'హనుమాన్' కి బీజేపీ సపోర్ట్.. క్లారిటీ ఇచ్చిన దర్శకుడు!

టాలీవుడ్ లో వచ్చే సంక్రాంతి బరిలో అగ్ర హీరోల సినిమాలతో పాటు ఓ చిన్న సినిమా కూడా రిలీజ్ కాబోతోంది. ఆ సినిమా పేరే 'హనుమాన్'. టాలీవుడ్ లో తన ఫిలిం మేకింగ్ తో ఆకట్టుకున్న యంగ్ డైరెక్టర్ ప్రశాంత్ వర్మ దర్శకత్వంలో తేజ సజ్జా హీరోగా నటిస్తున్న మూవీ ఇది. గతంలో ఈ కాంబినేషన్లో వచ్చిన 'జాంబిరెడ్డి' బ్లాక్ బస్టర్ హిట్ అవ్వడంతో మరోసారి వీరి కాంబినేషన్లో రాబోతున్న 'హనుమాన్' పై ముందు నుంచే మంచి అంచనాలు నెలకొన్నాయి.

రీసెంట్ గా రిలీజ్ అయిన టీజర్ ఆడియన్స్ నుంచి భారీ రెస్పాన్స్ అందుకోగా ఈరోజు చిత్ర ట్రైలర్ ను రిలీజ్ చేశారు మేకర్స్. తాజాగా రిలీజ్ అయిన హనుమాన్ ట్రైలర్ సినిమాపై అంచనాలను మరింత పెంచేసింది. ట్రైలర్ ని బట్టి చూస్తే సినిమా విజువల్ వండర్ గా ఉండబోతుందని అర్థమవుతుంది. డైరెక్టర్ ప్రశాంత్ వర్మ హీరో తేజసజ్జా ఈ సినిమాతో ఫస్ట్ టైం పాన్ ఇండియా మార్కెట్లోకి ఎంట్రీ ఇస్తున్నారు.

కచ్చితంగా హనుమాన్ పాన్ ఇండియా లెవెల్ లో సక్సెస్ అవుతుందని మూవీ టీమ్ ఎంతో కాన్ఫిడెంట్ గా ఉంది. ఇక తాజాగా ట్రైలర్ రిలీజ్ సందర్భంగా ప్రెస్ మీట్ ఏర్పాటు చేశారు. ఈ ప్రెస్ మీట్ లో హీరో తేజ సజ్జాకి ఓ ఆసక్తికర ప్రశ్న ఎదురైంది. ఆ ప్రశ్నకు తేజ కాకుండా దర్శకుడు ప్రశాంత్ వర్మ సమాధానం ఇవ్వడం విశేషం. ఈ ప్రెస్ మీట్ లో భాగంగా ఓ విలేఖరి 'మీ వెనకాల బీజేపీ సపోర్ట్ ఏమైనా ఉందా?' అని అడిగితే అందుకు డైరెక్టర్ ప్రశాంత్ వర్మ బదులిస్తూ.." ఇప్పటివరకు అయితే లేదు సార్.. సినిమా రిలీజ్ అయ్యాక కచ్చితంగా ఉండొచ్చేమో" అంటూ చెప్పుకొచ్చాడు.

అంతేకాకుండా సంక్రాంతికి ఈ సినిమాను వీలైనన్ని ఎక్కువ థియేటర్స్ లో విడుదల చేసేందుకు ప్రయత్నిస్తున్నామని, ఇప్పటివరకు తెలుగులో 400 థియేటర్స్ హిందీలో 1500 థియేటర్స్ లో సినిమాని విడుదల చేస్తున్నట్లు దర్శకుడు ప్రశాంత్ వర్మ తెలిపారు. సూపర్ హీరో ఫిల్మ్ గా ప్రేక్షకుల ముందుకు వస్తున్న హనుమాన్ మూవీని అన్ని ప్రాంతీయ భాషలతో పాటు చైనా, జపాన్, రష్యా సహా మొత్తం 11 దేశాల్లో విడుదల చేయబోతున్నారు.

తాజాగా రిలీజ్ అయిన ట్రైలర్ ను కూడా ఇండియన్ లాంగ్వేజీలతో పాటు ఇతర దేశాల భాషల్లోనూ విడుదల చేశారు. ప్రైమ్ షో ఎంటర్టైన్మెంట్స్ బ్యానర్ పై కే. నిరంజన్ రెడ్డి నిర్మిస్తున్న ఈ చిత్రంలో తేజ సజ్జా సరసన అమృత అయ్యర్ హీరోయిన్ గా నటిస్తోంది. ప్రముఖ తమిళ నటి వరలక్ష్మి శరత్ కుమార్, వినయ్ రాయ్, గెటప్ శ్రీను తదితరులు ఇతర కీలక పాత్రలు పోషిస్తున్నారు.