బడా సీక్వెల్స్.. ఎక్కువ రోజులు షూటింగ్స్ లో ఉన్న సినిమాలివే..

సౌత్ లో బాహుబలి సినిమాతో సీక్వెల్స్ ట్రెండ్ షురూ అయ్యింది. బాహుబలి మొదటి పార్ట్ సూపర్ హిట్ కావడంతో దానికి సీక్వెల్ గా వచ్చిన బాహుబలి 2పైన భారీ హైప్ క్రియేట్ అయ్యింది. బ్లాక్ బస్టర్ హిట్ గా మారింది. ఇండియాలో అత్యధిక కలెక్షన్స్ సాధించిన సినిమాలలో బాహుబలి 2 టాప్ 5లో ఉంది. తరువాత కేజీఎఫ్ రెండు భాగాలుగా రిలీజ్ అయ్యింది. ఈ రెండు సినిమాలు సూపర్ హిట్ అయ్యాయి. కేజీఎఫ్ చెప్తే 2 అయితే 1200+ కోట్ల వరకు కలెక్ట్ చేసింది.

తమిళంలో మణిరత్నం దర్శకత్వంలో పొన్నియన్ సెల్వన్ రెండు భాగాలుగా రిలీజ్ అయ్యింది. ఈ సినిమాలకి తమిళంలో మంచి టాక్ వచ్చిన ఇతర భాషలలో క్లిక్ కాలేదు. ఇప్పుడు పుష్పకి సీక్వెల్ గా పుష్ప ది రూల్ తెరకెక్కుతోంది. అయితే ఈ సినిమాలకి కామన్ ఫ్యాక్టర్ ఒకటుంది. అవే అత్యధిక షూటింగ్ డేస్. ఈ నాలుగు ఫ్రాంచైజ్ లలో మణిరత్నం పొన్నియన్ సెల్వన్ మాత్రమే ఏడాది కంటే తక్కువ షూటింగ్ డేస్ లో కంప్లీట్ అయ్యింది.

మణిరత్నం ఈ రెండు భాగాలు షూట్ చేయడానికి కేవలం 210 రోజులు టైమ్ మాత్రమే తీసుకున్నారు. తరువాత బాహుబలి ఫ్రాంచైజ్ షూటింగ్ కోసం రాజమౌళి ఏకంగా 658 రోజులు తీసుకున్నారు. అంటే ఏడాదిన్నర కంటే ఎక్కువ డేస్ ని బాహుబలి 1, 2 కోసం రాజమౌళి కేటాయించారు. కేజీఎఫ్ చాప్టర్ 1, చాప్టర్ 2 షూటింగ్ ఏకంగా 1210 రోజులు ప్రశాంత్ నీల్ స్పెండ్ చేశారు. కరోనా కారణంగా ఈ మూవీ షూటింగ్ రెండేళ్లు ఆలస్యం అయ్యింది లేకుంటే కాస్త తొందరగానే ఫినిష్ అయ్యేది.

సుకుమార్ దర్శకత్వంలో ఐకాన్ స్టార్ అల్లు అర్జున్ హీరోగా తెరకెక్కుతోన్న పుష్ప ఫ్రాంచైజ్ సినిమాల షూటింగ్ కోసం ఎక్కువ రోజులు తీసుకుంటున్నారు. పుష్ప 1, పుష్ప 2 సినిమాల కోసం ఏకంగా 1085 రోజులు సుకుమార్ అండ్ కో స్పెండ్ చేస్తున్నారు. తెలుగులో అత్యధిక కాలం షూటింగ్ జరుపుకుంటున్న ఫ్రాంచైజ్ గా పుష్ప సిరీస్ నిలవబోతోంది.

అత్యధిక షూటింగ్ డేస్ రికార్డ్ ని నెక్స్ట్ రాబోయే ఫ్రాంచైజ్ సినిమాలైన సలార్, దేవర, కల్కి 2898ఏడీ బ్రేక్ చేస్తాయా లేదంటే తక్కువ రోజుల్లోనే పూర్తవుతాయా అనేది చూడాలి. ఇలా సుదీర్ఘ కాలం స్టార్ హీరోలు షూటింగ్ లకి పరిమితం అయిపోవడం వలన కనీసం ఏడాదికి ఒక్క సినిమా కూడా ప్రేక్షకుల ముందుకి రావడం లేదనేది సినీ విశ్లేషకుల మాట. కచ్చితంగా షూటింగ్ సమయాన్ని తగ్గించుకోవాల్సిన అవసరం ఉందని వారు సూచిస్తున్నారు.