సూపర్ స్టార్ ఈసారైనా బాక్సాఫీస్ ను షేక్ చేస్తాడా..?

బాలీవుడ్ బాద్ షా షారుక్ ఖాన్ గత కొంతకాలంగా తన రేంజ్ కు తగ్గ సక్సెస్ సాధించలేకపోతున్నారు. భారీ అంచనాల మధ్య వచ్చిన సినిమాలన్నీ బాక్సాఫీస్ వద్ద బోల్తా కొడుతున్నాయి. చివరగా 2018లో 'జీరో' వంటి ప్లాప్ సినిమాతో పలకరించిన స్టార్ హీరో.. ఆ తరవాత ఒక్క చిత్రాన్ని కూడా రిలీజ్ చేయలేదు. మధ్యలో రెండు మూడు సినిమాల్లో ప్రత్యేక పాత్రల్లో తళుక్కుమన్నాడు. అయితే వచ్చే ఏడాది రెండు చిత్రాలతో ప్రేక్షకుల ముందుకు రావడానికి ప్లాన్ చేసుకున్నారు.

ఒకప్పుడు బాక్సాఫీస్ వద్ద బిగ్గెస్ట్ బ్లాక్ బస్టర్స్ అందుకున్న షారుక్ ఖాన్.. మళ్ళీ స్ట్రాంగ్ కంబ్యాక్ ఇవ్వడం కోసం మూడు క్రేజీ ప్రాజెక్ట్స్ ను లైన్ లో పెట్టారు. అందులో ''పఠాన్'' కూడా ఒకటి. సిద్ధార్థ్ ఆనంద్ దర్శకత్వంలో ఈ యాక్షన్ థ్రిల్లర్ తెరకెక్కుతోంది. ఇందులో దీపికా పడుకునే హీరోయిన్ గా నటిస్తుండగా.. జాన్ అబ్రహాం కీలక పాత్ర పోషిస్తున్నాడు. యష్ రాజ్ ఫిల్మ్స్ బ్యానర్ లోనే అత్యధిక బడ్జెట్ తో ఆదిత్య చోప్రా ఈ ప్రాజెక్ట్ ని నిర్మిస్తున్నారు.

''పఠాన్'' సినిమాని 2023 రిపబ్లిక్ డే స్పెషల్ గా జనవరి 25న రిలీజ్ చేయనున్నట్లు మేకర్స్ ఇదివరకే ప్రకటించారు. హిందీతో పాటుగా తెలుగు తమిళ భాషల్లోనూ విడుదల కానుంది. ఇప్పటికే తెలుగు టైటిల్ పోస్టర్ ని కూడా ఆవిష్కరించారు. అయితే ఈ సినిమా టీజర్ కోసం అభిమానులు ఉత్సాహంగా ఎదురు చూస్తున్నారు. లేటెస్ట్ బజ్ ఏంటంటే షారూఖ్ ఖాన్ పుట్టినరోజు సందర్భంగా ఈ టీజర్ ను లాంచ్ చేస్తారని తెలుస్తోంది.

నవంబర్ 2న 'పఠాన్' టీజర్‌ ను విడుదల చేయాలని మేకర్స్ నిర్ణయించుకున్నారని అంటున్నారు. దీనిపై చిత్ర బృందం నుంచి అధికారిక ప్రకటన రావాల్సి ఉంది. ఇకపోతే ఈ సినిమాలో సల్మాన్ ఖాన్ - హృతిక్ రోషన్ లు స్పెషల్ అప్పీరియరెన్స్ ఇవ్వనున్నట్లు టాక్ వినిపిస్తోంది. ఏదేమైనా ఈ మూవీతో షారుక్ ఖాన్ భారీ విజయాన్ని అందుకొని తిరిగి ఫార్మ్ లోకి రావాలని అభిమానులు ఆశిస్తున్నారు.

'పఠాన్' తర్వాత కోలీవుడ్ డైరెక్టర్ అట్లీ దర్శకత్వంలో షారుఖ్ ఖాన్ ''జవాన్'' అనే యాక్షన్ థ్రిల్లర్ మూవీ చేస్తున్నారు. ఇందులో లేడీ సూపర్ స్టార్ నయనతార హీరోయిన్ గా నటిస్తోంది. మక్కల్ సెల్వన్ విజయ్ సేతుపతి విలన్ గా నటిస్తుండగా.. ప్రియమణి - సాన్యా మల్హోత్రా కీలక పాత్రలు పోషిస్తున్నారు. దీపికా పడుకునే ఫ్లాష్ బ్యాక్ ఎపిసోడ్ లో షారూక్ భార్యగా కనిపించనుంది.

రెడ్‌ చిల్లీస్‌ ఎంటర్‌టైన్‌మెంట్‌ బ్యానర్‌ పై షారుక్ సతీమణి గౌరీఖాన్‌ నిర్మిస్తున్న 'జవాన్' చిత్రాన్ని 2023 జూన్ 2న విడుదల చేయనున్నట్లు మేకర్స్ అధికారికంగా ప్రకటించారు. పాన్ ఇండియా స్థాయిలో తెలుగు, తమిళం, మలయాళం, కన్నడ, హిందీ భాషల్లో రిలీజ్ చేయనున్నట్లు పేర్కొన్నారు. దీని తర్వాత బాలీవుడ్ స్టార్ డైరెక్టర్ రాజ్ కుమార్ హిరానీ దర్శకత్వంలో షారుఖ్ 'డంకీ' అనే సినిమా చేయనున్న సంగతి తెలిసిందే.

ఇదిలా ఉంటే ఓర్మ్యాక్ మీడియా నివేదిక ప్రకారం హిందీ ప్రేక్షకులు ఆసక్తిగా ఎదురు చూస్తున్న చిత్రాల జాబితాలో 'పఠాన్' రెండో స్థానంలో నిలిచింది. అల్లు అర్జున్ 'పుష్ప 2' సినిమా ఫస్ట్ ప్లేస్ లో ఉండగా.. ఆ తర్వాత 'పఠాన్' - 'టైగర్' సినిమాలు ఉన్నాయి. ఇదే లిస్టులో 'జవాన్' - 'డంకీ' చిత్రాలు కూడా ఉండటం గమనార్హం. టాప్-5 లో మూడు సినిమాలు సూపర్ స్టార్ షారుక్ ఖాన్ నటించినవే ఉన్నాయంటే.. అతన్ని సిల్వర్ స్క్రీన్ మీద చూడటానికి ఆడియన్స్ ఎంతో ఆసక్తిగా ఎదురు చూస్తున్నట్లు అర్థమవుతోంది. మరి బాద్ షా అంచనాలను అందుకొని మళ్ళీ ట్రాక్ లోకి వస్తాడేమో చూడాలి.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.