'విశ్వంభర'కి ఆ స్పెషల్‌ డేట్‌ ఫిక్స్‌?

మెగాస్టార్ చిరంజీవి 2025 సంక్రాంతికి 'విశ్వంభర' సినిమాతో రావాల్సింది. కానీ షూటింగ్‌ ఆలస్యం కావడంతో పాటు ఇతర కారణాల వల్ల వాయిదా పడింది. చిరంజీవి సినిమా ఎప్పుడు వస్తుందా అంటూ మెగా ఫ్యాన్స్ ఆసక్తిగా ఎదురు చూస్తున్నారు. కానీ మేకర్స్ మాత్రం ఇప్పటి వరకు విడుదల తేదీ విషయమై క్లారిటీ ఇవ్వడం లేదు. విశ్వంభర సినిమాను సమ్మర్‌లో విడుదల చేస్తామని అంటున్నారు కానీ ఇప్పటి వరకు అందుకు సంబంధించిన తేదీని ప్రకటించకపోవడంతో అభిమానులు అసంతృప్తి వ్యక్తం చేస్తున్నారు. ఈ సమయంలో సినిమా విడుదల తేదీ విషయంలో ఆసక్తికర ప్రచారం ఒకటి సోషల్‌ మీడియాలో జరుగుతోంది.

విశ్వంభర సినిమాను మే 9న ప్రేక్షకుల ముందుకు తీసుకు వచ్చేందుకు మేకర్స్ ప్లాన్‌ చేస్తున్నారు. యూవీ క్రియేషన్స్ బ్యానర్‌లో రూపొందుతున్న ఈ సినిమాకు బింబిసార దర్శకుడు వశిష్ట దర్శకత్వం వహిస్తున్నాడు. విశ్వంభర సినిమాలో చిరంజీవికి జోడీగా త్రిష హీరోయిన్‌గా నటించగా పలువురు ముద్దుగుమ్మలు చిరంజీవికి చెల్లెల పాత్రలో కనిపించబోతున్నారు. ఇప్పటి వరకు సినిమా స్టోరీ లైన్‌పై ఎలాంటి క్లారిటీ ఇవ్వలేదు. కానీ ఇది ఒక సోషియో ఫాంటసీ సినిమా అని మాత్రం మొదటి నుంచి ప్రచారం జరుగుతోంది. చిరంజీవి చాలా సంవత్సరాల తర్వాత సోషియో ఫాంటసీ కథాంశంతో ప్రేక్షకుల ముందుకు రాబోతున్న నేపథ్యంలో ఫ్యాన్స్‌లో అంచనాలు భారీగా ఉన్నాయి.

చిరంజీవి నటించిన జగదేక వీరుడు అతిలోక సుందరి సినిమా మే 9, 1990న ప్రేక్షకుల ముందుకు వచ్చింది. దాదాపు 35 ఏళ్ల తర్వాత అదే సోషియో ఫాంటసీ నేపథ్యంలో అదే మే 9న చిరంజీవి విశ్వంభర సినిమా విడుదల కాబోతుంది. చిరంజీవి గత చిత్రాల ఫలితాల నేపథ్యంలో ఈ సినిమా విషయంలో మరింత జాగ్రత్తలు తీసుకున్నారు. సోషియో ఫాంటసీ సబ్జెక్ట్‌లను సరిగ్గా డీల్‌ చేయగలడు అనే నమ్మకంతో వశిష్టకి ఈ సినిమా బాధ్యతలు అప్పగించారు. అతడు నందమూరి కళ్యాణ్‌ రామ్‌ తో రూపొందించిన బింబిసార సినిమా మంచి విజయాన్ని సొంతం చేసుకుంది. అందుకే విశ్వంభర సినిమాపై అంచనాలు భారీగా ఉన్నాయి.

గత ఏడాది కాలంగా సినిమా కోసం మెగా ఫ్యాన్స్ వెయిట్‌ చేస్తున్నారు. చిరంజీవి అనారోగ్య కారణాల వల్ల, ఇతర కారణాల వల్ల షూటింగ్ ఆలస్యం అయ్యింది. పైగా సినిమా భారీ విజువల్‌ ఎఫెక్ట్స్ వర్క్‌ని కలిగి ఉంది కనుక మేకింగ్‌కి ఎక్కువ సమయం పడుతుంది. షూటింగ్ ముగింపు దశకు చేరుకుందని, వీఎఫ్‌ఎక్స్ వర్క్‌ సైతం మార్చి నెల చివరి వరకు పూర్తి చేసే అవకాశాలు ఉన్నాయని తెలుస్తోంది. అందుకే సినిమాను మే నెలలో విడుదల చేసే విధంగా ప్లాన్‌ చేస్తున్నారు. మే నెలలో ఎలాగూ చిరంజీవికి సెంటిమెంట్‌ డేట్‌ మే 9 ఉంది కనుక.. ఆ తేదీనే విశ్వంభరకి ఫిక్స్ చేస్తే బాగుంటుందని యూనిట్‌ సభ్యులు భావిస్తున్నారు. మరి చిరంజీవి నుంచి ఎలాంటి స్పందన వస్తుందో అనేది చూడాలి.