'పుష్ప' చిత్రాన్ని 'బాహుబలి' మాదిరి 2 భాగాలుగా చేస్తారా..?

సుకుమార్ - అల్లు అర్జున్ కాంబోలో తెరకెక్కుతున్న హ్యాట్రిక్ మూవీ ''పుష్ప''. మైత్రీ మూవీ మేకర్స్ మరియు ముత్యంశెట్టి మీడియా సంస్థలు సంయుక్తంగా ఈ యాక్షన్ థ్రిల్లర్ డ్రామాని నిర్మిస్తున్నాయి. పాన్ ఇండియా స్థాయిలో తెలుగు తమిళ మలయాళ హిందీ కన్నడ భాషల్లో ఆగస్టు 13న ఈ చిత్రాన్ని విడుదల చేయనున్నట్లు మేకర్స్ ప్రకటించారు. అయితే తాజాగా ఫిలిం సర్కిల్స్ లో ఆసక్తికరమైన రూమర్ ఒకటి చక్కర్లు కొడుతోంది.

'పుష్ప' సినిమాని 'బాహుబలి' సినిమా మాదిరిగా రెండు భాగాలుగా తీయాలని ప్లాన్ చేస్తున్నారట. ఈ స్టోరీని రెండు భాగాలుగా చెప్పడానికి స్కోప్ ఉందని.. క్లైమాక్స్ లో ఓ ట్విస్ట్ పెట్టి సెకండ్ పార్ట్ ని కంటిన్యూ చేయొచ్చని సుకుమార్ భావిస్తున్నారట. ఇలా అయితే చెప్పిన డేట్ కి మొదటి భాగాన్ని రిలీజ్ చేయగలమని అల్లు అర్జున్ తో డైరెక్టర్ సుకుమార్ డిస్కష్ చేస్తున్నారని రూమర్స్ వస్తున్నాయి.

కాగా, 'పుష్ప' చిత్రంలో బన్నీకి జోడీగా రష్మిక మందన్నా నటిస్తోంది. మలయాళ స్టార్ ఫహాద్ ఫాజిల్ విలన్ గా నటిస్తుండగా.. ప్రకాష్ రాజ్ - జగపతిబాబు కీలక పాత్రలు పోషిస్తున్నారు. రాక్ స్టార్ దేవిశ్రీప్రసాద్ ఈ మూవీకి సంగీతం సమకూరుస్తున్నారు. మిరోస్లా కుబా బ్రోజెక్ సినిమాటోగ్రఫీ అందిస్తుండగా.. ఆంటోనీ రూబెన్ ఎడిటింగ్ వర్క్ చేస్తున్నారు. ఆస్కార్ అవార్డ్ గ్రహీత రసూల్ పూకుట్టి సౌండ్ డిజైనింగ్ చేస్తున్నారు.

ఎర్ర చందనం స్మగ్లింగ్‌ నేపథ్యంలో ఈ చిత్రం రూపొందుతోంది. ఇందులో అల్లు అర్జున్ లారీ డ్రైవర్‌ పుష్పరాజ్ పాత్రలో కనిపించడమే కాకుండా చిత్తూరు యాసలో మాట్లాడతాడని తెలుస్తోంది. ఇప్పటికే విడుదలైన ఫస్ట్ లుక్ లో ఆయన పాత్ర ఎలా ఉంటుందో శాంపిల్ గా చూపించారు. ఈ క్రమంలో రేపు బన్నీ బర్త్ డే కానుకగా ఈరోజు :పుష్ప రాజ్' పాత్రని పరిచయం చేస్తూ టీజర్ ని విడుదల చేయనున్నారు. 'ఆర్య' 'ఆర్య2' సినిమాల తర్వాత సుక్కు - బన్నీ కాంబోలో వస్తున్న 'పుష్ప' ఎలాంటి రిజల్ట్ అందుకుంటుందో చూడాలి.