'ధూం ధాం' పర్ఫెక్ట్ ఫ్యామిలీ ఎంటర్‌టైనర్: చేతన్ కృష్ణ
చేతన్ కృష్ణ మాట్లాడుతూ, తనకు యాక్టింగ్ అంటే చిన్నప్పటి నుంచి ప్యాషన్ అని చెప్పారు. 'ఫస్ట్ ర్యాంక్ రాజు', 'బీచ్ రోడ్ చేతన్', 'రోజులు మారాయి', 'గల్ఫ్' వంటి చిత్రాల్లో నటించి ప్రేక్షకులకు గుర్తింపు తెచ్చుకున్నారు.
By: Tupaki Desk | 6 Nov 2024 1:23 PM GMT
హీరో చేతన్ కృష్ణ, హెబ్బా పటేల్ ప్రధాన పాత్రల్లో నటించిన చిత్రం 'ధూం ధాం'. ఫ్రైడే ఫ్రేమ్ వర్క్స్ బ్యానర్ పై ఎంఎస్ రామ్ కుమార్ నిర్మాణంలో తెరకెక్కిన ఈ సినిమాను సాయి కిషోర్ మచ్చా దర్శకత్వం వహిస్తున్నారు. లవ్ మరియు ఫ్యామిలీ ఎంటర్‌టైనర్‌గా తెరకెక్కిన ఈ చిత్రానికి గోపీ మోహన్ కథ, స్క్రీన్ ప్లే అందించారు. నవంబర్ 8న ఈ సినిమా థియేటర్లలో విడుదల కానుంది. ఈ సందర్భంగా ఇంటర్వ్యూలో హీరో చేతన్ కృష్ణ సినిమా విశేషాలను పంచుకున్నారు.
చేతన్ కృష్ణ మాట్లాడుతూ, తనకు యాక్టింగ్ అంటే చిన్నప్పటి నుంచి ప్యాషన్ అని చెప్పారు. 'ఫస్ట్ ర్యాంక్ రాజు', 'బీచ్ రోడ్ చేతన్', 'రోజులు మారాయి', 'గల్ఫ్' వంటి చిత్రాల్లో నటించి ప్రేక్షకులకు గుర్తింపు తెచ్చుకున్నారు. "గోపీ మోహన్ గారి స్క్రిప్ట్స్‌లో కుటుంబాన్ని ఆకట్టుకునే ఎలిమెంట్స్ ఉంటాయి. అందుకే ఆయనతో కలిసి పనిచేయాలని, ఒక ఫ్యామిలీ ఎంటర్‌టైనర్‌లో నటించాలని అనుకున్నాను. 'ధూం ధాం' చిత్రాన్ని ఒక మంచి మసాలా ఫిల్మ్‌గా రూపొందించాం,” అని తెలిపారు.
ఈ సినిమాను తండ్రి-కొడుకుల మధ్య బలమైన భావోద్వేగంతో కూడిన కథాంశంతో తెరకెక్కించినట్లు తెలిపారు. తండ్రి తన కొడుకు అన్నింట్లో బాగా ఉండాలని కోరుకుంటాడు, కానీ ఆ కేరింగే కొడుకును అల్లరికి గురి చేస్తుంది. ఈ నేపథ్యంతో సినిమాలో ఎమోషనల్, ఫన్నీ సీన్స్ ఉన్నాయి. ఇక సినిమాకు వెన్నెల కిషోర్ కీలక పాత్రలో ఉన్నారని, ఆయనతో కలిసి నటించడం చాలా ఆసక్తికరమని అన్నారు. “వెన్నెల కిషోర్ గారి టైమింగ్‌ను మ్యాచ్ చేయడం కష్టంగా అనిపించింది. ఆయన సినిమా సెకండాఫ్‌లో ప్రధాన ఆకర్షణగా నిలుస్తారు,” అని చెప్పారు.
మరోవైపు, హెబ్బా పటేల్‌తో కలిసి నటించడం ఆనందంగా ఉందని, ఆమె కెమెరా ముందుకు రాగానే తన పాత్రలోకి మారిపోతుందని చేతన్ వివరించారు. “నాకు హీరోగా మంచి పొజిషన్ ఉండాలని నా తండ్రి కోరుకుంటారు. ఈ సినిమాను క్వాలిటీ పరంగా చాలా గ్రాండ్‌గా రూపొందించారు. ప్రతి అంశంలో ప్రేక్షకులను ఆకట్టుకునేలా తీర్చిదిద్దారు,” అని చేతన్ తెలియజేశారు.
ఈ చిత్రానికి మ్యూజిక్ డైరెక్టర్ గోపీ సుందర్ చార్ట్‌బస్టర్ పాటలు అందించారని, మైత్రీ మూవీ మేకర్స్ రిలీజ్ బాధ్యతలు తీసుకోవడం సినిమాకు పెద్ద ప్రయోజనమని పేర్కొన్నారు. థ్రిల్లర్స్ ట్రెండ్‌లో ఉన్నప్పటికీ, ఈ సినిమాను ట్రెండ్‌కు భిన్నంగా ఫ్యామిలీ ఎంటర్‌టైనర్‌గా తీసుకురావడం పట్ల ఉత్సాహంగా ఉన్నామను తెలిపారు.
“ప్రస్తుతం ఉన్న సినిమాల ట్రెండ్‌కి భిన్నమైన 'ధూం ధాం' తప్పకుండా ప్రేక్షకులకు కొత్త అనుభూతిని ఇస్తుంది. సెకండాఫ్‌లో మంచి కామెడీ ఎలిమెంట్స్ థియేటర్‌ను నవ్వులతో నింపుతుందని భావిస్తున్నాను. మా చిత్రాన్ని ప్రేక్షకులు తప్పకుండా ఆదరిస్తారని ఆశిస్తున్నాను. ఇక ఈ సినిమా విడుదల అనంతరం నా తదుపరి సినిమాపై క్లారిటీ ఇస్తాను” అని చేతన్ వివరణ ఇచ్చారు. అలాగే 'ధూం ధాం' సక్సెస్ కోసం అభిమానుల మద్దతు కోరుకున్నారు. సినిమా బజ్ చూస్తుంటే తప్పకుండా ప్రేక్షకులకు కనెక్ట్ అవుతుందని చిత్ర యూనిట్ సబ్యులు తెలిపారు.
