చంద్ర‌బాబు ప్రమాణ స్వీకారంలో చిరు-ర‌జ‌నీ

రేపు జరగనున్న ఆంధ్రప్రదేశ్ కొత్త ముఖ్యమంత్రి చంద్రబాబు నాయుడు ప్రమాణ స్వీకారోత్సవంలో తారా తోర‌ణం వేదిక‌కు ప్ర‌త్యేకించి గ్లామ‌ర్ అద్ద‌నుంది. జూన్ 12న ఉదయం 11:27 గంటలకు గన్నవరం విమానాశ్రయం సమీపంలోని కేసరపల్లి ఐటీ పార్క్‌లో ఈ వేడుక జరగనుంది. మరోవైపు ఆంధ్రప్రదేశ్ ఉప ముఖ్యమంత్రిగా పవన్ కళ్యాణ్ ప్రమాణ స్వీకారం చేయనున్నారు. ఈ కార్య‌క్ర‌మం కోసం ప‌లువురు స్టార్లు స్థానిక విమానాశ్ర‌యంలో అడుగుపెడుతున్నారు.

ఇప్ప‌టికే ప‌లువురు స్టార్లు గ‌న్న‌వ‌రం విమానాశ్ర‌యంలో కెమెరాల‌కు ప‌ట్టుబ‌డ్డారు. ఈ ప్రమాణ స్వీకారోత్సవానికి రాష్ట్ర ప్ర‌త్యేక అతిథిగా మెగాస్టార్ చిరంజీవికి ఆహ్వానం అంద‌డంతో ఆయ‌న త‌న స‌తీమ‌ని సురేఖ‌తో క‌లిసి ఇప్ప‌టికే విజ‌య‌వాడ‌కు విచ్చేశారు. ఈరోజు సాయంత్రం గ‌న్న‌వరం విమానాశ్ర‌యంలో అడుగుపెట్టిన‌ప్ప‌టి నుండి మెగాస్టార్ ఫోటోలు వీడియోలు అంత‌ర్జాలంలో వైర‌ల్ గా మారాయి. అలాగే ఈ ఈవెంట్ కి మెగా ప‌వ‌ర్ స్టార్ రామ్ చరణ్ కూడా హాజ‌రు కానున్న‌ట్టు తెలుస్తోంది.

ఇత‌ర అతిథుల్లో సూప‌ర్ స్టార్ ర‌జ‌నీకాంత్ కూడా ఉన్నారు. త‌లైవా నేరుగా దిల్లీ నుంచి గ‌న్న‌వ‌రం విమానాశ్ర‌యానికి విచ్చేశార‌ని తెలుస్తోంది. ఇక ప్ర‌మాణ స్వీకారంలో తారా తోర‌ణం నిండుగా కొలువు దీర‌నుంది. వీళ్ల‌లో న‌ట‌సింహా నంద‌మూరి బాల‌కృష్ణ, ముర‌ళీమోహ‌న్ స‌హా ప‌లువురు సినీప్ర‌ముఖులు క‌నిపించ‌నున్నారు. గ‌తంలో ముఖ్య‌మంత్రిగా వైయ‌స్ జ‌గ‌న్మోహ‌న్ రెడ్డి ప్ర‌మాణ స్వీకారానికి ప్ర‌ముఖ‌ సినీతార‌లెవ‌రూ అటెండ్ కాని సంగ‌తి తెలిసిందే. చంద్ర‌బాబు రాక‌తో సినీప‌రిశ్ర‌మ‌లో ఉత్స‌వ వాతావ‌ర‌ణం క‌నిపిస్తోంది. ఆయ‌న అమ‌రావ‌తి రాజ‌ధానితో పాటు, ఆంధ్ర‌ప్ర‌దేశ్ విశాఖ‌ప‌ట్నంలో టాలీవుడ్ అభివృద్ధికి కృషి చేస్తార‌ని కూడా ఆశిస్తున్నారు.