వింక్ గాళ్ స‌డెన్ ట్విస్టిచ్చిందిగా

ఓవ‌ర్ నైట్ సెన్సేష‌న్.. వింక్ గాళ్‌ ప్రియా ప్ర‌కాష్ వారియ‌ర్ ఏమైన‌ట్టు? ఇంత‌కీ ఏం చేస్తోంది? అంటే ఇటీవ‌ల స‌రైన సౌండే లేదు. `ఒరు ఆధార్ లవ్` (ల‌వ‌ర్స్ డే) చిత్రంతో ఓవ‌ర్ నైట్ స్టార్ అయిపోయింది. ఆ త‌ర్వాత శ్రీ‌దేవి బంగ్లా అంటూ హ‌డావుడి చేసింది. ఆ సినిమా టీజ‌ర్ .. పోస్ట‌ర్లు వివాదాస్ప‌దం అయ్యాయి. ప్రశాంత్‌ మాంబుల్లి దర్శకత్వంలో తెరకెక్కిన ఈ చిత్రంలో శ్రీదేవి అనే నటి పాత్రలో వింక్ గాళ్ న‌టించింది. ఇప్పటికే విడుదలైన ట్రైలర్‌లో ప్రియ బాత్ టబ్ లో పడి ఉన్న సీన్ చూపించడంతో.. ఈ సినిమా శ్రీదేవి మరణం నేపథ్యంతో రూపొందించారన్న భావన కలిగింది. దీనిపై బోనీ కపూర్‌ కూడా చిత్ర బృందానికి నోటీసులు పంపారు. అటుపై ఈ మూవీ వివాదాలమ‌యం అయ్యింది. ఇక ఇటీవ‌ల ఈ మూవీ గురించి చ‌డీ చ‌ప్పుడు లేనే లేదు.

ఈలోగానే ప్రియా వేరే సినిమాల‌తో బిజీ అయ్యింది. తాజాగా కుడిపూడి విజయ్ కుమార్ దర్శకత్వం వహించనున్న ఓ బ‌హుభాషా చిత్రంలో ప్రియా న‌టించ‌నుంది. ఇదో సైకలాజికల్ క్రైమ్ థ్రిల్లర్. ప్రియా ప్రధాన పాత్రధారి. బాబీ సింహా - వివేక్ ఒబెరాయ్ వంటి స్టార్ల‌ను క‌థానాయ‌కులుగా న‌టించాల్సిందిగా ద‌ర్శ‌క‌నిర్మాత‌లు సంప్రదించారు. అయితే ఆ ఇద్ద‌రి నుంచి ఇంకా అంగీకారం రాలేద‌ట‌. ఈ సినిమాని తెలుగు- హిందీ - కన్నడ - తమిళ భాషల్లో పాన్ ఇండియా రిలీజ్ చేయాల‌న్న‌ది ప్లాన్.

తాజా చిత్రంలో ప్రియా పాత్ర ఎలా ఉంటుంది? అంటే ఆస‌క్తిక‌ర సంగ‌తులే చెప్పాడు. `ఒరు అధర్ లవ్` తో పోలిస్తే అందులో ప్రియా కాలేజీ అమ్మాయిగా నటించింది. శ్రీదేవి బంగ్లాలో పూర్తిగా పరిణతి చెందిన అమ్మాయిగా క‌నిపిస్తుంది. న‌టిగా త‌న‌ని మ‌రో స్థాయిలో చూపించే సినిమా చేస్తున్నానని విజ‌య్ తెలిపారు. షూటింగ్ జూన్ లో ప్రారంభించి పూర్తిగా బ్రిట‌న్ లో చిత్రీకరిస్తారు. ఇక ఇందులో సుబ్బరాజు (బాహుబలి ఫేమ్)- ఈశ్వరి (కాలా ఫేమ్, మధునాంధన్- సోను సూద్- నాజర్ - మురళీ శర్మ- దేవరాజ్ తదితరులు న‌టిస్తున్నారు. ఈ మూవీకి సంబంధించిన అధికారిక ప్ర‌క‌ట‌న రావాల్సి ఉంది.