నాని జోడీగా 'ప్రేమమ్' బ్యూటీకి కలిసొచ్చేనా?

లాక్ డౌన్ సమయాన్ని కథా రచయితలు .. హీరోలు వృథా చేయలేదనే అనిపిస్తోంది. కథా రచయితలు ఇంటిపట్టునే కూర్చుని కథలను బాగానే వండారు. ఇక హీరోలు కూడా ఫోన్లలోనే కథలు వినేసి మార్పులు చేర్పులు చెప్పేశారు. అందువల్లనేనేమో లాక్ డౌన్ ఆంక్షలు ఎత్తేయగానే పోలోమంటూ కొత్త సినిమాల ఓపెనింగులు జరిగిపోతున్నాయి. సెట్లమీదకు వెళ్లిపోయి చకచకా షూటింగులు కానిచ్చేస్తున్నారు. కరోనానే మాస్క్ తగిలించుకుందనే ఫీలింగులో ఆర్టిస్టులు వరుస షూటింగులలో పాల్గొంటున్నారు. అలాంటి హీరోల జాబితాలో నాని ముందువరుసలోనే ఉన్నాడు.

నాని కథానాయకుడిగా 'టక్ జగదీశ్' .. 'శ్యామ్ సింగ రాయ్' .. 'అంటే .. సుందరానికీ!' సినిమాలు సిద్ధమవుతున్నాయి. ఈ సినిమాలలో ముందుగా 'టక్ జగదీశ్' ప్రేక్షకుల ముందుకు రానుంది. ఆ తరువాత సినిమాగా 'శ్యామ్ సింగ రాయ్' విడుదల కానుంది. ప్రస్తుతం నాని ఈ సినిమా షూటింగులో బిజీగా ఉన్నాడు. రాహుల్ సాంకృత్యన్ దర్శకత్వం వహించిన ఈ సినిమాలో సాయిపల్లవి - కృతి శెట్టి కథానాయికలుగా నటిస్తున్నారు. ఈ ఇద్దరు హీరోయిన్లకు తెలుగులో విపరీతమైన క్రేజ్ ఉంది. దాంతో ఈ ప్రాజెక్టుపై అంచనాలు భారీగానే ఉన్నాయి. ఈ సినిమాలో మరో హీరోయిన్ కూడా ఉంది .. ఆమెనే మడోన్నా సెబాస్టియన్.

ఈ పేరు ఎక్కడో విన్నట్టుందే అనిపించడం సహజం. వినడమే కాదు .. చూశారు కూడా. అదే .. 'ప్రేమమ్' సినిమాలో. నాలుగేళ్ల క్రితం చందూ మొండేటి దర్శకత్వంలో 'ప్రేమమ్' సినిమా ప్రేక్షకుల ముందుకు వచ్చింది. చైతూ హీరోగా నటించిన ఈ సినిమాలో ఒక హీరోయిన్ గా మడోన్నా సెబాస్టియన్ అలరించింది. ఆ సినిమా యూత్ ను ఒక రేంజ్ లో ఆకట్టుకుంది. సినిమా సూపర్ హిట్ అయినప్పటికీ, మడోన్నా సెబాస్టియన్ కి ఇక్కడ ఎలాంటి అవకాశం రాలేదు. ఆ అమ్మాయిని ఇక్కడి ప్రేక్షకులు మరిచిపోయారు కూడా. అలాంటి మడోన్నాను మళ్లీ ఇప్పుడు 'శ్యామ్ సింగ రాయ్' కోసం తీసుకున్నారు. ఈ సినిమాతోనైనా ఈ మలయాళ మందారం ఇక్కడ నిలదొక్కుకుంటుందేమో చూడాలి.