మళ్లీ వివాదం తప్పదా..?

గత ఏడాది అదా శర్మ ముఖ్య పాత్రలో సుదీప్తో సేన్‌ దర్శకత్వంలో రూపొంది ప్రేక్షకుల ముందుకు వచ్చిన ది కేరళ స్టోరీ సినిమా ఏ స్థాయి విజయాన్ని సొంతం చేసుకుందో ప్రత్యేకంగా చెప్పనక్కర్లేదు. ఒక మతానికి వ్యతిరేక మూవీ అంటూ ఆ సినిమాపై చాలా మంది విమర్శలు చేశారు.

ఎంత వివాదం చెలరేగిందో, ఎంతగా విమర్శలు వచ్చాయో అంతకు పదిరెట్లు వసూళ్లు సినిమాకు లభించిన విషయం తెల్సిందే. ది కేరళ స్టోరీ సినిమా ఘన విజయం నేపథ్యంలో మరోసారి అదా శర్మ మరియు సుదీప్తో సేన్‌ కాంబోలో మూవీ రాబోతుంది.

ఈ హిట్ కాంబోలో రూపొందుతున్న 'బస్తర్‌ : ది నక్సల్‌ స్టోరీ' టీజర్ ను తాజాగా విడుదల చేశారు. నక్సలైట్లతో జరిగిన పోరాటంలో కన్నుమూసిన జవాన్‌ ల గురించి అదా శర్మ చెప్పే డైలాగ్స్ తో బస్తర్ టీజర్ కొనసాగింది. టీజర్ చూస్తూ ఉంటే కచ్చితంగా ఈసారి కూడా ఏదో ఒక వర్గానికి సంబంధించిన వివాదం చెలరేగే అవకాశాలు కనిపిస్తున్నాయి అంటున్నారు.

బస్తర్‌ సినిమాలో కొన్ని సున్నితమైన అంశాలను టచ్ చేస్తున్నట్లుగా ఇప్పటికే మేకర్స్ ప్రకటించారు. కనుక గతంలో మాదిరిగానే ఈ సినిమా కూడా వివాదాస్పదం అవ్వడం కన్ఫర్మ్‌ అన్నట్లుగా కొందరు అభిప్రాయం వ్యక్తం చేస్తున్నారు. పాన్‌ ఇండియా రేంజ్ లో అన్ని భాషల్లో కూడా ఈ సినిమాను విడుదల చేయబోతున్నారు. మార్చి 15న విడుదల కు ఏర్పాట్లు జరుగుతున్నాయి.