'యమలీల' మహేష్‌ కోసం చేశారు : అలీ

బాల నటుడిగా, కమెడియన్‌ గా, హీరోగా, హోస్ట్‌ గా ఇలా ఎన్నో రకాలుగా అలరిస్తూ వస్తున్న అలీ తన సినీ జీవితంలో 40 సంవత్సరాలను పూర్తి చేసుకున్నాడు. ఈ సందర్బంగా ఏపీ ప్రభుత్వం ఆధ్వర్యంలో అలీకి ఘన సన్మానం నిర్వహించారు. ఆ కార్యక్రమంలో అలీ మాట్లాడుతూ తన కెరీర్‌ ప్రస్థానంను, కీలక ఘట్టాలను ప్రస్థావించడం జరిగింది. ఆ సందర్బంగా అలీ మాట్లాడుతూ తనకు హీరోగా మంచి క్రేజ్‌ తీసుకు వచ్చిన 'యమలీల' చిత్రం గురించి కీలక వ్యాఖ్యలు చేశాడు.

ఎస్వీ కృష్ణారెడ్డి గారు 'యమలీల' చిత్రం కథను మహేష్‌ బాబును దృష్టిలో పెట్టుకుని తయారు చేశారు. ఒకసారి విమానంలో కృష్ణగారికి యమలీల కథను చెప్పడం జరిగిందట. కథ బాగా నచ్చిన కృష్ణ గారు ప్రస్తుతానికి మహేష్‌ ను హీరోగా పరిచయం చేసే ఉద్దేశ్యం లేదని చెప్పారట. అయిదు సంవత్సరాల తర్వాత చదువు పూర్తి చేసి అప్పుడు సినిమాల్లోకి తీసుకు వస్తానంటూ చెప్పాడట. అప్పటి వరకు వెయిట్‌ చేయడం ఇష్టం లేని రెడ్డి గారు తనతో సినిమాను చేయాలనుకున్నారు.

కమెడియన్‌ గా అప్పుడు నేను సినిమాలు చేస్తున్నాను. నన్ను హీరోగా పెట్టి సినిమా చేయడం ఏంటని చాలా మంది ఆయనతో అన్నారు. కాని ఈ కథకు నేను అయితే తప్పకుండా న్యాయం చేస్తానని ఆయన భావించారు. ఆయనకు దర్శకుడిగా ఉన్న క్రేజ్‌ కూడా పోతుందని కొందరు హెచ్చరించారట. అయినా కూడా ఆయన మరో ఆలోచన లేకుండా యమలీల నాతో తీశారు. ఆ సినిమా నాకు ఆయనకు ఇద్దరికి కూడా మంచి గుర్తింపును తెచ్చిందని అలీ చెప్పుకొచ్చాడు. ఒకవేళ యమలీల సినిమా మహేష్ బాబు చేసి ఉంటే పరిస్తితి ఎలా ఉండేదో..!