విశ్వంభర రిలీజ్.. ఆ డేట్ కు వస్తే బీభత్సమే..

మెగాస్టార్ చిరంజీవి నటిస్తున్న విశ్వంభర సినిమా మొదట భారీ అంచనాలు క్రియేట్ చేసిన విషయం తెలిసిందే. కానీ అనుకున్న విడుదల తేదీలు మారిపోవడం, టీజర్ తర్వాత నెగటివ్ ప్రచారం రావడం, గ్రాఫిక్స్ మీద వ్యతిరేకత పెరగడంతో సినిమా విడుదల ఇప్పటి వరకు సవ్యంగా వెళ్లడం లేదు. సంక్రాంతి 2025లో విడుదల కావాల్సిన ఈ సినిమా, అప్పటి పరిస్థితుల కారణంగా వాయిదా పడింది. అయితే తాజా సమాచారం ప్రకారం, విశ్వంభర సినిమా మెగాస్టార్ పుట్టినరోజున విడుదల చేయాలనే ఆలోచనలో చిత్రబృందం ఉందని తెలుస్తోంది.

ఇక సినిమా విషయంలో వచ్చిన పెద్ద సమస్య టీజర్ ద్వారా బయటపడింది. గ్రాఫిక్స్ నాణ్యత కంటే ఆశించిన స్థాయికి తక్కువగా ఉండటంతో ప్రేక్షకులు ట్రోలింగ్ చేశారు. ముఖ్యంగా ఆదిపురుష వంటి సినిమాలు నెగటివ్ బజ్ ఎలా తీసుకురాగలవో చూసిన తర్వాత, విశ్వంభర టీం మరింత జాగ్రత్తపడుతోంది. చిరంజీవి కూడా ఇదే విషయాన్ని గమనించి, గ్రాఫిక్స్ పనిని పూర్తిగా రీ-వర్క్ చేయాలని సూచించినట్లు సమాచారం. మొదట మే రిలీజ్ కోసం చూస్తున్నా, ఇప్పుడది కూడా సాధ్యపడేలా కనిపించడం లేదు.

మెగాస్టార్ చిరంజీవి సినిమాలకు ఎప్పుడూ థియేట్రికల్ మార్కెట్ బలంగా ఉంటుంది. కానీ ఈసారి టీజర్ ఎఫెక్ట్ వల్ల సినిమా ఓటీటీ డీల్ కూడా పూర్తిగా ఫైనల్ కాలేదని వార్తలు వస్తున్నాయి. సాధారణంగా టాప్ హీరోల సినిమాలు షూటింగ్ సమయంలోనే ఓటీటీ, శాటిలైట్ రైట్స్ దాదాపు క్లోజ్ అవుతాయి. కానీ విశ్వంభర విషయంలో ఇంకా స్పష్టత రావడం లేదు. సినిమా బడ్జెట్ భారీగా ఉండటంతో, థియేట్రికల్ మార్కెట్‌పై ఎక్కువగా ఆధారపడాల్సిన పరిస్థితి ఉంది.

ఇక విజువల్ ఎఫెక్ట్స్ విషయంలో మెరుగైన అవుట్‌పుట్ కోసం, అవతార్ సినిమా వెహికల్స్ వర్క్ చేసిన టెక్నీషియన్లను రంగంలోకి దింపినట్లు తెలుస్తోంది. పీరియాడిక్ ఫాంటసీగా తెరకెక్కుతున్న ఈ సినిమా విఎఫ్ఎక్స్ నాణ్యత కీలకమైన అంశంగా మారింది. సినిమా లేటెస్ట్ బజ్ ప్రకారం, ఆగస్ట్ 22, చిరంజీవి పుట్టినరోజు సందర్బంగా గ్రాండ్ రిలీజ్ ప్లాన్ చేస్తున్నట్లు సమాచారం.

మెగాస్టార్ ఫిల్మ్ కావడం, టీజర్ లో తప్పొప్పులపై రీ-వర్క్ చేయడం వంటి అంశాలు కలిపి సినిమాపై మళ్లీ అంచనాలు పెంచేలా ఉన్నాయి. చిరు కెరీర్‌లో మరో వండర్ సినిమాగా నిలవాలంటే, చిత్రబృందం గ్రాఫిక్స్ పనులను మెరుగ్గా పూర్తి చేయడమే ప్రధానమైన కర్తవ్యంగా మారింది. మణిరత్నం తరహాలో భావోద్వేగ పీరియాడికల్ సినిమాగా తెరకెక్కించనున్న ఈ ప్రాజెక్ట్ చివరకు ప్రేక్షకులను మెప్పించగలిగితే, ఇది మెగాస్టార్ ఫ్యాన్స్‌కు తీపి విజయం కానుంది. ఇప్పటివరకు అధికారిక ప్రకటన రాకపోయినప్పటికీ, అఫీషియల్ అప్డేట్ కోసం అభిమానులు ఆసక్తిగా ఎదురు చూస్తున్నారు.