కెప్టెన్ కూల్ ధోని తెరంగేట్రం?

టీమిండియా మాజీ కెప్టెన్ .. ప్రస్తుత IPL ట్రెండ్‌సెట్టర్ అయిన MS ధోనిపై కొత్త పుకార్ అంద‌రి దృష్టిని ఆక‌ర్షిస్తోంది. ఇన్నాళ్లు ఆట‌గాడిగా మైదానంలో మెరుపులు మెరిపించిన‌ ఎం.ఎస్.ధోని త్వ‌ర‌లోనే వెండితెర‌పైనా న‌టుడిగా త‌న‌దైన శైలిలో మెరిపిస్తార‌ని గుస‌గుస‌లు వినిపిస్తున్నాయి. ధోని నటనా రంగ ప్రవేశం గురించి ఇప్పుడు ఆస‌క్తిక‌ర చ‌ర్చ సాగుతోంది. ఐపీఎల్ తో ధోని పేరు హెడ్ లైన్స్ లోకి వ‌స్తున్న‌ట్టే ఇక‌పై న‌టుడిగాను మీడియా హెడ్ లైన్స్ లో నిలుస్తాడ‌ని టాక్ వినిపిస్తోంది.

తమిళ సూపర్ స్టార్, ద‌ళ‌ప‌తి విజయ్ న‌టిస్తున్న 'ది గ్రేటెస్ట్ ఆఫ్ ఆల్ టైమ్' (GOAT) చిత్రంతో ధోని ఆరంగేట్రం పాజిబుల్ కానుంద‌ని స‌మాచారం. వెంకట్ ప్రభు దర్శకత్వం వహిస్తున్న‌ ఈ చిత్రంలో ద‌ళ‌ప‌తి విజయ్ ద్విపాత్రాభినయం చేస్తుండ‌గా, ఇందులో భారీ తారాగణం న‌టిస్తున్నారు. చైనా నుండి కేరళ వరకు ప‌లు లొకేషన్లలో చిత్రీకరణ జరుగుతోంది. ఇటీవల తెర‌కెక్కించిన కొన్ని కీల‌క‌ సన్నివేశాలలో ధోని కూడా పాల్గొన్నట్లు గుస‌గుస‌లు వినిపించాయి. దీంతో ఈ సినిమాలో ధోని అతిథి పాత్రలో కనిపిస్తాడనే ఊహాగానాలు ఊపందుకున్నాయి.

క్రికెట్ ప్రేమికుల‌కు ఇది ఉత్సాహం క‌లిగించే వార్త‌. అయితే దీనికి ఎం.ఎస్. ధోని లేదా `ది గోట్` చిత్ర బృందం నుండి అధికారిక ధృవీకరణ లేదు. దర్శకుడు వెంక‌ట్ ప్రభు గతంలో ఈ చిత్రం రీమేక్ కాద‌ని, టైమ్ ట్రావెల్ నేప‌థ్యంలో తెర‌కెక్కుతున్న సినిమా కాద‌ని పుకార్ల‌ను కొట్టి పారేసారు. వాస్త‌విక అంశాల‌తో రూపొందుతోంద‌ని నొక్కిచెప్పారు. కార‌ణం ఏదైనా కానీ ధోని తెరంగేట్రం ఇప్పుడు స‌ర్వ‌త్రా ఆస‌క్తిని క‌లిగిస్తోంది.

కెప్టెన్ కూల్ ధోని ఇన్నాళ్లు మైదానంలో బ్యాట్ ఝ‌లిపించడంలోను, కీప‌ర్ గా అద్భుత‌మైన క్యాచ్ లు స్టంప్ లతో అల‌రించ‌డంలో ప్ర‌సిద్ధి చెందాడు. ఇప్పుడు నటుడిగాను అద‌ర‌గొడ‌తాడ‌ని అభిమానులు ఆశ‌ప‌డుతున్నారు. అత‌డు ఆరంగేట్రం చేస్తాడా లేదా? అన్న‌ది ఆస‌క్తిగా మారింది. ఇది కేవ‌లం పుకార్ అయినా కానీ.. అభిమానుల దృష్టిని ఆకర్షించింది. అధికారిక ప్ర‌క‌ట‌న వెలువ‌డుతుంద‌ని అభిమానులు వేచి చూస్తున్నారు.