కుర్చీ సాంగ్.. పిల్లలకు ఎలా చెప్పాలి?

సూపర్ స్టార్ మహేశ్ బాబు నటిస్తున్న లేటెస్ట్ మూవీ గుంటూరు కారం. త్రివిక్రమ్, మహేశ్ కాంబినేషన్ లో తెరకెక్కుతున్న హ్యాట్రిక్ మూవీ ఇది. అయితే ఈ సినిమాలో మహేశ్ ను ఊరమాస్ లుక్ లో చూడొచ్చని ఇప్పటికే పోస్టర్లు చూస్తే క్లారిటీ వచ్చేసింది. లుంగీ, గళ్ల చొక్కా, బీడీ.. అలా మహేశ్ పోస్టర్లు అదిరిపోతున్నాయి. తాజాగా మేకర్స్ రిలీజ్ చేసిన కుర్చీ మడత పెట్టి సాంగ్ ప్రోమోతో మరింత క్లారిటీ వచ్చేసిందని అభిమానులు చెబుతున్నారు.

ఆ సంగతి పక్కన పెడితే.. ఇప్పటికే ఈ సినిమా నుంచి విడుదలైన ధమ్ మసాలా సాంగ్ ఆకట్టుకుంది. కానీ ఆ తర్వాత వచ్చిన ఓ మై బేబీ సాంగ్ పై విపరీతంగా ట్రోలింగ్ జరిగింది. మహేశ్-త్రివిక్రమ్ కాంబోలో వచ్చిన గత చిత్రాల్లో ఉన్న సాంగ్స్ స్థాయిలో గుంటూరు కారం పాటలు లేవని వాదన వినిపించింది. దీంతో ఎలాగైనా మహేశ్ ఫ్యాన్స్ ను ఆకట్టుకోవాలని తమన్.. కుర్చీ మడత పెడితే సాంగ్ కు పుల్ మాస్ కొట్టాడు. ఇక ఆ పాట ప్రోమో రిలీజ్ అవ్వగానే ట్రోల్స్ మొదలయ్యాయి.

సోషల్ మీడియాలో ట్రెండింగ్ లో ఉన్న ఫన్ ఎలిమెంట్స్ ను, డైలాగులను ప్రస్తుతం సినిమాల్లో వాడేస్తున్నారు. కుర్చీ మడత పెట్టి అనే మాట కూడా సోషల్ మీడియా నుంచి వచ్చిందే. ఒక మీమ్ పేజీలో ముసలి వ్యక్తి చెప్పిన వైరల్ మాటను తీసుకుని ఏకంగా సాంగ్ రాయించి ట్యూన్ కట్టించడం మహేశ్ అభిమానులకు మింగుడు పడడం లేదు. సోషల్ మీడియా కంటెంట్ ను, మీమ్స్ ను ఉపయోగించుకునే స్థాయి కాదు మహేశ్ బాబుది అని అంటున్నారు. పాటలో మహేశ్, శ్రీలీల స్టెప్పులు ఓకే కానీ లిరిక్స్ అస్సలు బాలేదని రచ్చరచ్చ చేస్తున్నారు.

అయితే ఈ పాటపై ట్రోల్స్ అలా పెరుగుతూనే ఉన్నాయి. తాజాగా ఒక టాప్ న్యూస్ ఛానెల్ యాంకర్ పెట్టిన పోస్ట్ ఇప్పుడు ఫుల్ వైరల్ గా మారింది. మహేశ్, తమన్, త్రివిక్రమ్ లాంటి సూపర్ క్రేజ్ ఉన్న సెలబ్రెటీలు చేయాల్సిన పాట కాదని ఆమె పోస్ట్ చేసిన వీడియోలో చెప్పింది. కుర్చీ మడత పెట్టిన తర్వాత ఏంటి డాడీ అని తన కొడుకు అడిగితే చెప్పలేకపోతున్నా అంటూ వీడియో తీసి పోస్ట్ చేసింది. ఇప్పుడు ఈ వీడియో తెగ చక్కర్లు కొడుతోంది.

మరోవైపు, పాటలపై ఎన్ని ట్రోల్స్ వస్తున్నా.. కొందరు ఫ్యాన్స్ మాత్రం సినిమాపై భారీ అంచనాలు పెట్టుకున్నారు. సంక్రాంతి విజయం మహేశ్ బాబుదేనని అంటున్నారు. ఈ మూవీలో మహేశ్ తో పాటు శ్రీలీల, మీనాక్షి చౌదరీ లీడ్ రోల్స్ చేస్తున్నారు. జగపతిబాబు, రమ్యకృష్ణ, బ్రహ్మానందం, ప్రకాశ్ రాజ్, సునీల్, రఘబాబు తదితరులు కీలక పాత్రల్లో కనిపించనున్నారు. జనవరి 6వ తేదీన హైదరాబాద్ లో ఈ సినిమా ప్రీరిలీజ్ ఈవెంట్ జరగనుందని సినీ వర్గాల్లో టాక్. అప్పుడు ట్రైలర్ ను లాంఛ్ చేయనున్నారట.