దిల్ రాజు హై వోల్టేజ్ మల్టీస్టారర్.. సమస్యేంటీ?

అన్నివైపులా వృద్ధి చెందుతున్న తెలుగు సినిమా ఇప్పుడు కథా విషయాల పరంగా కాకుండా నిర్మాణ విలువల్లోనూ భారీ స్కేలు వైపు దూసుకెళ్తోంది. ముఖ్యంగా పాన్ ఇండియా సినిమాల జోరుతో ప్రాజెక్ట్‌ల రూపకల్పన కూడా మారిపోయింది. ఈ తరుణంలో ప్రముఖ నిర్మాత దిల్ రాజు ఓ భారీ మల్టీ స్టారర్ ప్లాన్ చేస్తుండటం ఆసక్తికరంగా మారింది. కథ రెడీగా ఉన్నా, హీరోల ఎంపిక ఆధారంగా సినిమాని తెలుగు లిమిటెడ్‌గా చేస్తారా, లేక పాన్ ఇండియా స్థాయిలో తీస్తారా అన్నది తేలనుంది.

ఈ చిత్రానికి ‘మార్కో’ సినిమాతో అంచనాలు పెంచుకున్న మలయాళ దర్శకుడు హనీఫ్ అదేని దర్శకత్వం వహించబోతున్నాడు. యాక్షన్ బ్యాక్‌డ్రాప్‌లో కథను మలచిన హనీఫ్, తన స్టైల్‌కు తగ్గట్టే ఓ మాస్ యాక్షన్ థ్రిల్లర్ రూపొందించనున్నట్లు సమాచారం. కథకు అవసరమైన ఇద్దరు ప్రధాన హీరోల ఎంపికపై ప్రస్తుతం చర్చలు సాగుతున్నాయి. తెలుగు పరిశ్రమలో ఉన్న టాప్ లీగ్ హీరోల్ని టార్గెట్ చేస్తున్నట్టు తెలిసింది.

ఇక్కడే కథ మలుపు తిరుగుతుంది. ఒకవేళ ఇద్దరూ టాలీవుడ్ టాప్ హీరోలే అయితే, సినిమా పరిమిత భాషల్లోనే విడుదల చేసే ఆలోచనలో ఉన్నారు నిర్మాతలు. కానీ ఒకరు బాలీవుడ్‌ నుంచి ఉంటే, లేదా తమిళం, మలయాళం నుంచి ఎవరైనా నటిస్తే మాత్రం నేరుగా పాన్ ఇండియా రిలీజ్‌కి వెళ్లే అవకాశం ఉంది. దిల్ రాజు ఇప్పటికే రెండు రకాల బిజినెస్ స్కెచ్‌లు సిద్ధం చేసుకుని వేచి చూస్తున్నారని సినీ వర్గాల్లో టాక్ వినిపిస్తోంది.

ఇప్పటికే హనీఫ్ ఆధ్వర్యంలో స్క్రిప్ట్ వర్క్ పూర్తయింది. కథలో మాస్‌ ఎమోషనల్ టచ్ కలిపి ఉండటంతో, ఇది ప్రేక్షకులకు కొత్త అనుభూతిని ఇచ్చేలా ఉండబోతోంది. అలాంటి కంటెంట్‌కు తెలుగు మార్కెట్‌లోనే కాకుండా ఇతర భాషల్లోనూ ఆదరణ లభించేందుకు, క్యాస్టింగ్ చాలా కీలకం. అందుకే హీరోల ఎంపికపై నిర్మాతలు జాగ్రత్తగా అడుగులు వేస్తున్నారు.

దిల్ రాజు గతంలో ‘సీతమ్మ వాకిట్లో సిరిమల్లెచెట్టు’, ‘ఎఫ్2’ వంటి మల్టీస్టారర్ సినిమాలతో విజయాన్ని సాధించారు. కానీ ఇప్పుడు ప్లాన్ చేస్తున్న ప్రాజెక్ట్ మాత్రం మాస్, యాక్షన్, ఎమోషన్ మిక్స్‌తో ఉన్న హై వోల్టేజ్ ఎంటర్టైనర్‌గా ఉండబోతోంది. దీంతో పాటు గ్లోబల్ మార్కెట్‌ను దృష్టిలో పెట్టుకుని నిర్మాణ విలువలు పెంచే అవకాశమూ ఉంది. మొత్తానికి కథ సిద్ధంగా ఉంది. దర్శకుడు సిద్ధంగా ఉన్నారు. నిర్మాణ బృందం రెడీగా ఉంది. ఇప్పుడు ఈ ప్రాజెక్ట్ దశ మారదొక్కటే – హీరోల ఎంపిక. ఒకసారి వారు ఫిక్స్ అయితే, ఈ సినిమా తెలుగు బౌండరీ దాటి దేశవ్యాప్తంగా సంచలనం సృష్టించే అవకాశాలున్నాయి.