క‌త్తి తిప్పిన‌ గాయ‌ని.. ఇంటికొచ్చిన పోలీసులు..!

ప్ర‌ముఖ గాయ‌ని క‌సాయి క‌త్తులు తిప్పుతూ డ్యాన్సు చేసింది. ఆ క‌త్తులు త‌న ఒంటిని గాయ‌ప‌రుస్తాయ‌న్న సెన్స్ కూడా లేదు. స‌ద‌రు గాయ‌ని ప్ర‌మాద‌క‌ర విన్యాసాలు అభిమానుల‌ను తీవ్రంగా క‌ల‌వ‌ర‌పెట్టాయి. గాయ‌ని విన్యాసాల‌కు సంబంధించిన వీడియోలు క్ష‌ణాల్లో అంత‌ర్జాలంలో వైర‌ల్ అయ్యాయి. వెంట‌నే ఆమె ఇంటి ముందు పోలీస్ వ్యాన్ అలార్మ్ మోగించింది. ఆ త‌ర్వాత‌ ఏం జ‌రుగుతోంది? అంటే.. ఇంట్లో జొర‌బ‌డిన పోలీస్ స‌ద‌రు గాయ‌నిని విచారించారు.

కసాయి కత్తులతో ప్ర‌ముఖ పాప్ గాయ‌ని బ్రిట్నీ స్పియర్స్ ప్ర‌మాద‌క‌ర విన్యాసాలు ఇప్పుడు హాట్ టాపిక్. బ్రిట్నీ అలా క‌త్తుల‌తో డ్యాన్స్ లు చేసిన‌ వీడియో ఇంట‌ర్నెట్ లో వైర‌ల్ అయింది. వెంట‌నే పోలీసులు వెల్‌నెస్ చెక్ కోసం పాప్ సింగర్‌ని సందర్శించడం హాట్ టాపిక్ గా మారింది. నిజానికి ట్యాలెంటెడ్ బ్రిట్నీ స్పియర్స్ ప్ర‌వ‌ర్త‌న ఇటీవ‌ల వింత‌గా ఉంద‌నేది ఒక సెక్ష‌న్ నెటిజ‌నుల అభిప్రాయం. పాప్ ప్రిన్సెస్ గా యువ‌త‌రం గుండెల్లో కొలువున్న బ్రిట్నీ వికృత చేష్ట‌ల‌తో అంతా షాక్ కి గుర‌య్యారు. తన చేతిలో రెండు కసాయి కత్తులతో డ్యాన్స్ చేస్తున్న వీడియో క్ష‌ణాల్లో వైర‌ల్ అయింది. ఈ వైరల్ వీడియో అభిమానులను తీవ్ర‌ ఆందోళనకు గురి చేసింది.

బ్రిట్నీ స్పియర్స్ కొంతకాలంగా విచిత్రమైన వీడియోలను షేర్ చేస్తోంది. అవ‌న్నీ అభిమానుల‌ను తీవ్రంగా క‌ల‌వ‌ర‌పెడుతున్నాయి. మంగళవారం (25.09.23) పోస్ట్ చేసిన తన మొదటి నైఫ్-డ్యాన్స్ వీడియోలో బ్లేడ్‌లు నిజమైనవి కావని పేర్కొంది. కానీ ఆమె అభిమానులు చాలా మంది అది న‌మ్మ‌లేదు. త‌న‌ను సహాయం పొందమని కోరారు. ఆమె తన చేతుల్లో ఒకదానిని కట్టుకట్టినట్లు, చేయి కాలుపై స్పష్టమైన కోతలను చూపించే ఫాలో అప్ వీడియోను పోస్ట్ చేసిన తర్వాత బ్రిట్నీ విభ్రాంతిలో ఉంద‌ని ఫ్యాన్స్ భావించారు. తాజాగా వైరల్ అయిన వీడియోలో కత్తులతో నృత్యం భ‌య‌పెట్టింది. బ్రిట్నీ, పోల్కా-డాట్ క్రాప్ టాప్ - వైట్ బికినీ బాటమ్స్ ధరించి ప్రమాదకరమైన చేష్ట‌ల‌తో డ్యాన్సులాడుతూ దాదాపుగా గాయపడింద‌ని కూడా చెబుతున్నారు. తాజా మీడియా క‌థ‌నాల ప్రకారం, వెంచురా కౌంటీ పోలీసు అధికారులు వెల్‌నెస్ చెక్ కోసం పాప్ సింగర్‌ని సందర్శించారు. వారు బ్రిట్నీ బాగానే ఉన్నారని కూడా ధృవీకరించారు. బ్రిట్నీ స్పియర్స్ కసాయి కత్తులతో డ్యాన్స్ చేయ‌డంపై ఇప్పుడు నెటిజ‌నులు రెండు వ‌ర్గాలుగా విడిపోయి వాదించుకుంటున్నారు. పాప్ యువరాణి త‌న క్రియేటివిటీని ప్ర‌ద‌ర్శించేందుకు మాత్ర‌మే ఇలా చేసింద‌ని కొంద‌రు వ్యాఖ్యానిస్తుండగా, త‌న‌కు మానసిక ప‌రిస్థితి బాలేద‌ని చాలా మంది వ్యాఖ్యానిస్తున్నారు.

లైట్ తీస్కోమంటోంది..

ఇంత‌లోనే బ్రిట్నీ స్పియర్స్ నుంచి ఒక ప్ర‌క‌ట‌న‌.. తన నైఫ్ డ్యాన్స్ గురించి లైట్ తీస్కోమ‌ని బ్రిట్నీ అభిమానులకు చెప్పింది. 41 ఏళ్ల బ్రిట్నీ గత రెండు రోజులుగా తన LA మాన్షన్‌లో రెండు భారీ బ్లేడ్‌లతో గైరేటింగ్ చేస్తున్న రెండు వీడియోలను పోస్ట్ చేయడంతో ఆమె భద్రత మానసిక ఆరోగ్యంపై భయాలను రేకెత్తించింది. ఈ వీడియోల్లో రెండవ క్లిప్‌లో త‌ను కట్టు ధరించి కనిపించ‌డంతో ఇది మ‌రింత‌గా భ‌య‌పెట్టింది. త‌న‌ చేయి కాలు మీద కోతలు క‌నిపించడంతో అంతా భ‌య‌ప‌డ్డారు.

కానీ బుధవారం తన ఇన్‌స్టాగ్రామ్‌లో పోస్ట్ చేసిన వీడియోలో 42.1 మిలియన్ల మంది ఫాలోయర్‌లకు ఇలా చెప్పింది: "నేను షకీరా (కోతి ముఖం ఎమోజి)ను కాపీ చేసాను. ఆ కత్తుల గురించి లైట్ తీస్కోండి! అని వ్యాఖ్యానించింది. ఈ నెల ప్రారంభంలో MTV VMAలలో ప్ర‌త్యేకంగా అలంక‌రించిన‌ కత్తులతో డ్యాన్స్ చేస్తున్న షకీరా (46) గురించి ప్రస్తావించింది. బాకుల నృత్యం అంటూ అరబిక్ నృత్యానికి ఇది నివాళిగా భావించ‌మ‌ని కూడా బ్రిట్నీ ప‌రోక్షంగా హింట్ ఇచ్చింది.

అయితే బ్రిట్నీ కొంత అభ‌ద్ర‌తాభావంతో ఉంటోందని, కత్తులను ఒక రకమైన రక్షణగా చూస్తుందని కూడా మీడియాలో క‌థ‌నాలొచ్చాయి. తన బెడ్‌రూమ్‌ సహా తన ఇంటి చుట్టూ క‌త్తుల‌ను ఉంచుతుందని కూడా క‌థ‌నంలో పేర్కొన్నారు. పాపుల‌ర్ మ్యాగ‌జైన్ TMZ నివేదిక‌ ప్రకారం బ్రిట్నీకి కత్తులతో అబ్సెషన్ (పిచ్చి) ఉంది. బ్రిట్నీ తన LA ఇంటి గోడలపై బ్లేడ్లు విసిరినట్లు కూడా సోర్సెస్ చెబుతున్నాయి. కేవలం 14 నెలల తన భర్త సామ్ అస్గారి ( 29) ఆగస్టులో విడాకుల కోసం దరఖాస్తు చేసిన సంగ‌తి తెలిసిందే. చాలాకాలంగా బ్రిట్నీ బైపోలార్ డిజార్డర్‌తో బాధపడుతున్నట్లు 2021లో ఒక‌సారి తనే స్వ‌యంగా వెల్లడించింది. ఆమె అల్లకల్లోలమైన జీవితం దీనికి కార‌ణమ‌ని కొంద‌రు నెటిజ‌నులు విశ్లేషిస్తున్నారు.