టాలీవుడ్ లో యంగ్ మేక‌ర్స్ హంగామా.. కానీ!

టాలీవుడ్ లో వార‌సుల హంగామా గ‌త కొన్నేళ్లుగా కొన‌సాగుతూనే వుంది. స్టార్ హీరోల వార‌సులు, నిర్మాతలు, ద‌ర్శ‌కుల వారసులు హీరోలుగా ఎంట్రీ ఇచ్చి స్టార్ లుగా నిల‌బ‌డితే మ‌రి కొంత మంది ఇంకా స్టార్ స్టేట‌స్ కోసం విశ్వ‌ప్ర‌య‌త్నాలు చేస్తూనే వున్నారు. కొంత మంది అందులో స‌క్సెస్ అవుతున్నారు... మ‌రి కొంత మంది భారీ డిజాస్ట‌ర్ల‌ని సొంతం చేసుకుంటూ మ‌ళ్లీ కొత్త సినిమాతో మ‌రో సారి అదృష్టాన్ని ప‌రీక్షించుకునేందుకు రెడీ అవుతున్నారు.

అయితే ప్ర‌ముఖ ప్రొడ‌క్ష‌న్ కంప‌నీల నుంచి వారి కొత్త త‌రం వార‌సులు ఇండ‌స్ట్రీలోకి కొత్త ఐడియాల‌తో, కొంత్త త‌ర‌హా సినిమాల‌తో నిర్మాణ రంగంలోకి ప్ర‌వేశిస్తున్నారు. యంగ్ మేక‌ర్స్ గా త‌మ స‌త్తాని చాటుకోవాల‌ని ఉవ్విళ్లూరుతున్నారు. ఈ నేప‌థ్యంలో మెగా ఫ్యామిలీ నుంచి కొణిదెల నిహారిక పింక్ ఎలిఫెంట్ పేరుతో నిర్మాణ సంస్థ‌ని స్టార్ట్ చేసి బ్యాక్ టు బ్యాక్ వెబ్ సిరీస్ లు నిర్మిస్తూ అద‌ర‌గొడుతోంది. ఇటీవ‌ల నిహారిక నిర్మించిన `ఒక చిన్న ఫ్యామిలీ స్టోరీ` జీ5లో స్ట్రీమింగ్ అయి మంచి లాభాల‌ని అందించిన విష‌యం తెలిసిందే.

రీసెంట్ గా `హ‌లో వ‌ర‌ల్డ్` పేరుతో మ‌రో సిరీస్ ని నిర్మించి దీంతో కూడా మ‌రో హిట్ ని త‌న ఖాతాలో వేసుకుంది. ఇక మెగాస్టార్ డాట‌ర్ కొణిదెల సుష్మిత కూడా గోల్డ్ బాక్స్ ఎంట‌ర్ టైన్ మెంట్ అనే సంస్థ‌ని ప్రారంభించి వెబ్ సిరీస్ ల నిర్మాణం చేప‌డుతోంది. `షూట్ ఔట్ ఎట్ ఆలేర్`, సంతోష్ శోభ‌న్ తో `శ్రీ‌దేవి శోభ‌న్ బాబు` వంటి సిరీస్‌, సినిమాల‌ని నిర్మించారు. వీరి త‌ర‌హాలోనే మ‌రో ఇద్ద‌రు వార‌సులు నిర్మాణ రంగంలోకి అడుగుపెడుతున్నారు.

టాలీవుడ్ లో కళాత‌ప‌స్వీ కె. విశ్వ‌నాథ్ తో అత్యుత్త‌మ చిత్రాల‌ని అందించిన సంస్థ `పూర్ణోద‌య మూవీ క్రియేష‌న్స్‌. ఏడిద నాగేశ్వ‌ర‌రావు నిర్మాత‌గా `సిరి సిరి మువ్వ‌` నుంచి `ఆప‌ద్భాంధ‌వుడు` వ‌ర‌కు శంక‌రాభ‌ర‌ణం, సీతాకోక చిలుక‌, సాగ‌ర సంగ‌మం, సితార, స్వాతిముత్యం, స్వ‌యం కృషి, స్వ‌ర్ణ క‌మ‌లం వంటి ఎన్నె అత్యుత్త‌మ చిత్రాలు వ‌చ్చాయి. అయితే ఈ బ్యాన‌ర్ నుంచి కొత్త బ్యాన‌ర్ పుట్టుకొచ్చింది. ఏడిద నాగేశ్వ‌ర‌రావు మ‌న‌వ‌రాలు, ఏడిద శ్రీ‌రామ్ కూతురు ఏడిద శ్రీ‌జ శ్రీ‌జ ఎంట‌ర్ టైన్ మెంట్స్ బ్యాన‌ర్ ని ప్రారంభించిన తొలి ప్ర‌య‌త్నంగా `ఫ‌స్ట్ డే ఫ‌స్ట్ షో` మూవీని నిర్మించింది.

అయితే క‌థా, క‌థ‌నాలు ఆస‌క్తిక‌రంగా లేక‌పోవ‌డంతో తొలి ప్ర‌య‌త్నంలోనే ప‌రాజ‌యాన్ని చ‌విచూడ‌టం గ‌మ‌నార్హం. ఇక ద‌ర్శ‌కుడు కోడిరామ‌కృష్ణ కూతురు కోడి దివ్య దీప్తి కోడి దివ్య ఎంట‌ర్ టైన్ మెంట్స్ బ్యాన‌ర్ పై కిర‌ణ్ అబ్బ‌వ‌రం హీరోగా `నేను మీకు బాగా కావాల్సిన వాడిని` పేరుతో తొలి ప్ర‌య‌త్నంగా ఓ మూవీని నిర్మిస్తున్నారు.

శ్రీ‌ధ‌ర్ గాదే ద‌ర్శ‌క‌త్వం వ‌హిస్తున్న ఈ మూవీని సెప్టెంబ‌ర్ 16న విడుద‌ల చేస్తున్నారు. ఇప్ప‌టి వ‌ర‌కైతే ఈ మూవీపై మంచి బ‌జ్ క్రియేట్ అయింది. అయితే సినిమా ఫ‌లితం ఎలా వుంటుందో వేచి చూడాల్సిందే. వార‌సులుగా కొత్త త‌రం మేక‌ర్స్ హంగామా చేస్తున్నా కొంత మంది మాత్ర‌మే స‌క్సెస్ అవుతున్నారు. కంటెంట్ పై దృష్టి పెట్టి మరింత మంది కొత్త‌వారికి అవ‌కాశాలు ఇస్తే ఖ‌చ్చితంగా స‌క్సెస్ లు అందించే అవ‌కాశం వుంది. ఈ విష‌యంలో దృష్టి పెడ‌తార‌ని ఆశిద్దాం.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.