కొత్త ట్రెండ్ కి రాజుగారు శ్రీకారం!

స్టార్ హీరోల ప్రీ రిలీజ్ ఈవెంట్లు జ‌రిగితే హైద‌రాబాద్ లో జ‌ర‌గాలి లేదంటే విశాఖప‌ట్ట‌ణంలో జ‌ర‌గాలి అన్న‌ట్లే ఒక‌ప్పుడు స‌న్నివేశం క‌నిపించేది. దీంతో స్టార్ హీరోల అభిమానులు ఆ రెండు న‌గ‌రాల‌కు త‌ర‌లి వెళ్లాల్సి వ‌చ్చేది. ఎక్కువ‌గా సినిమా అంటే అమితాభిమానం ఏపీ వాసుల‌కే ఉంటుంది. ఈ నేప‌థ్యంలో ఏపీలోని వివిధ ప్రాంతాల నుంచి హైద‌రాబాద్ కి వెళ్లేవారు. హైద‌రాబాద్ లో వేదిక ఎక్క‌డైనా స‌రే ఏపీలోని 26 జిల్లాల నుంచి అభిమానులు వెళ్లేవారు.

అయితే ఇప్పుడు సినిమా ప్ర‌చారం ట్రెండ్ మారిందిప్పుడు. స్టార్ ప్రొడ్యూస‌ర్ దిల్ రాజు న్యూ ట్రెండ్ ని ప‌రిచ‌యం చేసారు. ఇటీవ‌లే ఆయ‌న నిర్మించిన `సంక్రాంతికి వ‌స్తున్నాం` చిత్రంతోనే అందుకు బీజం ప‌డింది. ఈ సినిమా రిలీజ్ కు ముందు రాజుగారు ట్రైల‌ర్ రిలీజ్ ఈవెంట్ ని నిజామాబాద్ లో అభిమానుల స‌మక్షంలో నిర్వ‌హించిన సంగ‌తి తెలిసిందే. అక్క‌డికి హీరో వెంకేట‌ష్ స‌హా అంతా హాజ‌రై ఈవెంట్ని గ్రాండ్ స‌క్సెస్ చేసారు.

ఆ త‌ర్వాత స‌క్సెస్ మీట్ ని ఇటీవ‌ల భీమ‌వ‌రం లో నిర్వ‌హించారు. ఈ వేడుక గ్రాండ్ స‌క్సెస్ అయింది. దీనికంటే ముందు `డాకు మ‌హారాజ్` స‌క్సెస్ ఈవెంట్ అనంత‌ర పురంలో నిర్వ‌హించారు. వాస్త‌వానికి ప్రీ రిలీజ్ ఇక్క‌డ ప్లాన్ చేసినా తిరుప‌తి ఘ‌ట‌న కార‌ణంగా ర‌ద్దు చేసారు. దీంతో స‌క్సెస్ మీట్ ని అదే ప్లేస్ లో నిర్వ‌హించారు. ఇక `గేమ్ ఛేంజ‌ర్` ప్రీ రిలీజ్ ఈవెంట్ భారీ ఎత్తున రాజ‌మండ్రిలో నిర్వ‌హించిన సంగ‌తి తెలిసిందే.

వాస్త‌వానికి ఈ ఈవెంట్లు అన్ని హైద‌రాబాద్ లో నిర్వ‌హించాల‌నుకున్నారు. కానీ కొన్ని ఘ‌ట‌న‌ల‌తో వేదిక‌లు మారాయి. దీంతో ఈవెంట్లు స్ప్లిట్ అయ్యాయి. ఇలా వేదిక‌లు మార‌డం అన్న‌ది మంచిదే. అభిమానులు సుదూర ప్రాంతాల నుంచి హైద‌రాబాద్ కి వెళ్లాల్సిన ప‌ని త‌ప్పింది. అభిమానుల ముందుకే హీరోలు వ‌చ్చిన‌ట్లు అయింది. ప్ర‌తీ సినిమా ఈవెంట్ ను ఒకే ప్రాంతానికి ప‌రిమితం చేయ‌కుండా వివిధ ప్రాంతాల‌లో నిర్వ‌హించేలా చ‌ర్య‌లు తీసుకుంటే? అభిమానుల క్రౌడ్ నియంత్రించ వ‌చ్చు.

ఒక సినిమాకి సంబంధించిన ఈవెంట్లు గ్రాండ్ గా నిర్వాహించాల‌నుకున్న‌ప్పుడు అన్ని ఒకే చోట కాకుండా వివిధ ప్రాంతాల్లో ప్లాన్ చేసుకుని..మ‌రో ఈవెంట్ మ‌రో ప్రాంతంలో ఉంటుంద‌ని ముందుగానే ప్ర‌క‌టిస్తే ఆప్రాంతానికి స‌మీపంగా ఉన్న వారంతా హాజ‌ర‌వుతారు. దీనివ‌ల్ల క్రౌడ్ త‌గ్గుతుంది. తొక్కిస‌లాట‌లు...గొడ‌వ‌లు ఉండ‌వు. పోలీసుల్ని ఇబ్బంది పెట్టాల్సిన అవ‌స‌రం ఏర్ప‌డ‌దు. పోలీసు ఎన‌ర్జీ సేవ్ చేసిన‌ట్లు అవుతుంది. దిల్ రాజు `సంక్రాంతికి వ‌స్తున్నాం` సినిమా ఈవెంట్లు నిర్వ‌హించిన‌ట్లు మిగ‌తా నిర్మాత‌లు కూడా ఇలా ప్లాన్ చేస్తే బాగుంటుందని ప‌లువురు అభిప్రాయ‌ప‌డుతున్నారు. ఈ విష‌యంలో హీరోలు కూడా నిర్మాత‌ల‌కు పూర్తిగా స‌హ‌క‌రించాలి. అప్పుడే ఇది సాధ్య‌మ‌వుతుంది.