అట్లుంటది మన బాలయ్యతోని!

టాలీవుడ్ సీనియర్ హీరోలలో ఒకరైన నందమూరి బాలకృష్ణ.. ఆరు పదుల వయసులోనూ రెట్టింపు ఉత్సాహంతో పని చేస్తున్నారు. తన ఎనర్జిటిక్ పెర్ఫార్మెన్స్ లతో బాక్సాఫీస్ వద్ద అదరగొడుతున్నాడు. ఈ మధ్యనే ఇండస్ట్రీలో 50ఏళ్లు పూర్తి చేసుకున్నారు. ఇటీవల దుబాయ్ లో జరిగిన ఐఫా అవార్డుల కార్యక్రమంలో బాలయ్యకు గోల్డెన్ లెగసీ పురస్కారాన్ని ఇచ్చారు. ఈ సందర్భంగా బాలీవుడ్ ప్రొడ్యూసర్ కరణ్ జోహార్, బాలకృష్ణ మధ్య జరిగిన ఫన్నీ ర్యాపిడ్ ఫైర్ కు సంబంధించిన ఓ వీడియో నెట్టింట వైరల్ గా మారింది.

వైభవంగా జరిగిన ఐఫా అవార్డ్స్ ఈవెంట్ కు దగ్గుబాటి రానా, తేజ సజ్జలతో పాటుగా కరణ్ జోహార్ హోస్టుగా వ్యవహరించారు. ఇందులో భాగంగా కరణ్ అడిగిన సరదా ప్రశ్నలకు బాలయ్య ఇచ్చిన సమాధానాలు ఆకట్టుకున్నాయి. "మీ కాంటెంపరరీ హీరోలైన చిరంజీవి, నాగార్జున, వెంకటేష్ లలో మీ ఫేవరేట్ యాక్టర్ ఎవరు?" అని కరణ్ అడగ్గా.. దానికి బాలకృష్ణ ఏమాత్రం సంకోచించకుండా వెంటనే "సల్మాన్ ఖాన్, షారుఖ్ ఖాన్, అమీర్ ఖాన్ లలో నీ ఫేవరెట్ ఎవరు?" అని ఎదురు ప్రశ్నించారు.

కరణ్ జోహార్ తెలివిగా అడిగిన ప్రశ్నకు బాలయ్య స్పాన్టేనియస్ గా రివర్స్ కౌంటర్ వేయడంతో.. అక్కడున్న సెలబ్రిటీలంతా ఆశ్చర్యపోయారు. చప్పట్లతో బాలయ్యను అభినందించారు. పక్కనే ఉన్న రానా, తేజ సజ్జా సైతం దీనికి షాక్ అయ్యారు. బాలకృష్ణను ఇరుకున పెడదామని ఇలాంటి ప్రశ్న వేస్తే, ఆయనే తిరిగి కరణ్ ను ఇబ్బంది పెట్టాడని సోషల్ మీడియాలో ఈ వీడియో క్లిప్ ని వైరల్ చేస్తున్నారు. బాలయ్యతో మామూలుగా ఉండదు మరి, కరణ్ కి కండ్లు బయర్లు కమ్మేసుంటాయని నందమూరి ఫ్యాన్స్ పోస్టులు పెడుతున్నారు.

అయితే నిజానికి ఖాన్ త్రయంలో మీ ఫేవరెట్ ఎవరిని బాలయ్య ప్రశ్నించినప్పుడు.. తాను ఈ స్థానంలో ఉండటానికి కారణమైన షారుక్ ఖాన్ అంటే ఇష్టమని కరణ్ జోహార్ బదులిచ్చారు. ఇప్పుడు చెప్పండి మీకు ఎవరంటే ఇష్టమని మళ్ళీ అడగ్గా.. వాళ్లు ముగ్గురు కూడా లెజెండ్స్ అని బాలకృష్ణ సమాధానమిచ్చారు. 'జై బాలయ్య' అనడం మీరు మొదటిసారి ఎప్పుడు విన్నారని ప్రశ్నించగా.. అభిమన్యుడిలాగే అమ్మ ఒడిలో ఉన్నప్పుడే జై బాలయ్య అని విన్నానని తనదైన శైలిలో చెప్పారు.

బాలయ్య అప్పుడప్పుడు తన అభిమానులను కొడతారనే ఉద్దేశ్యంతో.. 'నాతో సహా అందరూ మీ గురించి భయపడుతున్నారు? ఇలా ఎందుకు?' అని కరణ్ జోహర్ అడిగారు. "వాళ్ళంతా నన్ను ప్రేమిస్తారు. కానీ కొన్నిసార్లు కొంతమంది మాత్రం నన్ను విసిగిస్తూ ఉంటారు. వారికి మాత్రమే నేను కొన్నిసార్లు రిటర్న్ గిఫ్ట్ ఇస్తుంటాను" అని నవ్వుతూ బదులిచ్చారు బాలయ్య. 'అన్ స్టాపబుల్' టాక్ షోలో అస్సలు నచ్చని గెస్ట్ ఎవరని అడగ్గా.. ఎవరైనా నా షోకి వచ్చే వరకు కొంచెం సిగ్గుపడుతూ ఉంటారు. కానీ వచ్చిన తర్వాత నాతో కలిసి వాళ్ళు కూడా బెస్ట్ అయిపోతారు అని చెప్పారు.

ఇక సినిమాల విషయానికొస్తే, హ్యాట్రిక్ విజయాలతో ఫుల్ జోష్ లో ఉన్న బాలకృష్ణ, ప్రస్తుతం బాబీ దర్శకత్వంలో NBK 109 సినిమా చేస్తున్నారు. ఇది 2025 సంక్రాంతి కానుకగా ప్రేక్షకుల ముందుకు రానుంది. అలానే బోయపాటి శ్రీను దర్శకత్వంలో హ్యాట్రిక్ మూవీ చేయడానికి బాలయ్య రెడీ అయ్యారు. అఖండ చిత్రానికి సీక్వెల్ గా 'అఖండ 2' ఈ మధ్యనే ప్రారంభించారు. ఇక ఆహా ఓటీటీ కోసం ఆయన చేస్తున్న 'అన్ స్టాపబుల్' టాక్ షో సీజన్-4 రీసెంట్ గా స్ట్రీమింగ్ కు వచ్చేసింది.