గణపత్ టీజర్​.. చెడును అంతం చేసే హీరో

వైవిధ్యభరితమైన యాక్షన్‌ కథలతో అభిమానుల్ని, సినీ ప్రేక్షకుల్ని అలరిస్తుంటారు బాలీవుడ్ హీరో టైగర్ ష్రాఫ్‌. ఇప్పుడాయన హీరోగా నటించిన లేటెస్ట్ మూవీ గణపత్‌- పార్ట్‌ 1. వికాస్‌ బహ్ల్‌ దర్శకత్వం వహించారు. తాజాగా ఈ చిత్ర తెలుగు టీజర్​ను మెగాస్టార్ చిరంజీవి విడుదల చేశారు. సినిమా విజయం సాధించాలని ఆకాంక్షించారు.

ఈ ప్రచార చిత్రం ఆద్యంతం యాక్షన్​ సన్నివేశాలతో పవర్​ఫుల్​గా సాగింది. హాలీవుడ్ రేంజ్​లో విజువల్స్ ఆకట్టుకుంటున్నాయి. సాధారణంగానే టైగర్ ష్రాఫ్ సినిమాలు అంటే కళ్ళు చెదిరే యాక్షన్ ఎపిసోడ్స్ ఎలాగో ఉంటాయి. ఇప్పుడు గణపత్​ సినిమాలోనూ అంతే. టీజర్​తోనే ఆ రుచి చూపించారు మేకర్స్. 1:45 నిమిషాల నిడివితో కట్ చేసిన ఈ టీజర్​లో ప్రతి ఫ్రేమ్ యాక్షన్​తోనే సాగింది.

2070 ఏడితో టీజర్​ను ప్రారంభించి.. ఆ తర్వాత తినడానికి తిండి కూడా లేకుండా కొట్టుకునే మనుషులు ఉండటాన్ని, వారిపై చెడు పాలిస్తూ ఉండటాన్ని చూపించారు. బ్యాక్​గ్రౌండ్​లో 'మన కోసం ఓ వీరుడు వచ్చేంతవరకు ఈ యుద్ధం మొదలుపెట్టొద్దు. ప్రతీ ప్రారంభం గణ్​పత్​తోనే మొదలవుతుంది హీరో పుట్టాడు' అంటూ అమితాబ్​.. హీరో పాత్రను ఎలివేషన్​ ఇస్తూ టైగర్ ష్రాప్​ను పవర్​ ఫుల్​గా చూపించడం అంతా బాగుంది.

చివర్లో విలన్లపై టైగర్ ష్రాప్​ 'మా వాళ్ల జోలికి వస్తే అస్సలు వదిలిపెట్టను' అంటూ వారిపై విరుచుకుపడటంతో టీజర్​ను ముగించారు. టీజర్ అమితాబ్​ను సరికొత్తగా కనిపించారు. కృతి సనన్​ను అందంగా కనపడుతూనే ఫైట్స్ కూడా చేసింది. మొత్తంగా ఈ గణపత్​ టీజర్.. యాక్షన్ మూవీ లవర్స్​ కోసమే అనిపించేలా ఉంది.

ఇకపోతే చిత్రంలో కృతిసనన్‌ హీరోయిన్​గా నటించింది. బాలీవుడ్ బిగ్​ బీ అమితాబ్‌ బచ్చన్‌ కీలక పాత్ర పోషించారు. హిందీ, తెలుగుతో పాటు ఇతర భాషల్లో సినిమా అక్టోబర్‌ 20న గ్రాండ్​గా విడుదల చేస్తున్నారు. అయితే ఈ దసరా సీజన్​లో తెలుగులో ఇప్పటికే బాలయ్య భగవంత్ కేసరి, రవితేజ టైగర్ నాగేశ్వర రావు, విజయ్​ లియో, శివ రాజ్​కుమార్​ ఘోస్ట్ సినిమాలు రిలీజ్ అవ్వడానికి రెడీగా ఉన్నాయి.