'ఫైనల్ సెటిల్మెంట్'తో సిద్ధమవుతున్న యువహీరో!

టాలీవుడ్ యువహీరో కార్తికేయ ప్రస్తుతం స్టార్ తమిళ హీరో అజిత్ నటిస్తున్న వాలిమై సినిమాలో ఓ కీలక పాత్ర పోషిస్తున్నాడు. అలాగే శ్రీ సరిపల్లి అనే డెబ్యూ దర్శకుడితో ఓ సినిమా చేస్తున్నాడు. ఆర్ఎక్స్100 సినిమాతో ఫస్ట్ సక్సెస్ అందుకున్న కార్తికేయ.. ఇప్పటికి అదే సక్సెస్ తో రన్ అవుతున్నాడు. ఆర్ఎక్స్100 తర్వాత హిప్పి, 90ఎంఎల్, గుణ369 సినిమాలతో పాటు ఇటీవలే చావుకబురు చల్లగా సినిమాలతో ప్రేక్షకుల ముందుకొచ్చాడు. కానీ ఏ సినిమా కూడా ఆర్ఎక్స్100 పేరును మార్చే సినిమా కాలేకపోయింది. ఆ సినిమా వచ్చి రెండేళ్లు గడుస్తున్నా హీరోకు మరో హిట్ పడలేదు. అయితే తనకంటూ ప్రత్యేక గుర్తింపు తెచ్చుకునే ప్రయత్నం చేస్తూనే ఉన్నాడు.

తాజాగా కార్తికేయ నటించిన 'ఫైనల్ సెటిల్మెంట్' అనే సినిమా విడుదలకు సిద్ధమైంది. ఆర్ఎక్స్100 కంటే ముందే నటించిన సినిమా ఇది. కానీ ఎందుకో గాని ఇన్నేళ్లు విడుదలకు నోచుకోలేదు. తాజాగా ఈ సినిమా వార్తల్లో నిలిచింది. వరంగల్ - హైదరాబాద్ కు సంబంధించిన రెండు గ్యాంగులు ఓ అనాధ ఆశ్రమం కబ్జా విషయంలో గొడవపడే కథాంశంతో ఈ సినిమా తెరకెక్కింది. ఈ సినిమాలో కార్తికేయ నెగటివ్ షేడ్స్ ఉన్నటువంటి యువకుడుగా కనిపించనున్నాడు. ఈ సినిమాను జమ్మలమడుగు మోహన్ కాంత్ స్వీయనిర్మాణంలో రూపొందించాడు. ఇటీవలే ఫైనల్ సెటిల్మెంట్ ఫస్ట్ లుక్ పోస్టర్ కూడా రిలీజ్ చేశారు మేకర్స్. మనస్విని, సతీష్ లంక, ఛత్రపతి శేఖర్, సలీమ్ తదితరులు ఈ సినిమాలో ముఖ్యపాత్రలు పోషించారట. చూడాలి మరి రిలీజ్ డేట్ త్వరలో అనౌన్స్ చేస్తారేమో!