హైదరాబాద్ లో అడుగుపెట్టిన కన్నడ రాకింగ్ స్టార్..!

కన్నడ రాకింగ్ స్టార్ యష్ - ప్రశాంత్‌ నీల్‌ కాంబినేషన్ లో తెరకెక్కుతున్న పాన్ ఇండియా మూవీ 'కేజీఎఫ్‌ 2'. హోంబేల్ ఫిల్మ్స్ బ్యానర్ పై విజయ్‌ కిరగందూర్‌ భారీ బడ్జెట్ తో ఈ చిత్రాన్ని నిర్మిస్తున్నారు. శ్రీనిధి శెట్టి హీరోయిన్ గా నటిస్తున్న ఈ మూవీలో అధీరా పాత్రలో సంజయ్‌ దత్‌ నటిస్తున్నాడు. బాలీవుడ్ నటి రవీనా టాండన్‌ కీలక పాత్రలో నటిస్తున్నారు. కోలార్ ఫీల్డ్ గ‌నుల నేపథ్యంలో ఈ చిత్రం రూపొందుతోంది. ఇప్పటికే మెజారిటీ భాగం షూటింగ్ జరుపుకున్న చాప్టర్ 2 కన్నడ, తెలుగు, తమిళ, హిందీ భాషల్లో విడుదల కానుంది. చాప్టర్-1 2018లో విడుదలై ఘన విజయం సాధించిన సంగతి తెలిసిందే. అత్యధిక కలెక్షన్స్ రాబట్టిన కన్నడ చిత్రంగా.. బాలీవుడ్ బాక్సాఫీస్‌ వద్ద సత్తా చాటిన సౌత్ ఇండియన్ సినిమాల్లో ఒకటిగా 'కేజీఎఫ్' నిలిచింది. ఇప్పుడు 'కేజీఎఫ్ 2' కోసం దేశ వ్యాప్తంగా సినీ అభిమానులు ఆసక్తిగా ఎదురుచూస్తున్నారు.

కోవిడ్ నేపథ్యంలో ఇటీవలే 'కేజీఎఫ్ 2' షూటింగ్ తిరిగి ప్రారంభమైంది. స్వల్ప విరామం అనంతం ఆఖరి షెడ్యూల్ హైదరాబాద్ లో ప్రారంభం కానుంది. దీని కోసం హీరో యష్ హైదరాబాద్ లో ల్యాండ్ అయ్యాడు. ఈరోజు నుంచే షూటింగ్ జరగనుందని సమాచారం. ఈ షెడ్యూల్ లో ప్రతినాయకుడు సంజయ్ దత్ కూడా పాల్గొననున్నాడు. శరవేగంగా చిత్రీకరణ జరిపి డిసెంబర్‌ చివరికల్లా సినిమా పూర్తి చేస్తారని తెలుస్తోంది. ఈ చిత్రానికి రవీ బాస్రుర్ సంగీతం అందిస్తున్నారు. 2021 సంక్రాంతికి 'కేజీఎఫ్ 2' చిత్రాన్ని ప్రేక్షకుల ముందుకు తీసుకురావాలని మేకర్స్ ప్లాన్ చేసుకుంటున్నారు.