అనుష్క కాదు.. చిరు కోసం ఆ బ్యూటీ
ఈ మూవీలో చిరంజీవి సరసన పలువురు హీరోయిన్లు నటించే ఛాన్స్ ఉంది. వాస్తవానికి ఈ సినిమాలో సీనియర్ హీరోయిన్ అనుష్క శెట్టి ఒక్కరే హీరోయిన్ అని గతంలోనే బయటకు వచ్చింది.
By: Tupaki Desk | 10 Dec 2023 5:07 AM GMT
టాలీవుడ్ మెగాస్టార్ చిరంజీవి వరుస సినిమాలతో దూసుకెళ్తున్నారు. ఇటీవలే భోళాశంకర్ సినిమాతో ప్రేక్షకుల ముందుకు వచ్చిన చిరు.. ఇప్పుడు మరో సినిమా మొదలుపెట్టేశారు. మెగా156గా తెరకెక్కుతున్న ఈ చిత్రానికి విశ్వంభర అనే పేరు ఫిక్స్ చేయనున్నారు. ఈ మూవీని బింబిసార ఫేమ్ డైరెక్టర్ వశిష్ఠ దర్శకత్వం వహిస్తుండగా.. యూవీ క్రియేషన్స్ పతాకంపై విక్రమ్, వంశీ, ప్రమోద్ నిర్మిస్తున్నారు.
అయితే ఈ మూవీ షూటింగ్ ప్రారంభమే పోరాట ఘట్టాలతోనే మొదలైంది. మారేడుమిల్లి అడవుల్లో కీలక సన్నివేశాలన్ని తెరకెక్కిస్తున్నారు. ఈ సినిమా షూటింగ్ జరుగుతుండగానే తెలంగాణ అసెంబ్లీ ఎన్నికల్లో ఓటేసేందుకు చిరంజీవి విరామం తీసుకుని హైదరాబాద్ వచ్చారు.
ఈ మూవీలో చిరంజీవి సరసన పలువురు హీరోయిన్లు నటించే ఛాన్స్ ఉంది. వాస్తవానికి ఈ సినిమాలో సీనియర్ హీరోయిన్ అనుష్క శెట్టి ఒక్కరే హీరోయిన్ అని గతంలోనే బయటకు వచ్చింది. కానీ ఇప్పుడు తెరపైకి త్రిష పేరు వచ్చింది. అనుష్క శెట్టి ఆశించిన స్థాయిలో బరువు తగ్గకపోవడంతో ఆ ఛాన్స్ త్రిషకు దక్కినట్లు తెలుస్తోంది.
త్రిషను పేరును చిరునే సజ్జెస్ట్ చేశారట. పొన్నియన్ సెల్వన్, లియో వంటి చిత్రాలతో పాన్‌ ఇండియా రేంజ్‌లో గుర్తింపు సంపాదించుకున్న త్రిష.. చాలా రోజులుగా టాలీవుడ్ రీఎంట్రీకి ఎదురు చూస్తోంది. మెగాస్టార్ చిత్రంతో వస్తున్న ఈ అవకాశాన్ని ఆమె ఉపయోగించుకోవాలని ఫిక్స్ అయిందట.
అప్పట్లో చిరంజీవి, త్రిష కాంబినేషన్‌లో వచ్చిన స్టాలిన్‌ చిత్రం సూపర్ హిట్ అయింది. ఆ తర్వాత ఆచార్య సినిమాలో మరోసారి వీరిద్దరూ కలిసి నటించనున్నారనే వార్తలు వచ్చాయి. కానీ కొన్ని కారణాల వల్ల త్రిష స్థానంలో కాజల్ అగర్వాల్‌ను తీసుకున్నారు మేకర్స్. ఏదేమైనా చిరు సినిమాలోకి త్రిష ఎంట్రీకి సంబంధించి అఫీషియల్ అప్డేట్ వచ్చే వరకు వేచి చూడాల్సిందే.
అయితే మెగా 156లో విజువల్‌ ఎఫెక్ట్స్‌కు ప్రాధాన్యం ఎక్కువగా ఉంది. ఈ సినిమా ప్రత్యేకమైన ఓ ఊహా ప్రపంచం నేపథ్యంలో సాగనుంది. చిన్నారుల్ని అలరించే అంశాలు ఈ మూవీలో పుష్కలంగా ఉంటాయని సినీ వర్గాల్లో టాక్ వినిపిస్తోంది. ఈ సినిమా కోసం చిరంజీవి కూడా ప్రత్యేకంగా సన్నద్ధమవుతున్నారట. ఆస్కార్ దర్శకుడు కీరవాణి సంగీతమందిస్తున్నారు.
