చిన్న పృథ్వీరాజ్ కు బంపర్ ఆఫర్.. ఆ పాత్రే మళ్లీ

ఇప్పుడు ప్రపంచమంతా ఎక్కడ విన్నా ఒక్కటే మాట వినిపిస్తుంది. అదే సలార్. శుక్రవారం విడుదలైన ఈ సినిమా బాక్సాఫీస్ వద్ద బ్లాక్ బస్టర్ హిట్ గా నిలిచింది. సినిమా హిట్ అవ్వడమే కాదు కలెక్షన్ల సునామీ సృష్టిస్తోంది. బాహుబలి తర్వాత ఇన్నాళ్లకు ఈ సినిమాతో భారీ హిట్ ను తన ఖాతాలో వేసుకున్నారు పాన్ ఇండియా స్టార్ ప్రభాస్. ఎక్కువగా డైలాగులు లేకపోయినప్పటికీ కటౌట్ తోనే అందరినీ మెప్పించారు ప్రభాస్.

ఈ సినిమా రిలీజ్ కు ముందు ప్రమోషన్లను పెద్దగా నిర్వహించలేదు సలార్ మేకర్స్. రాజమౌళి ఇంటర్వ్యూ కాకుండా ఇంకే విధంగా చిత్ర బృందం సందడి చేయలేదు. కానీ మూవీ విడుదలైన తర్వాత సినిమాలోని నటీనటుల ఇంటర్వ్యూలు ఒక్కొక్కటిగా బయటకు వస్తున్నాయి. తాజాగా పృథ్వీరాజ్ సుకుమారన్ పాత్ర చేసిన చైల్డ్ ఆర్టిస్ట్ కార్తికేయ ఇంటర్వ్యూ ప్రస్తుతం నెట్టింట వైరల్ గా మారింది.

సలార్ మూవీలో చిన్నప్పటి పృథ్వీరాజ్ సుకుమారన్ రోల్ లో చైల్డ్ ఆర్టిస్ట్ కార్తికేయ దేవ్ నటించాడు. ప్రస్తుతం తాను పదో తరగతి చదువుకుంటున్నట్లు ఆ ఇంటర్వ్యూలో తెలిపాడు. తన సొంతూరు ప్రకాశం జిల్లా అని, కొన్నేళ్ల క్రితం హైదరాబాద్ లో సెటిల్ అయ్యామని చెప్పాడు. ఓ కాస్టింగ్ డైరెక్టర్ ద్వారా తనకు సలార్ ఆడిషన్స్ కు వెళ్లే ఛాన్స్ వచ్చిందని చెప్పాడు.

మూవీ ఆడిషన్స్ కు అనేక మంది వచ్చారని, కానీ తన యాక్టింగ్ నచ్చడంతో ప్రశాంత్ నీల్ ఛాన్స్ ఇచ్చారని కార్తికేయ దేవ్ తెలిపాడు. అయితే సలార్ మూవీలో యాక్టింగ్ చూసి తనకు పృథ్వీరాజ్ సుకుమారన్ మరో ఆఫర్ ఇచ్చారని చెప్పాడు. లూసిఫర్ సీక్వెల్ లో పృథ్వీరాజ్ చిన్నప్పటి రోల్ కు ఆయనే తనను సెలెక్ట్ చేశారని వెల్లడించాడు. లూసిఫర్ సినిమాను తెలుగులో మెగాస్టార్ చిరంజీవి గాడ్ ఫాదర్ గా రీమేక్ చేసిన విషయం తెలిసిందే.

అయితే కార్తికేయ దేవ్.. టాలీవుడ్ మాస్ మహా రాజా రవితేజ బంధువు అని సినీ వర్గాల్లో టాక్ వినిపిస్తోంది. రవితేజ బ్రదర్ కొడుకే కార్తికేయ అని కొందరు నెటిజన్లు చెబుతున్నారు. సలార్ సినిమాలో పృథ్వీరాజ్ సుకుమారన్ చిన్నప్పటి రోల్ లో కార్తికేయ అద్భుతంగా నటించాడని ప్రశంసల వర్షం కురిపిస్తున్నారు. లూసిఫర్-2లో ఛాన్స్ దక్కించుకోవడంతో నక్క తోక తొక్కాడని అంటున్నారు.