'స్పిరిట్'.. సర్‌ప్రైజ్ ఇచ్చిన స్టార్ ప్రొడ్యూసర్!

రెబల్ స్టార్ ప్రభాస్, అర్జున్ రెడ్డి దర్శకుడు సందీప్ రెడ్డి వంగా కాంబినేషన్ లో ''స్పిరిట్'' అనే సినిమా తెరకెక్కనున్న సంగతి తెలిసిందే. అప్పుడెప్పుడో ప్రభాస్ సిల్వర్ జూబ్లీ మూవీగా అనౌన్స్ చేయబడిన ఈ ప్రాజెక్ట్.. ఎట్టకేలకు పట్టాలెక్కడానికి రెడీ అవుతోంది. ప్రస్తుతం ఈ మూవీ ప్రీ ప్రొడక్షన్ పనులు శరవేగంగా జరుగుతున్నాయి. నిత్యం ఏదొక విధంగా వార్తల్లో నిలుస్తున్న ఈ సినిమాకి సంబంధించిన క్రేజీ అప్డేట్ అందించారు నిర్మాత భూషణ్‌ కుమార్‌. షూటింగ్ అప్డేట్ తో పాటుగా రిలీజ్ ఎప్పుడనే విషయాన్ని కూడా ప్రకటించారు.

ఇటీవల ‘భూల్‌ భూలయ్యా 3’ ప్రమోషన్స్ లో భాగంగా భూషణ్ కుమార్ ఓ ఇంటర్వ్యూలో మాట్లాడుతూ.. ''స్పిరిట్'' మూవీ వచ్చే నెల నుంచే సెట్స్ పైకి వస్తుందని తెలిపారు. డిసెంబర్ నెలాఖరుకు షూట్ స్టార్ట్ చేస్తామని, ఇంకా కాస్టింగ్ ను ఫైనలైజ్ చెయ్యలేదని చెప్పారు. ప్రభాస్ లుక్ మాత్రం ఫైనలైజ్ అయిందని చెప్పారు. ఇప్పుడు లేటెస్టుగా మరో ఇంటర్వ్యూలో నిర్మాత ఈ సినిమా గురించి మాట్లాడారు. ''ప్రభాస్, సందీప్ వంగాలది డ్రీమ్ కాంబినేషన్. ఈ కాంబో సంచలనాలు సృష్టిస్తుందని నేను భావిస్తున్నాను. ప్రభాస్ సైతం సందీప్ తో కలిసి పనిచేయడానికి సూపర్ డూపర్ ఎగ్జైటెడ్ గా ఉన్నారు'' అని తెలిపారు. 2026 మధ్యలో ఈ చిత్రాన్ని విడుదల చేస్తామని ప్రకటించారు.

'యానిమల్' సీక్వెల్ గా రూపొందనున్న 'యానిమల్ పార్క్' మూవీపై భూషణ్ కుమార్ స్పందించారు. 'స్పిరిట్' సినిమా పూర్తి చేసిన తర్వాతే మోస్ట్ యాంటిసిపేటెడ్ సీక్వెల్ స్టార్ట్ అవుతుందని చెప్పారు. ''స్పిరిట్ సినిమాని 6 నెలల్లో పూర్తి చేసి 2026 మిడాఫ్ లో రిలీజ్ చేస్తాం. ఆ వెంటనే సందీప్ వంగా 6 నెలల పాటు 'యానిమల్ పార్క్' స్క్రిప్ట్ మీద వర్క్ చేస్తాడు. యానిమల్ పార్క్ కోసం సందీప్ మైండ్ లో ఇప్పటికే రఫ్ ఐడియా రెడీగా ఉంది. ఖచ్చితంగా 2027 ప్రారంభంలో ఈ ప్రాజెక్ట్ ను స్టార్ట్ చేస్తాం. ఈ మేరకు రణబీర్ కపూర్ ను కూడా లాక్ చేసాం'' అని నిర్మాత చెప్పుకొచ్చారు. ప్రస్తుతానికైతే ప్రభాస్ మూవీపైనే ఫుల్ ఫోకస్ పెట్టినట్లు క్లారిటీ ఇచ్చారు.

మొత్తం మీద 'స్పిరిట్' సినిమా ఎప్పుడు సెట్స్ మీదకు వెళ్లినా, ఆరు నెలల్లోనే పూర్తి చెయ్యాలనే ప్లాన్ తో మేకర్స్ ఉన్నట్లు అర్థమవుతోంది. ప్రభాస్ ప్రస్తుతం మారుతీతో 'ది రాజాసాబ్' పనుల్లో బిజీగా ఉన్నారు. హను రాఘవపూడి దర్శకత్వంలో 'ఫౌజీ' మూవీనిసెట్స్ పైకి తీసుకొచ్చారు. వీటితో పాటు సందీప్ వంగా సినిమాని స్టార్ట్ చెయ్యాలని చూస్తున్నారని తెలుస్తోంది. ఈ మధ్యనే ఈ సినిమాకి సంబంధించి మ్యూజిక్ సిట్టింగ్స్ కూడా ప్రారంభమయ్యాయి. హర్షవర్షన్ రామేశ్వర్ కొన్ని థీమ్ మ్యూజిక్స్ రెడీ చేస్తున్నారు. మరోవైపు నటీనటుల ఎంపిక జరుగుతోంది.

'స్పిరిట్' అనేది ఒక పోలీస్ స్టోరీ. ఇందులో పోలీసాఫీసర్ గా కనిపించబోతున్నారు ప్రభాస్. మునుపెన్నడూ చూడని కొత్త లుక్ లో కనిపిస్తారని అంటున్నారు. మేకోవర్ కోసం ఎంత టైమ్ తీసుకుంటారో చూడాలి. ఇక సౌత్ కొరియన్ యాక్టర్ డాన్ లీని ఈ సినిమాతో ఇండియన్ స్క్రీన్ మీదకు తీసుకొస్తారని జోరుగా ప్రచారం జరుగుతోంది. అలానే సైఫ్ అలీఖాన్, కరీనా కపూర్ ఖాన్ జంట కీలక పాత్రల్లో నటించనున్నారని అంటున్నారు. ఇందులో ప్రభాస్ కు జోడీగా ఏ హీరోయిన్ ను తీసుకుంటారనేది ఆసక్తికరంగా మారింది.

టీ-సిరీస్ & భద్రకాళి పిక్చర్స్ బ్యానర్స్ పై సంయుక్తంగా భారీ బడ్జెట్ తో ఈ కాప్ డ్రామాని నిర్మించనున్నారు. భూషణ్ కుమార్, క్రిషన్ కుమార్, ప్రణయ్ రెడ్డి వంగా నిర్మాతలుగా వ్యవహరిస్తారు. 'స్పిరిట్' చిత్రాన్ని పాన్ ఏషియన్ మూవీగా రూపొందించనున్నారు. తెలుగు హిందీ తమిళం కన్నడ మలయాళం వంటి ఆరు ప్రధాన భారతీయ భాషలతో పాటుగా.. మాండరిన్, జపనీస్, కొరియన్ వంటి ఇంటర్నేషనల్ లాంగ్వేజెస్ లోనూ ఈ సినిమాని రిలీజ్ చేయనున్నారు.