బాగుంటుందని మరికొందరు అనుకున్నారు.

ఎంతటి గ్లామర్ కైనా సక్సెస్ తోడు కావాలి .. లేదంటే సక్సెస్ వచ్చేవరకూ వెయిట్ చేయాలి అనే సత్యం అందరికీ తెలిసిందే. అలా ఈ అమ్మాయి కూడా తెలుగులో సరైన అవకాశం కోసం ఎదురుచూస్తూ, తమిళ సినిమాలతో కెరియర్ ను నెట్టుకొస్తోంది. ఈ నేపథ్యంలోనే ఈ పిల్లకు 'రాజ రాజ చోర' అనే సినిమాలోను, 'డియర్ మేఘ' అనే సినిమాలోను అవకాశాలు వచ్చాయి. 'రాజ రాజ చోర'లో శ్రీవిష్ణు సరసన నాయికగా అలరించనున్న ఆమె, 'డియర్ మేఘ' సినిమాలో ప్రధానమైన పాత్రలో కనిపించనుంది.

టీజర్ .. ట్రైలర్ ను బట్టి చూస్తే 'రాజ రాజ చోర' సినిమాలో ఈ అమ్మాయి పాత్రకి మంచి ప్రాముఖ్యత ఉందనే విషయం అర్థమవుతోంది. ఇక 'డియర్ మేఘ'లో ఈ పిల్ల మంచి ముత్యంలా .. పాలతో కడిగిన పగడంలా కనిపిస్తోంది. పోస్టర్లలో ఆమె ఇంతకుముందు కన్నా బ్యూటిఫుల్ గా కనిపిస్తోంది. ఈ సినిమా నుంచి వచ్చిన పాటలకు కూడా మంచి రెస్పాన్స్ వచ్చింది. 'రాజ రాజ చోర' ఈ నెల 19వ తేదీన విడుదలవుతుంటే, 'డియర్ మేఘ' సినిమాను వచ్చేనెల 3వ తేదీన విడుదల చేయనున్నారు. ఈ సినిమాలతోనైనా దానిమ్మ మొగ్గలాంటి ఈ అమ్మాయి దశ తిరుగుతుందేమో చూడాలి.