సెలూన్ బిజినెస్ ని విస్తరిస్తున్న యువ హీరో..!

టాలీవుడ్ యువ హీరో సందీప్ కిషన్ సినిమాలతో పాటుగా వ్యాపార రంగంలో కూడా అడుగుపెట్టిన సంగతి తెలిసిందే. నిర్మాతగా మారి ఓ వైపు సినిమాలు నిర్మిస్తూనే మరోవైపు తన బిజినెస్ వ్యవహారాలు చూసుకుంటున్నారు. హైదరాబాద్ - సికింద్రాబాద్ జంట నగరాల్లో 'వివాహ భోజనంబు' పేరుతో రెస్టారెంట్లు నిర్వహిస్తున్నారు సందీప్. హోటల్ బిజినెస్ సక్సెస్ అవడంతో స్టైలిష్ రంగంలో ఎంటర్ అయ్యాడు.

స్టైలిష్ రంగంలో పేరొందిన క్యూబీఎస్ సెలూన్ ఫ్రాంచైజీని తీసుకున్న సందీప్ కిషన్.. ఆంధ్రప్రదేశ్ అమరావతిలో ఇప్పటికే సెలూన్ ప్రారంభించారు. తన వ్యాపారాన్ని విస్తరించే క్రమంలో విజయవాడలో ఈ నెల 5న మరో సెలూన్ ని స్టార్ట్ చేస్తున్నాడు యువ హీరో. రాబోయే రోజుల్లో సందీప్ ఈ సెలూన్స్ ని అన్ని ప్రాంతాల్లో ఓపెన్ చేయాలని భావిస్తున్నారట. ఏదేమైనా సందీప్ కిషన్ నటుడు, నిర్మాతగానే కాకుండా మంచి వ్యాపారవేత్త అని నిరూపించుకోవాలని చూస్తున్నారని తెలుస్తోంది.

ఇక సినిమాల విషయానికి వస్తే.. సందీప్ కిషన్ ఇటీవల అమెరికా తన సిల్వర్ జూబ్లీ మూవీ 'ఏ1 ఎక్స్‌ప్రెస్' తో పర్వలేదనిపించాడు. ప్రస్తుతం జి.నాగేశ్వరరెడ్డి దర్శకత్వంలో 'గల్లీ రౌడీ' సినిమా చేస్తున్నారు. ఇప్పటికే షూటింగ్ పూర్తి చేసుకున్న ఈ చిత్రాన్ని త్వరలోనే విడుదల చేయనున్నారు. అలానే వీఐ ఆనంద్‌ దర్శకత్వంలో సందీప్ కిషన్ ఓ సూప‌ర్ నేచుర‌ల్ ఫాంటసీ మూవీలో నటిస్తున్నాడు. ఇదే క్రమంలో సి.వి.కుమార్ తో కలసి 'మాయవన్' సీక్వెల్ సినిమా చేస్తున్నాడు. కమెడియన్ సత్య ని హీరోగా పరిచయం చేస్తూ సందీప్ నిర్మిస్తున్న 'వివాహ భోజనంబు' సినిమా రిలీజ్ కి రెడీ అవుతోంది.