ఇతర హీరోలు రిజెక్ట్ చేసిన కథలతో యువ హీరో హిట్లు కొడతాడా..?

సినీ ఇండస్ట్రీలో ఒక హీరో చేయాల్సిన సినిమా మరొకరి వద్దకు వెళ్లడం.. ఒక హీరోయిన్ చేయాల్సిన పాత్రను మరొకరు చేయడం వంటివి సర్వసాధారణం. కథ నచ్చకో.. డేట్స్ కుదరకో వచ్చిన ఆఫర్‌ ని రిజెక్ట్ చేస్తుంటారు కొందరు నటీనటులు. తాము ఆ సినిమాకు లేదా ఆ పాత్రకు సరిపోమని చెబుతూ సున్నితంగా తిరస్కరిస్తుంటారు మరికొందరు. అయితే ఒకరు రిజెక్ట్ చేసిన కథలు కొన్నిసార్లు సక్సెస్ అందిస్తే.. మరికొన్ని చేదు అనుభవాన్ని మిగులుస్తుంటాయి.

నిజానికి ఇతర స్టార్ హీరోలు తిరస్కరించిన స్క్రిప్ట్‌ లను.. కొంతకాలం ట్రావెల్ చేసి మధ్యలో వదిలేసిన సినిమాలను మరో హీరో ఎంచుకోవడం అనేది మాములు విషయం కాదు. కానీ ఇటీవల కాలంలో టాలీవుడ్ లో యంగ్ హీరో ఒకరు వరుసగా వేరే హీరోలు వద్దనుకున్న సినిమాలనే టేకాఫ్ చేస్తూ వస్తున్నాడు. కథ నచ్చే చేస్తున్నాడో.. ఏదొక విధంగా డైరెక్టర్స్ అతన్ని ఒప్పిస్తున్నారో తెలియదు కానీ.. అన్నీ అలాంటి కథలకే హీరో గ్రీన్ సిగ్నల్ ఇస్తున్నాడు.

కెరీర్ ప్రారంభంలో సపోర్టింగ్ రోల్స్ చేస్తూ వచ్చిన అతను.. తర్వాత రోజుల్లో కథానాయకుడిగా మారి తనకంటూ ప్రత్యేకమైన గుర్తింపు తెచ్చుకున్నాడు. రెండు సినిమాలు బ్యాక్ టూ బ్యాక్ బ్లాక్ బస్టర్స్ అవ్వడంతో ఒక్కసారిగా భారీ ఫాలోయింగ్ ఏర్పడింది. అయితే దీన్ని కాపాడుకునే క్రమంలో కొన్ని తప్పటడుగులు వేసాడు. వైవిధ్యమైన సినిమాలు చేయాలనుకుని కొన్ని రాంగ్ స్క్రిప్ట్స్ సెలెక్ట్ చేసుకున్నాడు. అవి కూడా వేరే హీరోలు పక్కన పెట్టినవి కావడం గమనార్హం.

యువ హీరో ఇటీవల ఓ స్టార్ డైరెక్టర్ తో చేసిన భారీ ప్రాజెక్ట్.. బాక్సాఫీస్ వద్ద పరాజయం చవిచూసింది. అంచనాలను అందుకోలేకపోవడమే కాదు.. సోషల్ మీడియాలో ట్రోల్స్ ఎదుర్కొనేలా చేసింది. వాస్తవానికి ఆ దర్శకుడు ఈ కథని మరో హీరో కోసం రెడీ చేసాడు. అతను రిజెక్ట్ చేయడంతో మరో స్టార్ హీరో దగ్గరకు వెళ్ళాడు. అక్కడ కూడా తిరస్కరణ ఎదురవ్వడంతో.. కొన్నేళ్ల తర్వాత ఆ స్క్రిప్ట్ మన హీరో వద్దకు చేరింది. దీని కోసం ఎంత కష్టపడినా, ఆశించిన ఫలితం మాత్రం దక్కలేదు.

యాదృచ్ఛికంగా అదే దర్శకుడితో హీరో సెట్స్ మీదకు తీసుకొచ్చిన మరో సినిమా కూడా ఓ అగ్ర కథానాయకుడు తిరస్కరించిందే. కాకపోతే ప్రస్తుతానికి ఆ ప్రాజెక్ట్ ని పూర్తిగా పక్కన పెట్టేసినట్లు తెలుస్తోంది. గత రెండు చిత్రాలు నిరాశ పరచడంతో యువ హీరో ప్రస్తుతం నటిస్తున్న సినిమాపైనే ఆశలన్నీ పెట్టుకున్నాడు. అయితే ఈ స్క్రిప్ట్ కూడా ఆయన కోసం ప్రత్యేకంగా సిద్ధం చేయలేదు. ముందుగా డైరెక్టర్ ఇంకో హీరో కోసం కథ రాసుకుంటే.. ఆ తర్వాత ఇక్కడికి వచ్చి చేరిందని తెలుస్తోంది.

ఇకపోతే గత కొన్ని రోజులుగా యంగ్ హీరో ఓ టాలెంటెడ్ డైరెక్టర్ తో వర్క్ చేయనున్నట్లు వార్తలు వస్తున్నాయి. అయితే ఇది కూడా అతన్ని దృష్టిలో ఉంచుకుని రూపొందించిన స్క్రిప్ట్ కాదని నివేదికలు ఉన్నాయి. దర్శకుడు గతంలో ఓ స్టార్ హీరోతో కలిసి పనిచేయడానికి స్క్రిప్ట్‌ ను రెడీ చేసుకున్నాడు. కానీ అతను ఈ ప్రాజెక్ట్‌ ను పక్కన పెట్టాడని రూమర్స్ వస్తుండగా.. అదే కథను ఇప్పుడు కుర్ర హీరో వద్దకు తీసుకున్నట్లు పుకార్లు పుట్టుకొస్తున్నాయి.

ఇప్పటికైతే ఈ ప్రాజెక్ట్ ఇంకా ధృవీకరించబడలేదు. ప్రస్తుతం చర్చల దశలోనే ఉందని అంటున్నారు. ఏదేమైనా ఇండస్ట్రీలో తిరస్కరించబడిన కథలకు యువ హీరో కేరాఫ్ అడ్రెస్ గా మారాడని కామెంట్స్ వినిపిస్తున్నాయి. నిజానికి ఒక హీరో రిజెక్ట్ చేసిన స్క్రిప్ట్స్ మరో హీరోకి బ్లాక్ బస్టర్స్ అందించిన సందర్భాలు చాలా ఉన్నాయి. అంతెందుకు సదరు హీరో వద్దనుకున్న సినిమాలు చాలా సూపర్ హిట్లు అయ్యాయి. మరి ఇప్పుడు చేస్తున్న ప్రాజెక్ట్స్ ఎలాంటి అనుభవాన్ని మిగులుస్తాయో చూడాలి.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.