'ఆదిపురుష్' కంటే ముందు 'సలార్' వస్తుందా..?

యంగ్ రెబల్ స్టార్ ప్రభాస్ నటించిన పౌరాణిక చిత్రం "ఆదిపురుష్". రామాయణం ఇతిహాసం ఆధారంగా బాలీవుడ్ డైరెక్టర్ ఓం రౌత్ ఈ సినిమాని తెరకెక్కిస్తున్నారు. మోషన్ క్యాప్చర్ పిక్చర్ టెక్నాలజీతో అత్యంత భారీ స్థాయిలో ఈ చిత్రాన్ని తీర్చిదిద్దే ప్రయత్నం చేస్తున్నారు. దీని కోసం ఎక్కువ సమయం తీసుకుంటున్నారు.

'ఆదిపురుష్' చిత్రాన్ని వచ్చే సంక్రాంతికి విడుదల చేయాలని ముందుగా ప్లాన్ చేసుకున్నారు. అయితే టీజర్ పై పెద్ద ఎత్తున ట్రోల్స్ రావడం.. ప్రధాన పాత్రల చిత్రీకరణపై అభ్యంతరాలు వ్యక్తం అవడంతో మేకర్స్ సినిమాని పోస్ట్ పోన్ చేసి.. వీఎఫ్ఎక్స్ మీద రీవర్క్ చేస్తున్నట్లు తెలుస్తోంది.

జనవరి నుంచి వాయిదా పడిన 'ఆదిపురుష్' సినిమాని 2023 జూన్ 16న 3డీ - ఐమాక్స్ ఫార్మాట్ లలో రిలీజ్ చేయనున్నట్లు నిర్మాతలు అధికారికంగా ప్రకటించారు. అయితే ప్రేక్షకులకు అద్భుతమైన విజువల్ అనుభూతిని అందించడం కోసం టీమ్ కు ఈ ఐదారు నెలల సమయం సరిపోదని.. ఇంకాస్త లేట్ అవుతుందని రూమర్స్ వస్తున్నాయి.

ఈ నేపథ్యంలో ఇప్పటికే జూన్ కి వాయిదా వేయబడిన ఈ చిత్రాన్ని బెటర్ అవుట్ ఫుట్ కోసం మరోసారి పోస్ట్ పోన్ చేసే అవకాశాలు ఉన్నాయని సోషల్ మీడియాలో పుకార్లు వినిపిస్తున్నాయి. ఇదే జరిగితే ప్రభాస్ నుంచి 'ఆదిపురుష్' కంటే ముందు "సలార్" సినిమా వస్తుంది.

'కేజీఎఫ్' ఫేమ్ ప్రశాంత్ నీల్ దర్శకత్వంలో తెరకెక్కుతున్న మోస్ట్ అవైటెడ్ భారీ యాక్షన్ మూవీ 'సలార్'. ఇందులో ప్రభాస్ మోస్ట్ వైలెంట్ మ్యాన్ గా కనిపించనున్నారు. ఇప్పటికే విడుదలైన ఫస్ట్ లుక్ విశేషంగా ఆకట్టుకుంది. ఈ చిత్రాన్ని 2023 సెప్టెంబర్ 28న ప్రపంచ వ్యాప్తంగా విడుదల చేయనున్నట్లు మేకర్స్ ఇప్పటికే అధికారికంగా ప్రకటించారు.

అయితే ఒకవేళ నిజంగానే 'ఆదిపురుష్' మరోసారి వాయిదా పడితే మాత్రం.. దాదాపు మరో ఏడాది వరకూ ప్రభాస్ ని బిగ్ స్క్రీన్ మీద చూసే అవకాశం ఉండదు. కాకపోతే మారుతి దర్శకత్వంలో డార్లింగ్ నటిస్తున్న సినిమా షూటింగ్ వీకైంత త్వరగా పూర్తైతే.. ఈ గ్యాప్ ని ఫిల్ చేయడానికి ఛాన్స్ దొరుకుంటుంది.

ఇప్పటికైతే 'ఆదిపురుష్' గురించి వస్తున్నవన్నీ పుకార్లు మాత్రమే. ఎలాంటి అధికారిక ధ్రువీకరణ లేదు. బెటర్ విజువల్స్ అందించడానికి టీమ్ అంతా తీవ్రంగా కష్టపడుతున్నారని తెలుస్తోంది. ఈ భారీ ఇతిహాస కావ్యం ఖచ్చితంగా సరికొత్త అనుభూతిని పంచుతుందని అభిమానులు భావిస్తున్నారు. మరి ఏం జరుగుతుందో చూడాలి.

కాగా, 'ఆదిపురుష్' సినిమాలో రాఘవగా ప్రభాస్ నటిస్తుండగా.. జానకి పాత్రలో కృతి సనన్ కనిపించనున్నారు. లక్ష్మణ్ పాత్రలో సన్నీ సింగ్.. హనుమాన్ గా దేవ దత్తా.. ప్రతినాయకుడు లంకేశ్ గా సైఫ్ అలీ ఖాన్ నటిస్తున్నారు. సోనాల్ చౌహాన్ కూడా ఈ చిత్రంలో భాగం కానుంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.