కుమార్తె ఫోటో తీయొద్ద‌ని వారించిన చరణ్
సౌత్ ప్ర‌తిభ గురించి నిర్మొహ‌మాటంగా బాహాటంగా మీడియా ఎదుట కీర్తిస్తున్నారు.
By: Tupaki Desk | 16 Dec 2023 6:53 AM GMT
టాలీవుడ్ సెల‌బ్రిటీలు ఇటీవ‌ల ముంబై బాంద్రాలో ఎక్కువ‌గా క‌నిపిస్తున్నారు. పాన్ ఇండియా ట్రెండ్ లో మ‌న అగ్ర హీరోలు ఔటింగుల కోసం ముంబైకి వెళుతుండ‌డం ఆస‌క్తిని క‌లిగిస్తోంది. ఇప్పుడు దేశ‌మంతా ఒక‌టే సినిమా. ప్రాంతీయ‌త‌త్వాలు మ‌టుమాయ‌మ‌వుతున్నాయి. నెమ్మ‌దిగా సౌత్ స్టార్ల‌ను, ఇక్క‌డి ప్ర‌తిభ‌ను అంగీక‌రించేందుకు బాలీవుడ్ అల‌వాటు ప‌డుతోంది. ఉత్త‌రాది ప్ర‌జ‌లు క‌నిక‌రం లేకుండా కంటెంట్ లేని హిందీ సినిమాల్ని ఫ్లాపులు చేయ‌డంతో వారంతా ఆలోచ‌న‌లో ప‌డ్డారు. ఇప్పుడు సౌత్ డైరెక్ట‌ర్లు బాలీవుడ్ అగ్ర హీరోల‌కు బ్లాక్ బ‌స్ట‌ర్ల‌ను అందిస్తున్నారు. దీంతో సీన్ అంతా మారిపోయింది. సౌత్ ప్ర‌తిభ గురించి నిర్మొహ‌మాటంగా బాహాటంగా మీడియా ఎదుట కీర్తిస్తున్నారు.
ఇటీవ‌ల చరణ్ - మ‌హేష్‌- అల్లు అర్జున్ - ఎన్టీఆర్ లాంటి స్టార్లు ముంబైలో ఎక్కువ‌గా షికార్ చేస్తూ మీడియా కంటికి చిక్కుతున్నారు. ఇక వీళ్ల‌లో ప‌లువురు ఇప్ప‌టికే ముంబైలో సొంతంగా ఇల్లు కొనుక్కున్నారు. అక్క‌డికి కుటుంబంతో వెళుతున్నారు. ఇలాంటి వాళ్ల‌లో మెగా ప‌వ‌ర్ స్టార్ రామ్ చరణ్ ముందు వ‌రుస‌లో ఉన్నాడు. అత‌డు తన భార్య ఉపాసన, కుమార్తె క్లిన్ కారాతో ముంబైలో సొంత ఇంటికి వెళుతూ మీడియా కంటికి చిక్కుతున్నాడు.
ఇప్పుడు కూడా మ‌రోసారి ఈ కుటుంబం ముంబై మీడియాకి చిక్కింది. రామ్ చరణ్ తన కుమార్తె క్లిన్ కారాను ముంబై ఇంటికి తీసుకుని వెళుతూ కెమెరా కంటికి చిక్కాడు. ఆ మేర‌కు ప్ర‌ముఖ హిందీ మీడియా తాజాగా క‌థ‌నం వెలువ‌రించి ఫోటోల‌ను షేర్ చేయ‌గా అవి మెగాభిమానుల్లో వైర‌ల్ గా మారుతున్నాయి.
రామ్ చరణ్ , అత‌డి భార్య ఉపాసన కొణిదెల బాంద్రాలోని ఇంట్లో వారి కుమార్తె క్లిన్ కారాతో కనిపించారు.
చరణ్-ఉపాసన కార్ దిగి ముంబైలోని వారి నివాసం లోపలికి ప్ర‌వేశిస్తూ కనిపించారు. అక్క‌డ స్టిల్ ఫోటోగ్రాఫ‌ర్లు మెగా హీరోని వెంబ‌డించ‌గా, రామ్ చరణ్ కూడా వారి వైపు చేతులు ఊపుతూ న‌వ్వుతూ క‌నిపించాడు. అయితే తన కూతురిని ఫోటో తీయవద్దని కెమెరామెన్ల‌ను కోరాడు. కొన్ని రోజుల క్రితం, రామ్ చరణ్ -ఉపాసన కొణిదెల జంట త‌మ కుమార్తె క్లిన్ కారా కొణిదెల.. ఫర్రి ట్రావెల్ బడ్డీతో కలిసి హైదరాబాద్‌లోని ఒక విమానాశ్రయంలో కనిపించారు. ఇప్పుడు ముంబైలో ఫోటోగ్రాఫ‌ర్ల కంట ప‌డ్డారు.
కెరీర్ మ్యాట‌ర్ కి వ‌స్తే.. రామ్ చరణ్ ప్రస్తుతం తన తదుపరి చిత్రం గేమ్ ఛేంజర్‌తో బిజీగా ఉన్నారు. ఇది సమకాలీన రాజకీయాల నేప‌థ్యంలో యాక్షన్ డ్రామా క‌థాంశంతో రూపొందుతోంది. ఇందులో రామ్ చరణ్ ఐఎఎస్ అధికారి పాత్రలో న‌టిస్తున్నారు. అత‌డు సీఎంగా క‌నిపించే అవ‌కాశం ఉంద‌ని క‌థ‌నాలొచ్చాయి. కియారా అద్వానీ, ఎస్ జె సూర్య, సునీల్, జయరామ్, అంజలి త‌దిత‌రులు కీల‌క పాత్రలలో నటించనున్నారు. ద‌ర్శ‌క‌దిగ్గ‌జం ఎస్. శంకర్ దర్శకత్వం వహిస్తున్న ఈ చిత్రానికి దర్శకుడు కార్తీక్ సుబ్బరాజ్ కథ అందించిన తర్వాత స్క్రిప్ట్‌ను అభివృద్ధి చేశారు.
ఈ చిత్రంతో పాటు కమల్ హాసన్ ప్రధాన పాత్రలో భారతీయుడు 2 చిత్రాన్ని ఏక‌కాలంలో S. శంకర్ తెర‌కెక్కిస్తున్న సంగ‌తి తెలిసిందే. గతంలో కమల్ హాసన్, శంకర్ కాంబినేషన్‌లో వచ్చిన ఈ చిత్రానికి సీక్వెల్‌గా వస్తున్న ఈ సినిమా కూడా వచ్చే ఏడాది విడుద‌ల కానుంది. కమల్ హాసన్ నటిస్తున్న ఈ చిత్రంలో రామ్ చరణ్ అతిధి పాత్రలో నటిస్తున్నారని రెండు చిత్రాలను ఒకేసారి హైదరాబాద్‌లో చిత్రీకరిస్తున్నార‌ని కూడా పుకార్లు షికార్ చేస్తున్నాయి. ప్ర‌ముఖ బాలీవుడ్ దర్శకుడితోను ఓ సినిమా కోసం రామ్ చరణ్‌తో చర్చలు జరుపుతున్నట్లు గతంలో కూడా పుకార్లు వచ్చాయి. అయితే దీనికి సంబంధించి అధికారికంగా ఎలాంటి స‌మాచారం లేదు.
