'కుబేర'కి ధనుష్ హిట్‌ సెంటిమెంట్‌!
ధనుష్ పాట పాడితే సినిమాకు సెంటిమెంట్‌ కలిసి వస్తుందని చాలా మంది అంటున్నారు. ముఖ్యంగా ఈ సినిమాలోని ఇంట్రడక్షన్‌ సాంగ్‌కి చాలా ప్రాముఖ్యత ఉంటుందట.
By: Tupaki Desk | 29 Dec 2024 11:30 PM GMT
కోలీవుడ్‌ స్టార్‌ ధనుష్ హీరోగా శేఖర్‌ కమ్ముల దర్శకత్వంలో రూపొందుతున్న 'కుబేర' సినిమాపై అంచనాలు భారీగా ఉన్నాయి. అంచనాలకు ఏమాత్రం తగ్గకుండా ఈ సినిమా రూపొందుతుందని సినిమా పోస్టర్స్ ను చూస్తుంటే అర్థం అవుతుంది. సినిమాలో ధనుష్ లుక్‌తో పాటు ప్రతి ఎలిమెంట్‌ ఆకట్టుకునే విధంగా ఉండబోతున్నాయని చిత్ర యూనిట్‌ సభ్యులు నమ్మకంగా చెబుతున్నారు. ఈ సినిమాలో నాగార్జున కీలక పాత్రలో నటించడం ద్వారా సినిమాపై అంచనాలు తెలుగు ప్రేక్షకుల్లో భారీగా పెరిగాయి. పైగా పుష్ప 2 హీరోయిన్‌ రష్మిక మందన్న ఈ సినిమాలో హీరోయిన్‌గా నటించడం ద్వారా అందరి దృష్టిని ఆకర్షిస్తోంది.
కుబేర సినిమాను ఫిబ్రవరిలో ప్రేక్షకుల ముందుకు తీసుకు రాబోతున్నారు. సినిమా విడుదల తేదీ సమీపిస్తున్న నేపథ్యంలో ప్రమోషన్స్‌ మొదలు పెడుతున్నారు. మొదటగా హీరో ఇంట్రడక్షన్‌ సాంగ్‌ను రిలీజ్ చేసేందుకు ఏర్పాట్లు చేస్తున్నారు. దేవిశ్రీ ప్రసాద్‌ ఈ సినిమాకు సంగీతాన్ని అందిస్తున్నారు. మొదటి పాటను ధనుష్‌తో పాడించడం వల్ల అంచనాలు పెంచుతున్నారు. గతంలో ధనుష్ పలు సార్లు తన సినిమాల్లో పాటలు పాడిన దాఖలాలు ఉన్నాయి. వాటిల్లో ఎక్కువ శాతం సినిమాలు బాక్సాఫీస్‌ వద్ద మంచి విజయాన్ని సొంతం చేసుకున్నాయి. ఫ్లాప్‌ అయినా ఆ పాటలు సినిమాకు హైప్‌ క్రియేట్‌ చేయడం జరిగింది. అందుకే కుబేర సినిమాకు ధనుష్ పాట ప్లస్ కాబోతుంది అంటూ పలువురు అభిప్రాయం వ్యక్తం చేస్తున్నారు.
ధనుష్ పాట పాడితే సినిమాకు సెంటిమెంట్‌ కలిసి వస్తుందని చాలా మంది అంటున్నారు. ముఖ్యంగా ఈ సినిమాలోని ఇంట్రడక్షన్‌ సాంగ్‌కి చాలా ప్రాముఖ్యత ఉంటుందట. అలాంటి పాటను ధనుష్ పాడటం వల్ల కచ్చితంగా మంచి క్రేజ్‌ సినిమాకు దక్కడం ఖాయం. ఆ పాట విడుదలైన తర్వాత తెలుగు, తమిళ ప్రేక్షకులు కుబేర సినిమా ఎప్పుడు వస్తుందా అంటూ ఎదురు చూడటం మొదలు పెడుతారు అంటూ యూనిట్‌ సభ్యులు ఆఫ్‌ ది రికార్డ్‌ చెప్పుకొచ్చారు. శేఖర్‌ కమ్ముల విభిన్న చిత్రాలకు పెట్టింది పేరు. కనుక ఈ సినిమాతోనూ ఆయన మరోసారి కమర్షియల్‌గా మంచి విజయాన్ని సొంతం చేసుకోవడం ఖాయం అనే నమ్మకంను ఆయన ఫ్యాన్స్ వ్యక్తం చేస్తూ సినిమా కోసం ఎదురు చూస్తున్నారు.
ఈ సినిమాలో నాగార్జున లుక్‌ ఇప్పటికే రివీల్‌ అయ్యింది. ధనుష్ లుక్‌ సినిమాపై ఆసక్తి పెంచింది. ఇక రష్మిక మందన్న ఫస్ట్‌ లుక్‌, ఆమె పాత్ర గ్లిమ్స్ సినిమా పై అంచనాలు మరింతగా పెంచాయి. ఈ మూడు పాత్రల మధ్య సాగే కథ ఏంటి, ఈ సినిమా నేపథ్యం ఏంటి అంటూ ఇప్పటికే అందరూ చర్చించుకుంటున్నారు. ఇప్పుడు ధనుష్ పాడిన పాట వస్తే ఆసక్తి మరింత పెరగడం ఖాయం. ఇప్పటికే చెన్నైలో ఈ పాటను రికార్డ్‌ చేశారని, పుష్ప 2 తర్వాత కుబేర చిత్రంతో దేవి శ్రీ ప్రసాద్‌ మరో సూపర్‌ హిట్‌ ఆల్బమ్ ను ఇవ్వబోతున్నాడు అంటూ ఆయన ఫ్యాన్స్ అంటున్నారు. కుబేర సినిమా టాలీవుడ్‌, కోలీవుడ్‌లోనే కాకుండా అన్ని భాషల్లోనూ విడుదల కాబోతుంది.
