భైరవం.. అల్లరి పిల్లగా అగ్ర దర్శకుడి కూతురు!

బెల్లంకొండ సాయి శ్రీనివాస్, నారా రోహిత్, మనోజ్ మంచు హీరోలుగా నటిస్తున్న తాజా చిత్రం ''భైరవం''. విలక్షణ దర్శకుడు విజయ్ కనకమేడల దర్శకత్వంలో ఈ సినిమా తెరకెక్కుతోంది. ఇటీవలే ఈ ప్రాజెక్ట్ ని అఫీషియల్ గా అనౌన్క్ చేసిన మేకర్స్.. దూకుడుగా ప్రమోషన్స్ చేస్తున్నారు. ఇప్పటికే ముగ్గురు హీరోల ఫస్ట్ లుక్ పోస్టర్లను రిలీజ్ చేసారు. ఈ క్రమంలో ఇప్పుడు మహిళా ప్రధాన పాత్రలపై దృష్టి సారించారు. లేటెస్టుగా ఒక హీరోయిన్ లుక్ ను రివీల్ చేసారు.

''భైరవం'' సినిమాలో అందాల భామ అదితి శంకర్‌ కథానాయికగా నటిస్తున్నట్లు చిత్ర బృందం ప్రకటించారు. 'వెన్నెల' అనే అల్లరి పిల్ల పాత్రలో కనిపించబోతున్నట్లు తెలిపారు. ఇందులో ఆమె బెల్లంకొండ సాయి శ్రీనివాస్ కు జోడీగా నటిస్తోందని వెల్లడించారు. ఫస్ట్ లుక్ పోస్టర్ లో అదితి ఒక పల్లెటూరి అమ్మాయిగా రస్టిక్ అవతార్‌లో కనిపిస్తోంది. హాఫ్ శారీలో బండి నడుపుతూ నవ్వుతూ కనిపించింది. రెండు జడలు వేసుకొని, తలలో మల్లెపూలు పెట్టుకొని చాలా అందంగా ఉంది.

ఫస్ట్ లుక్ తోనే సినిమాలో అదితి శంకర్‌ పాత్ర ఏంటనేది స్పష్టం చేసారు. ఆమె నడుపుతున్న బండికి మిల్క్ క్యాన్ తగిలించి ఉండటాన్ని బట్టి చూస్తే, సినిమాలో వెన్నెల పాత్ర పాలు అమ్ముతుందని అర్థమవుతోంది. ఈ పోస్టర్ లో అదితి తన నేచురల్ బ్యూటీతో, చార్మింగ్ ప్రెజెన్స్ తో ఆకట్టుకుంటుంది. భైరవం యొక్క ఇంటెన్స్ వరల్డ్ లో ఆమె పాత్ర చాలా చలాకీగా ఉంటుందని తెలుస్తోంది. మునుపెన్నడూ లేని విధంగా ఆమె మీ హృదయాలను బంధిస్తుందని మేకర్స్ పేర్కొన్నారు.

స్టార్ డైరెక్టర్ శంకర్ చిన్న కూతురైన అదితి శంకర్.. ఇప్పటికే కోలీవుడ్ లో హీరోయిన్ గా ఎంట్రీ ఇచ్చింది. 'విరుమాన్', 'మహావీరుడు' వంటి చిత్రాల్లో నటించింది. ప్రస్తుతం మరో రెండు మూడు తమిళ చిత్రాల్లో నటిస్తోంది. 'గని' చిత్రంలో రోమియో జూలియట్ పాట పాడటం ద్వారా సింగర్ గా తెలుగు ప్రేక్షకులకు పరిచయమైంది. ''భైరవం'' మూవీతో హీరోయిన్ గా టాలీవుడ్ లో అరంగేట్రం చేయడానికి రెడీ అయింది. మరి ఈ చిత్రం అదితికి ఎలాంటి గుర్తింపు తెచ్చిపెడుతుందో చూడాలి.

'భైరవం' సినిమాలో శీను, వరద, గజపతి పాత్రల్లో వరుసగా బెల్లంకొండ సాయి శ్రీనివాస్, నారా రోహిత్, మనోజ్ మంచు నటిస్తున్నారు. ఇప్పుడు వెన్నెలగా అదితి శంకర్ ఈ టీంలో జాయిన్ అయింది. మేకర్స్ త్వరలో మిగతా ఫీమేల్ లీడ్స్ ను ప్రకటించే అవకాశం ఉంది. శ్రీ సత్యసాయి ఆర్ట్స్‌పై కెకె రాధామోహన్ నిర్మిస్తున్న ఈ చిత్రాన్ని పెన్ స్టూడియోస్‌ జయంతిలాల్ గడా సమర్పిస్తున్నారు. శ్రీ చరణ్ పాకాల సంగీతం సమకూర్చారు. హరి కె వేదాంతం సినిమాటోగ్రఫీ నిర్వహిస్తుండగా.. ఛోటా కె ప్రసాద్ ఎడిటర్ గా, బ్రహ్మ కడలి ప్రొడక్షన్ డిజైనర్ గా వర్క్ చేస్తున్నారు.