'తండేల్' చైతూ.. సునామీ కటౌట్

టాలీవుడ్ యంగ్ హీరో నాగచైతన్య నటిస్తున్న లేటెస్ట్ మూవీ తండేల్ పై ఎలాంటి బజ్ క్రియేట్ అయిందో అందరికీ తెలిసిందే. కెరీర్ స్టార్టింగ్ నుంచి వైవిధ్యమైన ప్రాజెక్టులు ఎంచుకుంటూ దూసుకుపోతున్న చైతన్య.. తనకంటూ స్పెషల్ ఇమేజ్ క్రియేట్ చేసుకున్నారు. ఇప్పుడు తన కంఫర్ట్ జోన్ నుంచి బయటకొచ్చి తండేల్ లో రూరల్ మాస్ క్యారెక్టర్ రాజు రోల్ చేస్తున్నారు.

ఉత్తరాంధ్రకు చెందిన కొందరు మత్స్యకారుల జీవితంలో జరిగిన సంఘటనల ఆధారంగా తండేల్ ను క్రేజీ డైరెక్టర్ చందూ మొండేటి దర్శకత్వం వహిస్తున్నారు. నేచురల్ బ్యూటీ సాయి పల్లవి హీరోయిన్ గా నటిస్తున్నారు. ఒక అందమైన ప్రేమ కథ ఈ సినిమాలో హైలెట్ కానుంది. బుజ్జి తల్లి పాట కూడా బాగా వైరల్ అవుతోంది. ఇప్పటికే మేకర్స్ రిలీజ్ చేసిన ప్రమోషనల్ కంటెంట్ ను చూస్తుంటే.. నాగ చైతన్య సినిమాలో తన రోల్ లో ఒదిగిపోయినట్లు అర్థమవుతోంది.

ఎన్నడూ లేని విధంగా తండేల్ కోసం మేకోవర్ చేసుకున్న చైతూ.. సినిమా కోసం ఉత్తరాంధ్ర యాస ప్రత్యేకంగా నేర్చుకున్నారని వినికిడి. అయితే తండేల్ కోసం కర్త, కర్మ, క్రియ అన్నట్లు ఎంతో కష్టపడుతున్న చైతూ పుట్టిన రోజు నేడు. దీంతో ఆయనకు సోషల్ మీడియాలో తండేల్ మేకర్స్ ప్రత్యేకంగా పుట్టినరోజు శుభాకాంక్షలు తెలియజేశారు.

"తండేల్ రాజు రోల్ భారతీయ చలనచిత్ర పరిశ్రమలో చిరకాలం గుర్తుండిపోతుంది. 2025 ఫిబ్రవరి 7న బాక్సాఫీస్ వద్ద భారీ సునామీ.. యువసామ్రాట్ కు హ్యాపీ బర్త్ డే" అంటూ ట్వీట్ చేశారు. అదే సమయంలో పవర్ ఫుల్ పోస్టర్ ను కూడా రిలీజ్ చేశారు. అందులో భారీ ఆయుధంతో తుఫాను మధ్య ఓడపై నాగ చైతన్య నిలబడి కనిపించి అందరినీ ఆకట్టుకుంటున్నారు.

మందపాటి గడ్డం, పొడవాటి జట్టుతో రగ్డ్ లుక్ లో ఉన్న చైతూ పోస్టర్.. ఇప్పుడు సోషల్ మీడియాలో తెగ చక్కర్లు కొడుతోంది. చైతూ లుక్స్ చాలా సీరియస్‌ గా కనిపిస్తుండటంతో.. ఆ సీన్ యాక్షన్ సీక్వెన్స్‌ కు సంబంధించి ఉంటుందని అంతా భావిస్తున్నారు. ఆ ప్రత్యేకమైన యాక్షన్ సీక్వెన్స్ మెయిన్ అట్రాక్షన్ గా నిలవనున్నట్లు తెలుస్తోంది.

ఇక సినిమా విషయానికొస్తే.. అల్లు అరవింద్ సమర్పణలో ప్రతిష్టాత్మక గీతా ఆర్ట్స్ బ్యానర్‌ పై బన్నీ వాస్ నిర్మిస్తున్నారు. నేషనల్ అవార్డ్ విన్నింగ్ టెక్నీషియన్ నవీన్ నూలి ఎడిటర్ గా వ్యవహరిస్తున్నారు. రాక్ స్టార్ దేవిశ్రీ ప్రసాద్ సంగీతం అందిస్తున్నారు. మరి తండేల్ తో నాగచైతన్య ఎలాంటి విజయాన్ని అందుకుంటారో వేచి చూడాలి.