ఇంట్రెస్టింగ్ గా ‘బహుముఖం’ ట్రైలర్!

హర్షివ్ కార్తీక్ ప్రధాన పాత్రలో నటిస్తూ, దర్శకనిర్మాతగా తెరకెక్కించిన చిత్రం ‘బహుముఖం’. 'గుడ్, బ్యాడ్ & ది యాక్టర్' అనేది దీనికి ట్యాగ్‌‌ లైన్‌‌. ఇప్పటికే విడుదలైన ఈ మూవీ ఫస్ట్ లుక్ పోస్టర్ అందరిలో ఆసక్తిని కలిగించింది. ఓవైపు శివుడి అవతారంలో, మరోవైపు మోడరన్ యువకుడి లుక్ లో హీరోని ప్రెజెంట్ చేయడం కొత్తగా అనిపించింది. ఆ తర్వాత వచ్చిన టీజర్ కూడా ఆడియన్స్ ను ఆకట్టుకుంది. ఈ నేపథ్యంలో తాజాగా ఈ మూవీ ట్రైలర్ ను మేకర్స్ రిలీజ్ చేశారు.

'బహుముఖం' ట్రెయిలర్ కథానాయకుడిలోని భిన్నమైన కోణాల్ని ఆవిష్కరిస్తూ ఆద్యంతం ఉత్కంఠభరితంగా సాగింది. చిన్నప్పటి నుంచీ యాక్టర్ అవ్వాలని కలలు కనే ఓ యువకుడు.. తన డ్రీమ్ ను నిజం చేసుకోవడానికి తన ప్రయాణాన్ని మొదలు పెడతాడు. ఈ క్రమంలో ఎన్నో అవమానాలను ఎదుర్కొంటాడు. ఆడిషన్స్ లో 'నువ్వు పెయిన్ కిల్లర్ వి కాదమ్మా, సైకో కిల్లర్ వి' అంటూ అతన్ని నిరుత్సాహపరచడాన్ని మనం ట్రైలర్ లో చూడొచ్చు.

''కష్టమైనా మనసు పెట్టి చెయ్యి.. నిజమైన నటన అంటే నటించడం కాదు, జీవించడం'' అంటూ ఒకతను హిత బోధ చేసిన తర్వాత హీరో లైఫ్ మరో టర్న్ తీసుకున్నట్లు తెలుస్తోంది. ఈ క్రమంలో అతను జైలుకు కూడా వెళ్లినట్లు ట్రైలర్ లో చూపించారు. "దేవుడా నేనిప్పుడు ఎలా పెర్ఫార్మ్ చెయ్యను.. నువ్ నిజంగా ఉంటే నన్ను సైకోలా మార్చెయ్యవా" అని వేడుకోవడంతో అసలు ఈ సినిమా కథేంటి? అని తెలుసుకోవాలనే ఆసక్తి కలుగుతుంది.

'ఎన్ని రోజులని ఇలా నిజాన్ని దాస్తావ్?' అని ప్రశ్నించడాన్ని బట్టి చూస్తే, అతను ఏదో రహస్యాన్ని దాచిపెడుతున్నట్లుగా తెలుస్తోంది. ఇక చివర్లో 'ఇది హరికథ బుర్రకథ కాదు.. ఇది నిజమైన కథ, జరిగిన కథ.. నా కథ' అంటూ స్టేజ్ మీద హీరో చేసే పెర్ఫార్మెన్స్ హైలైట్ గా నిలిచింది. అతని అసలు సమస్య ఏంటి? చివరకు తన కలను నెరవేర్చుకున్నాడా లేదా? మధ్యలో హీరోయిన్ తో లవ్ స్టోరీ ఏమైంది? అనేది తెలియాలంటే 'బహుముఖం' సినిమా విడుదలయ్యే వరకూ ఆగాల్సిందే.

ఓవరాల్ గా 'బహుముఖం' అనేది డిఫరెంట్ కాన్సెప్ట్ తో, ఊహించని మలుపులతో తెరకెక్కిన సైకలాజికల్ సస్పెన్స్ థ్రిల్లర్ అని ట్రెయిలర్ ని బట్టి అర్థమవుతోంది. టైటిల్ కి తగ్గట్టుగానే హీరో హర్షివ్ కార్తీక్ తనలోని మల్టీ షేడ్స్ ను తెర మీద ఆవిష్కరించాడు. దీనికి విజువల్స్, బ్యాగ్రౌండ్ స్కోర్, సౌండింగ్ ప్రధాన ఆకర్షణగా నిలిచాయి. ఇందులో స్వర్ణిమా సింగ్, మరియా మర్టినోవా ఇతర ప్రధాన పాత్రలు పోషించారు.

మొత్తం విదేశాల్లోనే షూటింగ్ జరుపుకున్న పక్కా తెలుగు సినిమా 'బహుముఖం' అని మేకర్స్ ప్రకటించారు. అట్లాంటా, మాకాన్, కాంటన్, జార్జియా, యుఎస్ఏ పరిసర ప్రాంతాలలో ఈ మూవీ చిత్రీకరణ జరిగినట్లు తెలుస్తోంది. క్రిస్టల్ మౌంటైన్స్ ప్రొడక్షన్స్ పతాకంపై హర్షివ్ కార్తీక్ ఈ చిత్రాన్ని నిర్మించాడు. అరవింద్ రెడ్డి సహ నిర్మాతగా వ్యవహరించారు. దీనికి ల్యూక్ ఫ్లెచర్ సినిమాటోగ్రాఫర్ గా వర్క్ చేశారు.

రామస్వామి, హర్షివ్ కార్తీక్ కలిసి డైలాగ్స్ అందించిన ఈ సినిమాకు.. ఫణి కళ్యాణ్ సంగీతం సమకూర్చారు. ప్రముఖ సంగీత దర్శకుడు శ్రీ చరణ్ పాకాల బ్యాగ్రౌండ్ మ్యాజిక్ కంపోజ్ చేశారు. గ్యారీ బిహెచ్‌, హర్షివ్ ఎడిటింగ్ బాధ్యతలు నిర్వహించారు. 'బహుముఖం' చిత్రాన్ని ఏప్రిల్ 5న థియేటర్లలో విడుదల చేయటానికి మేకర్స్ సన్నాహాలు చేస్తున్నారు.