బోయ‌పాటి మైండ్ లో ఇప్పుడా ఇద్ద‌రు!

మాస్ డైరెక్ట‌ర్ బోయ‌పాటి నెక్స్ట్ ఏ హీరోతో ప‌నిచేస్తారు? అన్న దానిపై స‌రైన క్లారిటీ లేదు. 'అఖండ‌'తో బ్లాక్ బ‌స్ట‌ర్ అందుకున్నా అటుపై రిలీజ్ అయిన 'స్కంద‌'తో డీలా ప‌డాల్సిన స‌న్నివేశం ఎదురైంది. రామ్ హీరోగా న‌టించిన ఈ సినిమా భారీ అంచ‌నాల మ‌ధ్య రిలీజ్ అయినా వాటిని అందుకోవ‌డంలో పూర్తిగా విఫ‌ల‌మైంది. దీంతో బోయ‌పాటి త‌దుప‌రి ఏ హీరోతో సినిమా చేస్తారు? అన్న దానిపై స‌స్పెన్స్ నెల‌కొంది. మ‌రోవైపు బాల‌య్య తో 'అఖండ‌-2' ప్లాన్ చేస్తున్న‌ట్లు ప్ర‌చారం సాగుతుంది. కానీ అది ఇప్పుడే సాధ్య‌మ‌వుతందా? అన్న దానిపై స్ప‌ష్టత లేదు.

బాల‌య్య 109వ సినిమాని ప్ర‌స్తుతం బాబి తెర‌కెక్కిస్తున్నాడు. 110 ఛాన్స్ బోయ‌పాటికి ఇవ్వ‌డంలో బాల‌య్యకి ఎలాంటి అభ్యంత‌రం ఉండ‌దు? కానీ క‌థ కుద‌రాలి. బాల‌య్య తో కొడితే హిట్ త‌ప్ప మ‌రో మాట ఉండ‌కూడ‌దు అన్న‌ది ఆ ద్వ‌యం న‌మ్మ‌కం స‌హా అభిమానుల మాట కూడా అదే. కాబ‌ట్టి ఆషామాషీ గా క‌థ‌రాసి కంగారు గా చేయాల్సిన సినిమా కాదు. ఆ విష‌యంలో బోయ‌పాటి ఏమాత్రం రాజీ ప‌డ‌రు. స‌మ‌యం తీసుకున్నా బాల‌య్య అభిమానులు కాల‌రెగ‌రేసేలా ఉంటుంది? త‌ప్ప మ‌డ‌త పెట్టేలా ఉండ‌దు.

మ‌రి ఉన్న స‌మ‌య‌లో బాల‌య్య‌తో 'అఖండ‌-2' సాధ్య‌మ‌వుతుందా? లేదా? అన్న‌ది చూడాలి. అయితే బోయ‌పాటి మాత్రం మ‌రో ఇద్ద‌రు హీరోల‌పై గురి పెట్టిన‌ట్లు తాజాగా వినిపిస్తోంది. వారే నేచుర‌ల్ స్టార్ నాని...యంగ్ హీరో నిఖిల్. నిఖిల్ ఇప్ప‌టికే పాన్ ఇండియా స్టార్. 'కార్తికేయ‌-2' తో తానేంటో నిరూపించుకున్నాడు. ప్ర‌స్తుతం పిరియాడిక్ స్టోరీ నేప‌థ్యంలో 'స్వ‌యంభు' చేస్తున్నాడు. ఇది రిలీజ్ అయి హిట్ అయితే అత‌డి పాన్ ఇండియా మార్కెట్ రెట్టింపు అవుతుంది. అలాగే నాని కూడా 'ద‌స‌రా'తో పాన్ ఇండియాలోకి అడుగు పెట్టాడు.

అది పాన్ ఇండ‌యాకి క‌నెక్ట్ కాలేదు గానీ భారీ విజ‌యం సాధించింది. దీంతో అత‌డిప్పుడు పాన్ ఇండియా సినిమా కోసం చూస్తున్నాడు. ఈ నేప‌థ్యంలో బోయ‌పాటి క‌న్ను వాళ్లిద్ద‌రిపై ప‌డిన‌ట్లు ఫిలిం స‌ర్కిల్స్ లో వినిపిస్తుంది. వాళ్లిద్ద‌ర్ని దృష్టిలో పెట్టుకుని ఒకే స్టోరీ సిద్దం చేస్తున్న‌ట్లు స‌మాచారం. వాళ్లిద్ద‌రిలో ఎవ‌రో ఒక‌ర్ని మెప్పించి లాక్ చేయాల‌న్న‌ది బోయ‌పాటి ప్లాన్ గా తెలుస్తుంది. ఇద్ద‌రిలో ఎవ‌రు ఒకే చెప్పినా? వాళ్ల బిజీ షెడ్యూల్ అనంత‌రం ప‌ట్టాలెక్కించేలా ప్ర‌ణాళిక ర‌చిస్తున్న‌ట్లు ఇన్ సైడ్ టాక్ వినిపిస్తుంది. మ‌రి ఈ ప్ర‌చారంలో నిజ‌మెంతో తెలియాలి.