ఛత్రపతి రీ రిలీజ్.. ఈ టైం లో రిస్కేమో..!

రాజమౌళి, ప్రభాస్ కాంబినేషన్ లో వచ్చిన మొదటి బ్లాక్ బస్టర్ మూవీ ఛత్రపతి. ఈ సినిమాతోనే ప్రభాస్ కి పూర్తి స్థాయి మాస్ ఇమేజ్ వచ్చింది. ప్రభాస్ రేంజ్ పెంచిన ఈ సినిమా రెబల్ స్టార్ ఫ్యాన్స్ కి సంథింగ్ స్పెషల్ అని చెప్పడంలో ఎలాంటి సందేహం లేదు. ఇదిలా ఉంటే ప్రభాస్ కెరీర్ లో ఒకప్పటి బిగ్గెస్ట్ హిట్ అయిన ఛత్రపతి సినిమాను అక్టోబర్ 23 సోమవారం ప్రభాస్ పుట్టినరోజు సందర్భంగా రీ రిలీజ్ ప్లాన్ చేస్తున్నారు.

స్టార్ సినిమాల రీ రిలీజ్ హంగామా ఇంకా కొనసాగుతూనే ఉంది. ఇప్పటికే ప్రభాస్ వర్షం, బిల్లా, రెబల్ సినిమాలు రీ రిలీజ్ చేశారు. వాటికి ఆశించిన స్థాయిలో రెస్పాన్స్ రాలేదు. ఇప్పుడు ఛత్రపతికి కూడా ఆ రేంజ్ రెస్పాన్స్ వస్తుందా లేదా అన్నది అనుమానంగా ఉంది. ఎందుకంటే దసరా సందర్భంగా కొత్త సినిమాలు థియేటర్లలో సందడి చేస్తున్నాయి. దసరా విన్నర్ గా బాలకృష్ణ భగవంత్ కేసరి దూసుకెళ్తుండగా రవితేజ టైగర్ నాగేశ్వర రావు పండుగ సీజన్ ని క్యాష్ చేసుకోవాలని చూస్తున్నాడు.

ఇక టాక్ బాగాలేకపోయినా లియో కలెక్షన్స్ బాగున్నాయి ఆ సినిమాకు బాగానే థియేటర్లు ఇచ్చారు. కొన్ని చోట్ల లాస్ట్ వీక్ రిలీజైన మ్యాడ్ ఆడుతూనే ఉంది. వీటితో పాటు ఛత్రపతికి థియేటర్లు ఇవ్వాలంటే కొద్దిగా కష్టమే అని చెప్పొచ్చు. రీ రిలీజ్ టైం లో ఆర్టీసీ క్రాస్ రోడ్స్ లో రిలీజ్ నాడు మొదటి షో ఫ్యాన్స్ హంగామా చేస్తే మిగతా షోలన్నీ ఖాళీగా ఉంటున్నాయి.

అదీగాక రీ రిలీజ్ టైం లో ఫ్యాన్స్ చేస్తున్న బీభత్సం వల్ల థియేటర్ ఆస్తి నష్టం జరుగుతుంది. ఈ కారణాలతో కొన్ని థియేటర్లు రీ రిలీజ్ సినిమాలు మేము వేయమని ఫిక్స్ అయ్యారు. మరి ఈ పరిస్థితుల్లో ప్రభాస్ ఛత్రపతి రీ రిలీజ్ అనుకున్న స్థాయిలో రికార్డులు సృష్టిస్తుందా అన్నది డౌట్ గానే ఉంది. ప్రభాస్ బర్త్ డే సందర్భంగా అతను నటిస్తున్న కొత్త సినిమాల అప్డేట్స్ కూడా పుట్టినరోజు కానుకగా రిలీజ్ కాబోతున్నాయి. మరి ఛత్రపతిని పట్టించుకుంటారా లేదా అన్నది చూడాలి. మిగతా హీరోలు రీ రిలీజ్ లతో కూడా రికార్డులు కొడుతుంటే ఛత్రపతి తో ప్రభాస్ కూడా తన పేరు మీద రికార్డ్ కొడతాడా లేదా రెబల్ ఫ్యాన్స్ ఎగ్జైటింగ్ గా ఉన్నారు.