థాయ్ సినిమా రీమేక్ లో హీరో వార‌సుడు!

మిస్ట‌ర్ ప‌ర్ పెక్ట్ నిస్ట్ అమీర్ ఖాన్ వార‌సుడు జునైద్ ఖాన్ బాలీవుడ్ లో లాంచ్ అయిన సంగ‌తి తెలిసిందే. ప్ర‌స్తుతం కెరీర్ నిల‌దొక్కుకునే ప్ర‌య‌త్నాల్లో ఉన్నాడు. తాజాగా జునైద్ హీరోగా అమీర్ ఓ చిత్రాన్ని నిర్మించ‌డానికి రెడీ అవుతున్నారు. త‌న‌యుడి కోసం ఏకంగా థాయ్ సినిమానే రీమేక్ చేస్తున్నారు. 2016 లో విడుద‌లైన థాయ్ మూవీ `వ‌న్ డే` మంచి విజ‌యాన్ని సాధించింది. అదొక రొమాంటిక్ ప్రేమ‌క‌థా చిత్రం.

ప్ర‌మాదంలో జ్ఞాప‌క‌శ‌క్తిని కోల్పోయిన అమ్మాయి ప్రియుడిగా ఒక్క రోజు న‌టించ‌డానికి అంగీక‌రించిన ఓ సాప్ట్ వేర్ ఉద్యోగి క‌థ ఇది. క‌థ‌..న‌ట‌న‌..అబ‌ద్దాలు..ఘ‌ర్ష‌ణ‌..త్యాగం..ప్రేమ ఇలా అన్నీర‌కాల భావోద్వేగాల‌తో తెర‌కెక్కిన సినిమా విమ‌ర్శ‌కుల ప్ర‌శంస‌లందుకుంది. ఈ సినిమా అంటే అమీర్ కి ఎంతో ఇష్టం. ఎప్ప‌టి నుంచో ఈ చిత్రాన్నిరీమేక్ చేయాల‌ని ప్ర‌య‌త్నిస్తున్నారు. ఇప్పుడా స‌మ‌యం ఆస‌న్న‌మైంది.

సినిమా రైట్స్ తీసుకున్నట్లు తెలుస్తోంది. ఇలాంటి క‌థ‌లో త‌న‌యుడిని బాగం చేయాల‌న్న నిర్ణ‌యంతో తానే నిర్మాత‌గా మారారు. అమీర్ ఖాన్ కి స్నేహితుడైన సునీల్ పాండే ఈ చిత్రాన్ని తెర‌కెక్కించ‌నున్నట్లు స‌మాచారం. మాతృక‌లో ఈ చిత్రాన్ని బంజాంగ్ పిసంత‌న‌కున్ తెర‌కెక్కించారు. మ‌రి ఈ రీమేక్ చిత్రాన్ని ఎప్పుడు ప్రారంభిస్తారు? ఎప్పుడు రిలీజ్ చేస్తారు? అన్న‌ది తెలియాలి.

అమీర్ ఖాన్ `లాల్ సింగ్ చ‌డ్డా` ప‌రాజ‌యం త‌ర్వాత విరామం ప్ర‌క‌టించిన సంగ‌తి తెలిసిందే. కొంత గ్యాప్ తీసుకున్న అనంత‌రం కొత్త ప్రాజెక్ట్ ప్ర‌క‌టిస్తాన‌ని తెలిపారు. అయితే నిర్మాణ ప‌రంగా తాను చేప‌ట్టాల్సిన ప‌న‌లకు మాత్రం బ్రేక్ వేయ‌లేదు. య‌ధావిధిగా ఆ ప‌నులు మ‌రోవైపు జ‌రుగుతూనే ఉన్నాయి. అలాగే వ్య‌క్తిగ‌త జీవితంలో పిల్ల‌ల‌కు కావాల్సినంత స‌మ‌యాన్ని కేటాయిస్తున్నారు.