బాక్సాఫీస్ హిట్.. ఈ బ్యూటీలకు చాలా అవసరం 'బ్రో'

పవర్ స్టార్ పవన్ కళ్యాణ్, మెగా మేనల్లుడు సాయి ధరమ్ తేజ్ కలిసి చేస్తున్న సినిమా బ్రో. తొలిసారి మామ, అల్లుళ్లు కలిసి నటిస్తుండటంతో, ఈ మూవీపై ఎక్కువ అంచనాలు ఉన్నాయి. ముందు నుంచి ఈ మూవీ పై హైప్ పెంచుతూ వస్తున్నారు. ముఖ్యంగా పవన్ ని వింటేజ్ లుక్ లో చూపించడం అందరికీ నచ్చుతోంది.

ఇటీవల ట్రైలర్ విడుదల చేయగా, విపరీతంగా నచ్చేసింది. కేవలం పవన్ కోసమే ఈ మూవీచూసేవాళ్లు ఉన్నారు. అయితే, ఈ మూవీపై ఎక్కువ ఆశలు పెట్టుకుంది మాత్రం హీరోయిన్లే. ఈ మూవీలో ఇద్దరు హీరోయిన్లు నటిస్తున్నారు. ఒకరు కేతిక శర్మ కాగా, మరొకరు ప్రియా వారియర్. ఇప్పుడు బ్రో మూవీ హిట్ అవ్వడం పవన్, తేజ్ కి అంతగా అవసరం కాకపోయినా.. కానీ, వీరికి మాత్రం చాలా అవసరం.

ఎందుకంటే, ఈ ఇద్దరు బ్యూటీలకు ఇప్పటి వరకు మంచి హిట్ పడింది లేదు. కేతిక కి తెలుగులో ఇది నాలుగో చిత్రం. ముందు చేసిన మూడు సినిమాలు బాక్సాఫీసు వద్ద బోల్తా పడ్డాయి. రొమాంటిక్, లక్ష్య, రంగ రంగ వైభవంగా, ఈ మూడు చిత్రాల్లో కేతిక అందంగా కనిపించినా, మంచి నటన కనపరిచినా, ఆమెను అదృష్టం వరించలేదు. ఫలితంగా, ఆమె ఆశలన్నీ బ్రో మూవీ మీదే పెట్టుకుంది. బ్రో మూవీ క్లిక్ అయితేనే కేతికకు మళ్లీ ఛాన్సులు వచ్చే అవకాశం ఉంది.

ఇక ప్రియా వారియర్ ది కూడా ఇంచు మించు అదే పరిస్థితి. తెలుగులో నితిన్ చెక్ మూవీలో, అదేవిధంగా, తేజ సజ్జ సరసన ఇష్క్ అనే మూవీల్లో నటించింది. ఈ రెండూ కూడా క్లిక్ కాలేకపోయాయి. ఈ రెండు సినిమాల తర్వాత ఆమెకు తెలుగులో అవకాశం రావడానికి కూడా చాలా కాలం పట్టింది. ఇప్పుడు ఈ బ్రో మూవీలో నటిస్తోంది. అందుకే, మళ్లీ ఆమె తెలుగులో క్లిక్ అవ్వాలి అంటే, ఈ బ్రో కచ్చితంగా బ్లాక్ బస్టర్ కావాల్సిందే.

ఇక, ఈ మూవీ క్లిక్ కావాలంటే పవన్ మ్యాజిక్ చేయాల్సిందే. పవన్ చేతిలోనే ఇద్దరు ముద్దుగుమ్మల భవిష్యత్తు ఆధారపడి ఉంది అని చెప్పడంలో ఎలాంటి అతిశయోక్తి లేదు. ఇక, ఈ మూవీ జులై 28వ తేదీన ప్రేక్షకుల ముందుకు రానుంది.