'స్పిరిట్' & 'యానిమల్ పార్క్' అప్డేట్స్ వచ్చేశాయ్!
తాజాగా టీ-సిరీస్ నిర్మాత భూషణ్ కుమార్ ఈ మూవీ షూటింగుకు సంబంధించిన అప్డేట్ అందించారు.
By: Tupaki Desk | 6 Nov 2024 7:14 AM GMT
'అర్జున్ రెడ్డి'తో సెన్సేషన్ క్రియేట్ చేసిన సందీప్ రెడ్డి వంగా.. 'కబీర్ సింగ్' సినిమాతో క్రేజీ పాన్ ఇండియా డైరెక్టర్ గా మారిపోయారు. గతేడాది చివర్లో 'యానిమల్' మూవీతో బాక్సాఫీస్ ను షేక్ చేశారు. ఇప్పుడు మరికొన్ని ఇంట్రెస్టింగ్ ప్రాజెక్ట్స్ లైన్ లో పెట్టారు. ఇప్పటికే రెబల్ స్టార్ ప్రభాస్ హీరోగా "స్పిరిట్" అనే సినిమాని ప్రకటించారు. తాజాగా టీ-సిరీస్ నిర్మాత భూషణ్ కుమార్ ఈ మూవీ షూటింగుకు సంబంధించిన అప్డేట్ అందించారు. అలానే సందీప్ చేయబోయే తదుపరి సినిమా గురించి కూడా మాట్లాడారు.
‘స్పిరిట్’ సినిమా ఎప్పుడు సెట్స్ మీదకు వెళ్తుందో అని అందరూ ఆలోచిస్తున్న నేపథ్యంలో.. ‘భూల్‌ భూలయ్యా 3’ ప్రమోషన్స్ లో భూషణ్ కుమార్ దీనిపై నోరు విప్పారు. ప్రస్తుతం తాము ఈ సినిమా పనుల్లో బిజీగా ఉన్నామని తెలిపారు. అయితే ఇంకా నటీనటుల ఎంపిక పూర్తి కాలేదని, త్వరలోనే కాస్టింగ్ ను ఫైనలైజ్ చేస్తామని చెప్పారు. ఇదే క్రమంలో షూటింగ్ పనులు మొదలుపెడతామని, 2024 డిసెంబర్‌ చివరి నాటికి షూటింగ్ స్టార్ట్ చెయ్యాలని ప్లాన్ చేస్తున్నామని నిర్మాత తెలిపారు.
ఇక రణబీర్ కపూర్ తో 'యానిమల్' సీక్వెల్ ను సందీప్ రెడ్డి ప్రకటించిన సంగతి తెలిసిందే. ఫస్ట్ పార్ట్ పోస్ట్ క్రెడిట్ సీన్ తోనే ఈ విషయం గురించి హింట్ ఇచ్చారు. ''యానిమల్ పార్క్'' అనే టైటిల్‌ తో ఈ సినిమా తెరకెక్కనుంది. నిర్మాత భూషణ్ కుమార్ ఈ క్రేజీ సీక్వెల్ అప్డేట్ అందించారు. ‘స్పిరిట్’ పూర్తి చేసిన తర్వాత, ఆరు నెలల్లోనే 'యానిమల్ పార్క్' పనులు ప్రారంభం అవుతాయని చెప్పారు. ప్రస్తుతానికైతే ప్రభాస్ సినిమాపై మాత్రమే వంగా దృష్టి పెట్టినట్లు క్లారిటీ ఇచ్చారు.
ప్రభాస్ తో ఓ కాప్ డ్రామాని రూపొందిస్తున్నట్లు సందీప్ రెడ్డి వంగా ఇప్పటికే చాలాసార్లు చెప్పారు. ఈ పోలీస్ స్టోరీలో సిన్సియర్ పవర్ ఫుల్ పోలీసాఫీసర్ గా ప్రభాస్ కనిపిస్తారు. డార్లింగ్ ను బెస్ట్ లుక్‌ లో ప్రజెంట్ చేయబోతున్నామని, మునుపెన్నడూ చూడని విధంగా నెక్స్ట్ లెవల్ లో చూస్తారని చిత్ర బృందం హామీ ఇస్తోంది. ప్రభాస్ తన కెరీర్ లోనే తొలిసారిగా డాషింగ్ పోలీస్ క్యారక్టర్ చేస్తుండటంతో, ఫ్యాన్స్ ఎంతో ఆసక్తిగా ఎదురు చూస్తున్నారు.
ఇటీవలే దీపావళి సందర్భంగా ‘స్పిరిట్’ మూవీ మ్యూజిక్ సిట్టింగ్స్ ప్రారంభమైన సంగతి తెలిసిందే. ఈ మేరకు మ్యూజిక్ డైరెక్టర్ హర్షవర్ధన్‌ రామేశ్వర్‌ సోషల్ మీడియాలో ఓ పోస్ట్ పెట్టారు.హర్షవర్ధన్‌ ట్యూన్స్‌ కంపోజ్ చేస్తుండగా.. పక్కనే సందీప్ వంగా ఎంజాయ్‌ చేస్తూ కనిపించిన ఈ ఫొటో నెట్టింట వైరల్ అయింది. ఈ ఏడాది చివర్లో సినిమా సెట్స్ మీదకు వెళ్లే అవకాశం ఉందని నిర్మాత భూషణ్ కుమార్ తాజాగా చెప్పడంతో, రాబోయే రోజుల్లో స్పిరిట్ అప్డేట్స్ వస్తాయని ఫ్యాన్స్ భావిస్తున్నారు.
"స్పిరిట్" సినిమాని టీ-సిరీస్ & భద్రకాళి పిక్చర్స్ బ్యానర్స్ పై భూషణ్ కుమార్, క్రిషన్ కుమార్, ప్రణయ్ రెడ్డి వంగా సంయుక్తంగా భారీ బడ్జెట్ తో నిర్మించనున్నారు. స్టార్ కాస్టింగ్, టాప్ టెక్నీషియన్స్ ఈ ప్రాజెక్ట్ లో భాగం కానున్నారు. ఈ చిత్రాన్ని ఆరు ప్రధాన భారతీయ భాషలతో పాటుగా మాండరిన్, జపనీస్, కొరియన్ వంటి ఫారిన్ లాంగ్వేజెస్ లోనూ రూపొందించాలని అనుకుంటున్నారు. త్వరలోనే అన్ని వివరాలు అధికారికంగా వెల్లడికానున్నాయి.
