'భైరవం' ఫస్ట్ లుక్: రస్టిక్ అవతార్ లో బెల్లంకొండ!

టాలీవుడ్ యంగ్ హీరో బెల్లంకొండ సాయి శ్రీనివాస్ తెలుగు తెర మీద కనిపించి మూడున్నర సంవత్సరాలు దాటిపోయింది. చివరగా 2021 సంక్రాంతికి 'అల్లుడు అదుర్స్' సినిమాతో తెలుగు ప్రేక్షకులను పలకరించాడు. ఆ తర్వాత 'ఛత్రపతి' రీమేక్ తో బాలీవుడ్ లో భంగపడ్డ అల్లుడు శ్రీను.. ఇప్పుడు బ్యాక్ టూ బ్యాక్ సినిమాలతో రావడానికి రెడీ అవుతున్నాడు. ఇందులో భాగంగా తాజాగా తన కొత్త చిత్రాన్ని అధికారికంగా ప్రకటించారు.

విజ‌య్ కనకమేడల దర్శకత్వంలో బెల్లంకొండ శ్రీనివాస్, మంచు మనోజ్, నారా రోహిత్ వంటి ముగ్గురు హీరోలు కలిసి ఓ సినిమా చేస్తున్నట్లు చాలా రోజులుగా వార్తలు వినిపిస్తున్నాయి. ఇది తమిళ్ లో ఘన విజయం సాధించిన 'గరుడన్' మూవీకి రీమేక్ అనే టాక్ కూడా నడిచింది. అయితే ముగ్గురు హీరోల కాంబినేషన్ లో ఓ భారీ ప్రాజెక్ట్ కి అఫిషియల్ అనౌన్స్ మెంట్ వచ్చింది. ఈ చిత్రానికి “భైరవం” అనే పవర్ ఫుల్ టైటిల్ ను ఫిక్స్ చేసారు. ఈ సందర్భంగా బెల్లంకొండ శ్రీనివాస్ ఫస్ట్ లుక్ పోస్టర్ ని ఆవిష్కరించారు.

“భైరవం” ఫస్ట్ లుక్ పోస్టర్ లో బెల్లంకొండ సాయి శ్రీనివాస్ టెర్రిఫిక్ లుక్ లో చాలా పవర్ ఫుల్ గా కనిపిస్తున్నారు. గుబురు గడ్డంతో రస్టిక్ అండ్ రగ్గుడ్ అవతార్ లోకి మారిపోయాడు. ఒక చేతిలో త్రిశూలం, మరో చేతిలో పెద్ద కత్తి పట్టుకొని కూర్చొని ఇంటెన్స్ గా చూస్తూ ఉన్నాడు. రక్తంతో తడిసిన ఆయుధాలను చూస్తుంటే అతను శత్రు సంహారం చేస్తున్నట్లు తెలుస్తోంది. బ్యాక్‌గ్రౌండ్‌లో పెద్ద దేవాలయం, కాగడాలు పట్టుకొని నిలబడి ఉన్న జనాన్ని కూడా మనం చూడొచ్చు.

'భైరవం' సినిమాలో సాయి శ్రీనివాస్ ఎలాంటి శక్తివంతమైన పాత్ర పోషించాడనేది ఈ ఫస్ట్ లుక్ పోస్టర్ తో తెలియజేసారు. ఇది ఆడియన్స్ ను విశేషంగా ఆకట్టుకుంటోంది. టైటిల్ డిజైన్ కూడా బాగుంది. త్వరలోనే మనోజ్ మంచు, నారా రోహిత్ ల ఫస్ట్ లుక్ పోస్టర్లను కూడా విడుదల చేస్తామని చిత్ర బృంద తెలిపింది. చాలా కాలం తర్వాత తెలుగులో ముగ్గురు కథానాయకులు కలిసి స్క్రీన్ షేర్ చేసుకోవడంతో, ఇప్పటికే ఈ సినిమాపై జనాల్లో ఆసక్తి కలిగింది.

శ్రీ సత్యసాయి ఆర్ట్స్‌ పతాకంపై కెకె రాధామోహన్‌ అత్యంత ప్రతిష్టాత్మకంగా ఈ చిత్రాన్ని నిర్మిస్తున్నారు. బెల్లంకొండ శ్రీనివాస్ ను బాలీవుడ్ కు పరిచయం చేసిన పెన్ స్టూడియోస్‌ డాక్టర్ జయంతిలాల్ గడా ఈ సినిమాని సమర్పిస్తున్నారు. శ్రీ చరణ్ పాకాల సంగీతం సమకూరుస్తున్నారు. హరి కె వేదాంతం సినిమాటోగ్రాఫర్ గా, ఛోటా కె ప్రసాద్ ఎడిటర్ గా వర్క్ చేస్తున్నారు. బ్రహ్మ కడలి ప్రొడక్షన్ డిజైనింగ్ చేస్తుండగా.. సత్యర్షి, తూమ్ వెంకట్ ఈ సినిమాలో డైలాగ్స్ రాస్తున్నారు.

'గరుడన్' సినిమాలో సూరి, శశికుమార్, ఉన్ని ముకుందన్ లు హీరోలుగా నటించారు. నేషనల్ అవార్డ్ విన్నింగ్ డైరెక్టర్ వెట్రిమారన్ ఈ చిత్రాన్ని నిర్మించారు. స్నేహం, నమ్మకం, విశ్వాసం, నమ్మక ద్రోహం, అత్యాశ వంటి అంశాల చుట్టూ అల్లుకున్న కథతో ఈ చిత్రాన్ని తెరకెక్కించారు. ఇప్పుడు డైరెక్టర్ విజ‌య్ కనకమేడల తెలుగు నేటివిటీకి తగ్గట్టుగా మార్పులు చేసి, తనదైన స్క్రీన్ ప్లేతో రూపొందిస్తున్నట్లు తెలుస్తోంది. 'నాంది', 'ఉగ్రం' వంటి సినిమాలతో నిరూపించుకున్న దర్శకుడు.. 'భైరవం' మూవీతో ఎలాంటి విజయాన్ని అందుకుంటారో చూడాలి.