ఐష్ బదులు అమీ అంతే : వీడియో సాంగ్

ఇంకో నాలుగు రోజులు గడిస్తే భారతదేశపు అత్యంత ఖరీదైన సినిమాగా రూపొందిన 2.0 ధియేటర్ల అడుగు పెడుతోంది. ఇప్పటికే అన్ని బాషల్లోనూ అడ్వాన్సు బుకింగ్ ఫుల్ స్వింగ్ లో ఉంది. పబ్లిసిటీ మరీ భారీగా చేయకపోయినా సినిమాకున్న క్రేజ్ దృష్ట్యా ఓపెనింగ్స్ విషయంలో కొత్త రికార్డులు నమోదు కావడం ఖాయంగా కనిపిస్తోంది. అయితే ఇప్పటి దాకా కేవలం ఒక ట్రైలర్ తో సరిపెట్టిన లైకా సంస్థ తాజాగా వీడియో సాంగ్ ని ప్రోమో రూపంలో రిలీజ్ చేసింది.

మాములుగా ఒక నిమిషం ఉండే వీడియో ప్రోమోలకు భిన్నంగా ఇది ఏకంగా 2 నిమిషాల 38 సెకండ్లు ఉండటం విశేషం. అంటే దాదాపు పూర్తి పాట వదిలినట్టే. ఇక దీని విషయానికి వస్తే యంత్ర లోకపు సుందరివే అంటూ సాగే ఈ పాటలో రజని ఎప్పటి లాగే రోబో గెటప్ లో ఉండగా అమీ జాక్సన్ సైతం అదే తరహలో విచిత్రమైన హెయిర్ స్టైల్ తో డ్రెసింగ్ తో వెరైటీగా ఉంది. స్టెప్స్ ఎక్కువ లేకుండా మొక్కుబడిగా లాగించారు కాని సెట్స్ మాత్రం అదిరిపోయాయి. శంకర్ కు మాత్రమే సాధ్యం అనిపించేలా అబ్బురపరిచే భారీతనంతో పాటను షూట్ చేసారు.

కాకపోతే పాట ట్యూన్-చిత్రీకరించిన విధానం చూస్తే రోబో ఫస్ట్ పార్ట్ తరహాలోనే అనిపించడం సహజం. కాకపోతే అక్కడ ఐశ్వర్య రాయ్ ఇక్కడ అమీ జాక్సన్ అంతే తేడా. మిగిలినదంతా సేమ్ టు సేమ్ అనిపిస్తుంది. రోబోలో సూపర్ హిట్ సాంగ్ అరిమా అరిమా లుక్ ఈ పాట విజువల్స్ ఉండగా ట్యూన్ కూడా అందులో ఫస్ట్ వచ్చే యంత్రుడా తరహాలోనే అనిపిస్తుంది. సీక్వెల్ కాబట్టి ఈ మాత్రం పోలికలు సహజమే అనుకుని అభిమానులు సర్దిపుచ్చుకుంటున్నారు. గురువారం తెల్లవారుఝామున నుంచే 2.0 రచ్చ ఓ రేంజ్ లో ఉండబోతోంది.