అశ్విన్ బాబు.. మరో డిఫెండర్ కథ

సీనియర్ టెలివిజన్ హోస్ట్, యాంకర్ ఓంకార్ గురించి ప్రత్యేకంగా చెప్పనక్కర్లేదు. ఇక అతని తమ్ముడు అశ్విన్ బాబు ప్రస్తుతం ఇండస్ట్రీలో హీరోగా కొనసాగే ప్రయత్నం చేస్తున్నాడు. యంగ్ హీరో అశ్విన్ బాబు తనకంటూ ప్రత్యేక గుర్తింపు పొందుతున్నాడు. విభిన్న కథా చిత్రాల ద్వారా ప్రేక్షకులను ఆకట్టుకుంటూ వచ్చిన అశ్విన్, ఇప్పుడు మరో ఆసక్తికరమైన ప్రాజెక్ట్‌తో ప్రేక్షకుల ముందుకు రాబోతున్నాడు.

అందుకు సంబంధించిన స్పెషల్ అప్డేట్ అయితే ఇచ్చారు. ఈ సినిమా పేరు ఇంకా ఖరారు కాలేదు, కానీ ఇది ఒక మెడికో థ్రిల్లర్‌గా తెరకెక్కుతుండటం విశేషం. ఈ చిత్రానికి మామిడాల ఎం.ఆర్. కృష్ణ దర్శకత్వం వహిస్తున్నారు. ప్రొడక్షన్ నెం. 3గా, అరుణశ్రీ ఎంటర్టైన్మెంట్స్‌ బ్యానర్‌పై టి. గణపతి రెడ్డి నిర్మిస్తున్న ఈ సినిమా, ప్రొడక్షన్ వాల్యూస్‌లో ఎలాంటి రాజీపడకుండా, లావిష్‌గా రూపొందిస్తున్నారు.

అశ్విన్ బాబు పుట్టిన రోజు సందర్భంగా, ఆగస్టు 1న చిత్ర యూనిట్ ఆయనకు శుభాకాంక్షలు తెలియజేస్తూ స్పెషల్ పోస్టర్‌ను విడుదల చేసింది. ఈ పోస్టర్‌లో అశ్విన్ బాబు క్యారెక్టర్‌కు సంబంధించిన ఫస్ట్ లుక్‌ను రివీల్ చేశారు. ఈ లుక్ చాలా పవర్‌ఫుల్‌గా ఉండటంతో సినిమాపై మరింత ఆసక్తి పెంచుతోంది. సగ భాగం భారతదేశం పటం మరోవైపు అశ్విన్ ఫేస్ ఉంది. ఇక జనాలు కూడా హైలెట్ అయ్యారు. ఏదో బలమైన సామాజిక అంశం గురించి ఈ సినిమా చెప్పబోతున్నట్లు తెలుస్తోంది.

ఈ చిత్రంలో అశ్విన్ బాబుకు జోడీగా రియా సుమన్ నటిస్తుండగా, మురళీ శర్మ, సచిన్ ఖేడేకర్, అజయ్, VTV గణేష్, యెష్నా చౌదరి, సుదర్శన్, శకలక శంకర్, రాఘవ వంటి పలువురు ప్రముఖులు కీలక పాత్రల్లో కనిపించనున్నారు. ఇప్పటివరకు హైదరాబాద్, వైజాగ్, కొడైకెనాల్‌లలో 75% షూటింగ్ పూర్తయింది. ఈ ఏడాది చివర్లో ఈ సినిమాను ప్రేక్షకుల ముందుకు తీసుకురావాలని చిత్ర యూనిట్ ప్లాన్ చేస్తోంది.

సినిమాకు గౌర హరి సంగీతం అందిస్తుండగా, ఎం.ఎన్. బాల్ రెడ్డి సినిమాటోగ్రఫీ చేస్తున్నారు. విప్లవ్ నైషదం ఎడిటింగ్ బాధ్యతలు తీసుకున్నారు. ఈ సినిమా అశ్విన్ బాబు కెరీర్‌లో మరో మంచి మైలురాయిగా నిలుస్తుందని మేకర్స్ వివరణ ఇచ్చారు. మామూలుగా కాకుండా వైవిధ్యభరితమైన కథాంశంతో తెరకెక్కుతున్న ఈ సినిమా, థ్రిల్లింగ్ ఎలిమెంట్స్‌ తో పాటు మంచి ఎమోషనల్ కనెక్ట్ కూడా కలిగి ఉండబోతుందని సమాచారం.

మరోవైపు అశ్విన్ నటించిన ‘శివం భజే’ నేడు వోడుదలైంది. గంగా ఎంటర్టైన్మంట్స్ బ్యానర్‌పై రూపొందుతున్న ఈ సినిమాలో దిగంగనా సూర్యవంశీ అశ్విన్ కు జంటగా నటించింది. అప్సర్ దర్శకత్వం వహించారు. ప్రపంచవ్యాప్తంగా గ్రాండ్ రిలీజ్ అవుతున్న ఈ సినిమా ఇప్పటికే టీజర్, ట్రైలర్ లతో మంచి అంచనాలను క్రియేట్ చేసుకుంది. మరి సినిమా ఎలాంటి ఫలితాన్ని అందుకుంటుందో చూడాలి.