'బాలయ్య - బోయపాటి' కాంబో ఈ భామకి బ్రేక్ ఇస్తుందా..??

సింహా, లెజెండ్‌ లాంటి భారీ విజయాల తర్వాత డైరెక్టర్ బోయపాటి శీను, నటసింహం బాలకృష్ణ కాంబినేషన్ లో మూడో సినిమా తెరకెక్కుతున్న సంగతి తెలిసిందే. ఇప్పటికే బాలయ్య ఫస్ట్ లుక్ టీజర్ చూసేసరికి నందమూరి అభిమానులలో ఈ సినిమా పై భారీ అంచనాలు నెలకొన్నాయి. అయితే బిబి3 సినిమాను మిర్యాల రవీందర్ రెడ్డి నిర్మిస్తుండగా.. తమన్ రెండోసారి బాలయ్య మూవీకి సంగీతం అందిస్తున్నాడు. ఈ సినిమాలో బాలయ్య రెండు విభిన్నమైన పాత్రలో కనిపించనున్నట్టు తెలుస్తోంది. ఇక ఈ సినిమా బాలయ్య 106వ సినిమాగా రూపొందుతుంది. తాజాగా బాలయ్య - బోయపాటి సినిమాల గురించి ఒక వార్త సోషల్ మీడియాలో హల్చల్ చేస్తోంది. అదేంటంటే.. ఈ సినిమా మొదటి నుండి కొత్త హీరోయిన్ని పరిచయం చేస్తాం అంటూ చెప్పుకొచ్చారు మేకర్స్. చివరికి బాలయ్య పక్కన కంచె హీరోయిన్ ప్రగ్యా జైస్వాల్ ని ఖరారు చేశారు.

ఈ భామ ఇదివరకు తెలుగులో పలు సినిమాలు చేసింది. కానీ కెరీర్ పరంగా హిట్స్ లేకుండా పోయింది. ఇంతకుముందు బాలయ్య పక్కన నటించడానికి ప్రస్తుత హీరోయిన్స్ ఎవరూ ముందుకు రావడం లేదని వార్తలొచ్చాయి. ఆఖరికి ప్రగ్యాను ఫైనల్ చేస్తూ అధికారికంగా ప్రకటించారు దర్శకనిర్మాతలు. ఇక హీరోయిన్ విషయానికి వస్తే.. ఈ భామ కుర్రహీరోలతో పాటు సీనియర్ హీరో కింగ్ నాగార్జున సరసన 'నమో వెంకటేశాయ' సినిమా చేసింది. అయితే భక్తి సినిమా అయినప్పటికీ అందులో కాస్త గ్లామర్ పాత్రే చేసింది ప్రగ్యా. కానీ ఎలాంటి గుర్తింపు దక్కలేదు. నిజానికి ప్రగ్యా చేసిన నక్షత్రం, జయజానకి నాయక, గుంటూరోడు, ఆచారి అమెరికా యాత్ర ఇలా అన్ని ఆమెకు గుర్తింపు తేలేకపోయాయి. జయజానకి నాయకలో సైడ్ క్యారెక్టర్ ఇచ్చిన బోయపాటి ఇందులో లీడ్ రోల్ ఇచ్చాడు. అమ్మడి చేతిలో తెలుగు మూవీ ఇదొక్కటే. అందుకే బాలయ్య మీద చాలా ఆశలు పెట్టుకుందట. చూడాలి మరి కింగ్ నాగ్ ఇవ్వలేని సక్సెస్ బాలయ్య ఇస్తాడేమో అంటున్నారు నెటిజన్లు.