ఆచార్య విషయంలో ఆ హీరో సెంటిమెంట్ వర్కౌట్ అవుతుందా..?

టాలీవుడ్ క్రేజీ సినిమాలలో ఒకటి ఆచార్య. మెగాపవర్ స్టార్ రాంచరణ్ నిర్మాతగా మెగాస్టార్ చిరంజీవి హీరోగా తెరకెక్కుతున్న ఈ సినిమాను స్టార్ డైరెక్టర్ కొరటాల శివ రూపొందిస్తున్నాడు. రాజకీయ అంశాలతో సామాజిక అంశాలను కూడా జోడించి మంచి కమర్షియల్ ఎంటర్టైనర్ కొరటాల రెడీ చేస్తున్నాడని అభిమానులు ఉత్సాహంగా ఉన్నారు. వరుస హిట్లలో ఉన్న కొరటాలతో మెగాస్టార్ సినిమా అనేసరికి ప్రేక్షకులలో అంచనాలు ఎక్కడో ఉంటాయి. పైగా 12ఏళ్ళ తర్వాత మణిశర్మ మెగాస్టార్ సినిమాకి సంగీతం అందిస్తున్నాడు. అంతేగాక రాంచరణ్ నిర్మాతగా వ్యవహరిస్తూనే ఇందులో ఓ మంచి పాత్ర చేస్తున్న విషయం తెలిసిందే. ఇన్ని ప్రత్యేకతలతో రూపుదిద్దుకుంటున్న ఆచార్య.. మరి ఎప్పుడు రిలీజ్ అవుతుంది? అనేది మాత్రం ఇంతకాలం ప్రశ్నగానే మిగిలిపోయింది. మరి ఈ ప్రశ్నకు రాంచరణ్ ఏదైనా సమాధానం ఇవ్వనున్నాడా..? అంటే ప్రస్తుతం ఇండస్ట్రీలో రంగస్థలం టాపిక్ బయటికి వచ్చింది.

మ్యాట్నీ ఎంటర్టైన్మెంట్ వారితో సంయుక్తంగా రాంచరణ్ నిర్మిస్తుండటంతో.. రాంచరణ్ కూడా నిర్మాణంలో భాగం అవ్వడంతో ఈ సినిమాను వచ్చే ఏడాది మార్చి 28న విడుదల చేయనున్నాడని టాక్ వినిపిస్తుంది. ఎందుకంటే.. రాంచరణ్, సమంత హీరోహీరోయిన్లుగా స్టైలిష్ డైరెక్టర్ సుకుమార్ తెరకెక్కించిన బ్లాక్ బస్టర్ సినిమా రంగస్థలం. 2018 మార్చ్ 28న విడుదలైన ఈ సినిమా.. స్టార్ హీరో రాంచరణ్, హీరోయిన్ సమంత కెరీర్ లోనే భారీ హిట్టుగా నిలిచింది. అటు కలెక్షన్స్ పరంగాను ఇటు అవార్డుల పరంగాను రికార్డులు సృష్టించింది. ఈ సినిమాలో సౌండ్ ఇంజనీర్ చిట్టిబాబుగా రాంచరణ్.. రామలక్ష్మిగా సమంత నటనకు ప్రశంసలు దక్కించుకున్నారు. రెండేళ్ల కిందట అదే రోజు రంగస్థలం విడుదలై భారీ హిట్ అందుకొని రికార్డు కలెక్షన్స్ రాబట్టుకుంది. ఇక మెగాస్టార్ సినిమాకి కూడా రాంచరణ్ అదే సెంటిమెంట్ ఫాలో అవుతాడేమో అని సినీ వర్గాలలో చర్చలు నడుస్తున్నాయి. మరి అసలు విషయం తెలియాలంటే కొంతకాలం వెయిట్ చేయాల్సిందే.