వీడియో: మెగాస్టార్‌లో ఎప్ప‌టికీ అదే జోష్‌

మెగాస్టార్ చిరంజీవి 156వ ప్రాజెక్ట్ షూటింగ్ త్వ‌ర‌లో ప్రారంభం కానుంది. తాత్కాలికంగా మెగా156 అని టైటిల్ ని నిర్ణ‌యించిన ఈ చిత్రం ఫాంటసీ యాక్షన్ డ్రామా. బింబిసార ఫేమ్ వశిష్ట ద‌ర్శ‌క‌త్వం వ‌హిస్తున్నారు. ఇటీవల చరణ్ తన నివాసంలో గ్రాండ్ దీపావళి పార్టీని నిర్వహించ‌గా, దీనికి పరిశ్రమలోని వారు ఎవరూ హాజరయ్యారు. ఇది పూర్తిగా వ్య‌క్తిగ‌త ప్ర‌యివేట్ పార్టీ. ఈ దీపావళి ఈవెంట్ నుండి ఒక వీడియో ఇప్పుడు ఇంటర్నెట్‌లో వైర‌ల్ అవుతోంది.

దీనిలో మెగాస్టార్ చిరంజీవి కింగ్ ఖాన్ షారుఖ్ 'జవాన్' టైటిల్ ట్రాక్‌కి స్టెప్పులు వేస్తూ జోష్ తో కనిపించారు. కింగ్ ఖాన్ పాటకు చిరు డ్యాన్స్ చేయడం అభిమానులను ఫిదా చేస్తోంది. స్టార్లలో ఎలాంటి భేష‌జానికి పోకుండా వినోదాన్ని వినోదంలా చూడ‌టం అనేది ఆర్ట్. ఇలాంటి విష‌యాల్లో ఎలాంటి సందేహం లేకుండా మెగా బాస్ అగ్రస్థానంలో ఉన్నారు. ఈ తాజా వీడియో చిరులోని వెర్స‌టైల్ ఆలోచ‌న‌ను నిరూపిస్తుంది.

ఈ వీడియోలో మెగాస్టార్‌తో పాటు, మెగాపవర్ స్టార్ రామ్ చరణ్ - రాపర్ రాజ కుమారి కూడా కనిపించారు. ఆ ముగ్గురూ క‌లిసి ఎంతో ఉత్సాహంగా డ్యాన్సులు చేస్తుంటే చూడ‌టానికి క‌న్నుల‌పండుగ‌గా ఉంది. రాప‌ర్ రాజ‌కుమారి ఎంతో ఎన‌ర్జిటిక్ గా గానాలాప‌న చేస్తూ నృత్యం చేయ‌డం ఆస‌క్తిక‌రం.

2023 వెరీ స్పెష‌ల్ :

మెగా కుటుంబానికి ఈ ఏడాది చాలా ప్ర‌త్యేక‌మైన సంవ‌త్స‌రం. రామ్ చ‌ర‌ణ్ - ఉపాస‌న దంప‌తుల‌కు తొలి సంతానం క‌లిగింది. బేబి క్లిన్ క్లారా రాక‌తో మెగాస్టార్ ఎంతో ఆనందంగా ఉన్నారు. ఇంత‌లోనే నాగ‌బాబు త‌న‌యుడు వ‌రుణ్ తేజ్ ఓ ఇంటివాడ‌య్యాడు. ఇదే ఏడాది ఆస్కార్ హంగామాతో ఆర్.ఆర్.ఆర్ స్టార్ రామ్ చ‌ర‌ణ్ ఖ్యాతి విశ్వ‌విఖ్యాతం అయింది. అత‌డు తదుప‌రి పాన్ వ‌ర‌ల్డ్ స్టార్ గా ఎద‌గ‌నున్నారు. వీట‌న్నిటితో రెట్టించిన‌ ఆనందం మెగా కాంపౌండ్ లో స్ప‌ష్ఠంగా క‌నిపిస్తోంది. వ‌రుస‌గా పండుగ‌లు, ప‌బ్బాలు, పార్టీలు అంటూ ఆ జోష్ వారిలో స్ప‌ష్ఠంగా క‌నిపిస్తోంది.