అర్జున్ రెడ్డిపై ఆ పార్టీ కస్సుబుస్సు

విజయ్ దేవరకొండ హీరోగా నటించిన మూవీ అర్జున్ రెడ్డి. సందీప్ వంగా దర్శకత్వంలో రూపొందిన ఈ చిత్రంపై వివాదాలు ఏ స్థాయిలో ఉన్నాయో.. అంతకు మించిన విజయాన్ని కూడా ఈ సినిమా అందుకుంటోంది. అయితే.. ఈ చిత్రానికి సంబంధించిన ప్రచారంపై తెలంగాణలో కాంగ్రెస్ నాయకుడు వీ హనుమంతరావు ఆగ్రహం వ్యక్తం చేయడం.. పోస్టర్లు చించేయడం. ఆ తర్వాత విజయ్ దేవరకొండ కౌంటర్ ఇవ్వడం.. దానికి వీహెచ్ నుంచి ఎన్ కౌంటర్ రావడం వరుసగా జరిగాయి.

ఇప్పుడు అర్జున్ రెడ్డిపై ఏపీలో కూడా నిరసనలు మొదలయ్యాయి. ఏకంగా పోలీసు కేసులు కూడా నమోదు అవుతున్నాయి. ఏపీలో ప్రతిపక్ష పార్టీ అయిన వైఎస్సార్ సీపీ నేతలు అర్జున్ రెడ్డిపై పోలీసులకు ఫిర్యాదు చేశారు. అర్జున్ రెడ్డి ప్రదర్శనను వెంటనే నిలిపివేయాలని.. ఇలాంటి సినిమాలు యువతపై చెడు ప్రభావం చూపుతాయని.. ముఖ్యంగా బోల్డ్-ఇంటిమేట్ సీన్స్ చాలా అభ్యంతరకరంగా ఉన్నాయని పోలీసులకు ఫిర్యాదు చేశారు. విజయవాడ సిటీ పోలీస్ కమిషనర్ రమణ కుమార్ కు.. వైఎస్సార్ సీపీ నేతలు గౌతమ్ రెడ్డి.. పుణ్యశీల.. యాదాల శ్రీనివాస్ ఫిర్యాదు చేశారు.

మరోవైపు ఉస్మానియా యూనివర్సిటీకి చెందిన తెలుగునాడు స్టూడెంట్ ఫెడరేషన్ కూడా హైద్రాబాద్ పోలీసులకు ఫిర్యాదు చేసింది. లిప్ లాక్ సీన్స్ కు సంబంధించిన పోస్టర్లు పబ్లిక్ ప్లేస్ లలో ఉంచడాన్ని ఈ సంస్థ తప్పు పట్టింది. అయితే.. వివాదాల సంగతి ఎలా ఉన్నా.. ఇవన్నీ అర్జున్ రెడ్డి పబ్లిసిటీకి మరింతగా హెల్ప్ చేస్తున్నాయే తప్ప.. ఏ మాత్రం ప్రభావం చూపలేకపోతున్నాయి.