ధనుష్ టాలీవుడ్ ఎంట్రీ ఏ దర్శకుడితో ఉంటుందో..?

డబ్బింగ్ సినిమాలతో తెలుగు ప్రేక్షకులను అలరించిన కోలీవుడ్ స్టార్ హీరో ధనుష్.. స్ట్రెయిట్ తెలుగు మూవీతో టాలీవుడ్ లో ఎంట్రీ ఇవ్వనున్న సంగతి తెలిసిందే. సెన్సిబుల్ డైరెక్టర్ శేఖర్ కమ్ముల దర్శకత్వంలో ధనుష్ హీరోగా ఓ థ్రిల్లర్ మూవీకి అధికారిక ప్రకటన కూడా వచ్చింది. ఏషియన్ సోనాలి నారంగ్ సమర్పణలో శ్రీ వెంకటేశ్వర సినిమాస్ బ్యానర్ పై నారాయణ్ దాస్ నారంగ్ - పి. రామ్మోహన్ రావు ఈ చిత్రాన్ని నిర్మించనున్నారు.

ఇది తెలుగు తమిళ హిందీ భాషల్లో భారీ స్థాయిలో రూపొందే మల్టీలాంగ్వేజ్ ఫిల్మ్ అని మేకర్స్ తెలిపారు. సెట్స్ మీదకు వెళ్ళే కచ్చితమైన సమయం చెప్పలేదు కానీ.. త్వరలోనే షూటింగ్ ప్రారంభిస్తామని పేర్కొన్నారు. అయితే ఇప్పుడు శేఖర్ కమ్ముల సినిమా కంటే ముందుగా మరో డైరెక్టర్ తో ధనుష్ తెలుగు డెబ్యూ ఉండే అవకాశం ఉందని వార్తలు వస్తున్నాయి.

ఒక సినిమా షూటింగ్ దశలో ఉండగానే మరో చిత్రాన్ని సెట్స్ మీదకు తీసుకెళ్తుంటారు ధనుష్. ప్రస్తుతం అర డజనుకు పైగా సినిమాలతో బిజీగా ఉన్నారు. ఇప్పటికే బాలీవుడ్ లో 'అత్రాంగి రే'.. హాలీవుడ్ లో 'ది గ్రే మ్యాన్'.. తమిళ్ లో 'మారన్' సినిమాల షూటింగ్స్ పూర్తి చేశారు. ప్రస్తుతం మిత్రన్ కె జవహర్ దర్శకత్వంలో 'తిరుచిత్రంబలం'.. సోదరుడు సెల్వ రాఘవన్ తో 'నానే వరువేన్' చిత్రాల షూటింగ్స్ లో పాల్గొంటున్నారు ధనుష్.

ఇక 'కర్ణన్' ఫేమ్ మారి సెల్వరాజ్ తో ధనుష్ మరో సినిమా చేయనున్నట్లు ప్రకటించారు. రెండేళ్ల తర్వాత సెల్వ రాఘవన్ తో 'యుగానికొక్కడు 2' మూవీ చేయాల్సి ఉంది. ప్రస్తుతం ధనుష్ నటిస్తున్న రెండు సినిమాల చిత్రీకరణ పూర్తైన వెంటనే శేఖర్ కమ్ముల ప్రాజెక్ట్స్ సెట్స్ మీదకు వెళ్తుందని అందరూ భావిస్తున్నారు. అయితే అప్పటి లోపు కమ్ముల స్క్రిప్ట్ రెడీ చేయకపోతే ధనుష్ మరో చిత్రాన్ని మొదలు పెట్టే ఛాన్స్ ఉంది.

పని విషయంలో శేఖర్ కమ్ముల - ధనుష్ ఇద్దరివీ భిన్న దృవాలనే చెప్పాలి. ఒకరు స్లో అండ్ స్టడీగా వెళ్తే.. మరొకరు గ్యాప్ లేకుండా జెట్ స్పీడ్ తో సినిమాలు చేస్తుంటారు. 'లవ్ స్టోరీ' సినిమా తర్వాత శేఖర్.. ధనుష్ స్క్రిప్ట్ మీదే కూర్చున్నారు. కాకపోతే అన్నీ పర్ఫెక్ట్ గా కుదిరితే కానీ సెన్సిబుల్ డైరెక్టర్ సినిమాని స్టార్ట్ చేయరనే సంగతి తెలిసిందే. ధనుష్ ప్రస్తుతం చేస్తున్న సినిమాలు కంప్లీట్ అయ్యే సమయానికి స్క్రిప్ట్ రెడీ అయితే సరే. లేకపోతే ధనుష్ మరో సినిమాతో తెలుగులో అడుగుపెట్టే అవకాశం ఉందని అంటున్నారు.

'మిస్టర్ మజ్ను' ఫేమ్ వెంకీ అట్లూరి దర్శకత్వంలో ధనుష్ ఓ సినిమా చేస్తారని.. సితార ఎంటర్టైన్మెంట్స్ బ్యానర్ లో ఈ ప్రాజెక్ట్ రూపొందుతుందని చాలా రోజుల క్రితమే వార్తలు వచ్చాయి. 'రంగ్ దే' తర్వాత వెంకీ ఇదే స్క్రిప్ట్ మీద వర్క్ చేస్తున్నారట. ఒకవేళ శేఖర్ కమ్ముల స్క్రిప్ట్ లేట్ అయితే మాత్రం.. అట్లూరి వెంకీ సినిమాతో ధనుష్ టాలీవుడ్ ఎంట్రీ ఉండొచ్చని అంటున్నారు. మరి రాబోయే రోజుల్లో ఏం జరుగుతుందో చూడాలి.

ధనుష్ టాలీవుడ్ లో ఎప్పుడు అడుగుపెట్టినా సాలిడ్ ఇంపాక్ట్ ఉంటుందని సినీ అభిమానులు భావిస్తున్నారు. ఎందుకంటే ధనుష్ డబ్బింగ్ సినిమాలతో తెలుగు హీరోలకు పోటీగా మార్కెట్ ని క్రియట్ చేసుకున్నారు. ఈ క్రమంలో ఎప్పటి నుంచో స్ట్రెయిట్ తెలుగు సినిమా చేయాలని చూస్తున్నారు. అది ఇన్నాళ్లకు కార్యరూపం దాల్చబోతోంది. వచ్చే ఏడాది ధనుష్ తెలుగు సినిమా ఉండే అవకాశం ఉంది.