'పుష్ప 2' ఐటెం గర్ల్.. వీరిలో మీ ఓటు ఎవరికి?

ఐకాన్ స్టార్ అల్లు అర్జున్‌ హీరోగా సుకుమార్‌ దర్శకత్వంలో తెరకెక్కుతోన్న చిత్రం ''పుష్ప 2: ది రూల్‌''. బ్లాక్ బస్టర్ 'పుష్ప: ది రైజ్‌' సీక్వెల్‌గా వస్తోన్న ఈ యాక్షన్ డ్రామా కోసం యావత్ సినీ ప్రియులు ఆతృతగా ఎదురుచూస్తున్నారు. అదే సమయంలో 'పుష్ప 2' లో ఐటెం సాంగ్ లో ఏ హీరోయిన్ నటిస్తారో తెలుసుకోవాలని ఆసక్తి కనబరుస్తున్నారు. ఈ నేపథ్యంలో స్పెషల్ సాంగ్ లో యంగ్ సెన్సేషన్ శ్రీలీల భాగం కానున్నట్లు ఓ వార్త సోషల్ మీడియాలో వైరల్‌గా మారింది.

సుకుమార్‌ సినిమాలలో 'స్పెషల్‌ సాంగ్స్‌' ఎంతో ప్రత్యేకంగా ఉంటుందనే సంగతి తెలిసిందే. ఆయన సినిమాల్లోని 'అ అంటే అమలాపురం', '36 24 36', 'రింగ రింగా' 'డియాలో డియాలా' 'లండన్ బాబూ' 'జిల్ జిల్ జిగేలు రాణి' పాటలు ఆడియన్స్ ను విశేషంగా ఆకట్టుకున్నాయి. 'పుష్ప1' చిత్రంలోని 'ఊ అంటావా మావా' పాట ఎంత పెద్ద హిట్టయ్యిందో చెప్పాల్సిన అవసరం లేదు. ఐటెం భామగా సమంత రూత్ ప్రభు పాన్ ఇండియాని ఊపేసింది. ఇప్పుడు 'పుష్ప 2' మూవీలో కూడా అదే స్థాయిలో ఓ స్పెషల్ సాంగ్‌ ఉంటుందని ఇప్పటికే మేకర్స్ క్లారిటీ ఇచ్చారు.

''పుష్ప 2: ది రూల్‌'' సినిమాలో ఐటెం సాంగ్ కోసం ఇప్పటికే అనేకమంది హీరోయిన్ల పేర్లు వినిపించాయి. పార్ట్-1లో ఆడిపాడిన సమంతానే రెండో భాగంలోనూ ప్రత్యేక గీతం చేయనుందని ముందుగా వార్తలు వచ్చాయి. ఆ తర్వాత 'యానిమల్' బ్యూటీ త్రిప్తి డిమ్రి, 'కల్కి' భామ దిశా పటాని పేర్లు తెర మీదకు వచ్చాయి. చివరిగా శ్రద్ధ కపూర్ పేరు గట్టిగా వినిపించింది. ఐటెం గర్ల్ ని ఇంకా ఫైనలైజ్ చేయలేదని నిర్మాత చెప్పినప్పటికీ, 'స్త్రీ 2' సక్సెస్ తో మంచి ఊపుమీదున్న శ్రద్ధానే కంఫర్మ్ చేసే ఛాన్స్ ఉందని అందరూ భావించారు. కానీ ఇప్పుడు ఉన్నట్టుండి శ్రీలీల పేరు తెర మీదకు వచ్చింది.

'పుష్ప 2' స్పెషల్ సాంగ్ కోసం శ్రద్ధాకపూర్‌ అధిక రెమ్యునరేషన్ డిమాండ్ చేసిందని, ఆమె ఇతర ప్రాజెక్ట్స్ తో బిజీగా ఉండటం వల్ల స్పెషల్ సాంగ్ చేయడానికి ఆసక్తి కనబరచలేదని.. ఇలా అనేక వార్తలు వచ్చాయి. కారణాలు ఏవైనా ఇప్పుడు ఫైనల్ గా శ్రీలీలనే ఐటెం గర్ల్ గా ఫిక్స్ చేసినట్లు టాక్ నడుస్తోంది. ఇక్కడ మరో ఇంట్రెస్టింగ్ న్యూస్ ఏంటంటే, శ్రీలీలతో పాటుగా సమంత కూడా ఈ పాటలో భాగం కానుందని అంటున్నారు. ఇప్పటికైతే దీని గురించి మేకర్స్ సైడ్ నుంచి ఇంకా అఫిషియల్ కన్ఫర్మేషన్ రాలేదు కానీ, శ్రీలీలను తీసుకున్నారనే ప్రచారంపై అభిమానులు సోషల్ మీడియాలో స్పందిస్తున్నారు.

''పుష్ప 2: ది రూల్‌'' చుట్టూ నెలకొన్న అంచనాలను దృష్టిలో పెట్టుకొని చూస్తే.. ఓ బాలీవుడ్ హీరోయిన్ ని స్పెషల్ సాంగ్ కోసం తీసుకుంటే నార్త్ మార్కెట్ లో ప్లస్ అవుతుందని కొందరు కామెంట్స్ చేస్తున్నారు. త్రిప్తి డిమ్రి లేదా శ్రద్ధా కపూర్‌ లలో ఎవరైనా బాగుండేదని అంటున్నారు. మరికొందరు సమంతనే ఫిక్స్ చేయాలని కోరుకుంటున్నారు. ఇంకొందరు మాత్రం శ్రీలీల అయితే, అల్లు అర్జున్ కు ధీటుగా డ్యాన్స్ చేయగలదని అభిప్రాయపడుతున్నారు. అందులోనూ సామ్ కూడా ఈ సాంగ్ లో ఉంటుందని అంటున్నారు కాబట్టి, ఈ కాంబోలో వచ్చే ఐటెం నంబర్ తో థియేటర్లు దద్దరిల్లిపోవడం ఖాయమని కామెంట్స్ చేస్తున్నారు.

ఇప్పటికే 'పుష్ప 2' టాకీ పార్ట్ షూటింగ్ అంతా పూర్తయింది. ఇంక మిగిలింది ఐటెం సాంగ్ మాత్రమే. దీని కోసం దేవిశ్రీ ప్రసాద్ ఎప్పటిలాగే అదిరిపోయే ట్యూన్ కంపోజ్ చేసినట్లు తెలుస్తోంది. నవంబర్ 4వ తేదీ నుంచి ఈ పాట చిత్రీకరణ ఉంటుందని సమాచారం. అప్పటి వరకూ పుష్పరాజ్ తో కలిసి స్టెప్పులేసే బ్యూటీ ఎవరనే దానిపై ఇలా వార్తలు వస్తూనే ఉంటాయి.