వెంకీ గాలి చైతు తట్టుకోగలడా ?

ఆ మధ్య కొన్నాళ్ళు తన రేంజ్ సక్సెస్ లేక గురు లాంటి అబోవ్ యావరేజ్ హిట్ తో నెట్టుకొచ్చిన విక్టరీ వెంకటేష్ చాలా కాలం తర్వాత ఎఫ్2 రూపంలో ఇండస్ట్రీ హిట్ అందుకున్నాడు. తనను సరైన రీతిలో వాడుకోవాలే కాని కేవలం కామెడీ టైమింగ్ తోనే అదరగొట్టగలనని ఎఫ్2తో ప్రూవ్ చేసేశాడు. ఎవరు ఒప్పుకున్నా ఒప్పుకోకపోయినా ఎఫ్2 లాంటి యావరేజ్ ఎంటర్ టైనర్ అంత భారీ స్థాయిలో బ్లాక్ బస్టర్ కావడానికి ఒకే ఒక్క కారణం వెంకీ.

ఇప్పటికీ ఆ సినిమా మరోసారి చూడాలనిపిస్తుందంటే కనిపించే కారణం కూడా వెంకీనే. అందుకే వరుణ్ తేజ్ సైతం ఎఫ్2 నాది అని గట్టిగా చెప్పుకోలేని పరిస్థితి. సీనియర్ల డామినేషన్ ఉంటే అదే పరిస్థితి ఉండటం సహజం. ఇప్పుడు నిర్మాణంలో ఉన్న వెంకీ మామ కూడా ఇదే దారిలో ఉన్నట్టు ఇన్ సైడ్ టాక్ ఉంది. నిజ జీవితంలో మామ అల్లుడు అయిన వెంకటేష్ నాగ చైతన్య మొదటిసారి కలిసి నటిస్తున్న వెంకీ మామ షూటింగ్ ప్రస్తుతం కీలక దశలో ఉంది. ఇంకో నెలల పూర్తయ్యే అవకాశం ఉంది.

స్పాట్ నుంచి వస్తున్న సమాచారం మేరకు వెంకీ తనకు తెలియకుండానే చైతుని ప్రతి ఫ్రేమ్ లో ఓవర్ టేక్ చేస్తున్నాడట. తనకు ధీటుగా చేసే ప్రయత్నం చైతు చేస్తున్నప్పటికీ వయసు అనుభవం చాలా తక్కువగా ఉండటంతో కొన్నిసార్లు చూస్తూ ఉండటం తప్ప ఏమి చేయలేని పరిస్థితి. అసలే మేనమామాయే. గట్టిగా అడగనూ లేడు. ఇది అంతర్గతంగా వినిపిస్తున్న టాక్. నిజమో కాదో కానీ కొట్టిపారేయలేని విషయమైతే ఇందులో ఉంది. అక్టోబర్ కు ప్లాన్ చేసిన వెంకీ మామ రిలీజ్ డేట్ ఇంకా ఫిక్స్ చేయలేదు. సైరా అదే నెల 2కు వస్తుందా రాదా అనే దాన్ని బట్టి నిర్ణయం తీసుకోనున్నారట